ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ​នៅ​រាត្រី​នេះ គឺ​កញ្ញា​កឹម មនោ​វិទ្យា កូនស្រី​លោក​កឹម សុខា​និង​ដែល​ធ្លាប់ជា​អគ្គនាយករង​ផ្នែក​កិច្ចការ​សាធារណៈ​របស់​អតីត​គណបក្ស​សង្គ្រោះ​ជាតិ។ កញ្ញា​កឹម មនោ​វិទ្យា នៅពេលនេះ​កំពុងស្ថិត​នៅឯ​សហរដ្ឋអាមេរិក ដើម្បី​បន្ត​ការអំពាវនាវ និង​ជំរុញ​ឲ្យ​អាមេរិក​ក៏​ដូច​សហគមន៍​អន្តរជាតិ​ដាក់ទណ្ឌកម្ម​មកលើ​រដ្ឋា​ភិ​បាល​កម្ពុជា​ក្នុង​គោលបំណង​ទាមទារ​គណបក្ស​សង្គ្រោះ​ជាតិ​មកវិញ និង​ឲ្យ​មានការ​ដោះលែង​លោក​កឹម សុខា។ ឆ្លើយ​នឹង​សំណួរ​របស់​វណ្ណ សុគន្ធា កញ្ញា​កឹម មនោ​វិទ្យា បាន​អះអាងថា ប្រសិន​រដ្ឋាភិបាល​កម្ពុ​ជា​មិន​ខ្វាយខ្វល់​នឹង​ទណ្ឌកម្ម​ផ្នែក​សេដ្ឋកិច្ច​ពី​សហគមន៍​អន្តរជាតិ​ទេនោះ គឺ​មានន័យថា រដ្ឋាភិបាល​ចង់​ធ្វើបាប​ពលរដ្ឋ​ខ្លួនឯង​ហើយ។ តទៅ​នេះ សូម​ស្ដាប់​បទសម្ភាសន៍​ទាំងស្រុង​រវាង​វណ្ណ សុគន្ធា និង​កញ្ញា​កឹម មនោ​វិទ្យា៖

នៅ​រសៀល​ថ្ងៃ​ទី ២៩​វិច្ឆិកា​នេះ សហភាព សហព័ន្ធ​សហជីព និង​សមាគម ចំនួន ៥ រួម​មាន សហភាព​ចលនា​កម្មករ​កម្ពុជា សមាគម​អភិវឌ្ឍន៍​សេដ្ឋកិច្ច​ពលរដ្ឋ​កម្ពុជា សម្ព័ន្ធ​សហជីព​ចលនា​កម្មករ​ សមាគម​អ្នក​បម្រើ​ការងារ​តាម​ផ្ទះ និង​សម្ព័ន្ធ​សហជីព​ការងារ​ឯករាជ្យ បាន​ដាក់​លិខិត​មួយ​បង្ហាញ​ការ​ព្រួយបារម្ភ ទៅ​កាន់​ឯកអគ្គរដ្ឋទូ​ត​សហភាព​អឺរុប ប្រចាំ​កម្ពុជា។ ដូច្នេះ​ភ្ញៀវ​ប្រចាំ​ថ្ងៃ របស់​វិទ្យុបារាំង​នៅ​រាត្រី​នេះ គឺ​លោក​ ប៉ាវ ស៊ីណា ប្រធាន​សហភាព​ចលនា​កម្មករកម្ពុជា ហៅ​កាត់​ថា CCW​។ លោក​ ប៉ាវ ស៊ីណា មាន​ការ​ព្រួយ​បារម្ភ ជុំវិញ​ការ​ព្រមាន​បិទ​ការ​នាំ​ចូល​នានា​ពី​កម្ពុជា ទៅ​កាន់​សហរដ្ឋអាមេរិក និង​សហគមន៍​អឺរុប ព្រោះ​ថា​វា​នឹង​មាន​ផល​ប៉ះពាល់​ខ្លាំង​មែន​ទែន ដល់​ជីវិភាព​កម្មករ និយោជិត ជាង ៨០​ម៉ឺន​នាក់ រួម​ទាំង​អ្នក​ទទួល​ផល​ពី​វិស័យ​កាត់ដេរ ជិត ២​លាន​នាក់​ទៀត​។ លោក ប៉ាវ ស៊ីណា ក៏ស្នើ​ផង​ដែរ កុំ​ឲ្យ​ក្រុម​អ្នក​នយោបាយ និង​សហគមន៍​អន្តរជាតិ យក​វិស័យ​អាទិភាព​នេះ ជា​ផ្ទាំង​ស៊ីប ដើម្បី​ព្រមាន​គ្នាទៅ​វិញ​ទៅ​មក​។

នៅ​​ថ្ងៃទី ​២៧ វិច្ឆិកា​នេះ រដ្ឋសភា​បាន​បើក​កិច្ចប្រជុំពេញអង្គ ដើម្បី​ប្រកាស​ផ្តល់​សុពលភាព​​​ដល់​​តំណាងរាស្ត្រ​ថ្មី​ចំនួន៤៤មកពី​​គណបក្ស​នយោបាយ​​ចំនួន​៣ ​ក្នុងនោះ​ក៏​​​​មាន​​​​​ព្រះអង្គម្ចាស់ នរោត្តម រណ​ឬ​ទ្ធិ បន្ទាប់ពី​ព្រះអង្គ​បាន​អវត្តមាន​ពី​រដ្ឋសភា​រយៈ​ពេល​​​១០​​​ឆ្នាំ​។ បើតាម​លោក ញ៉េប ប៊ុនជិន អ្នកនាំពាក្យ​គណបក្ស​ហ្វ៊ុនស៊ិនប៉ិច ដែល​ជា​ភ្ញៀវ​ប្រចាំថ្ងៃ​​របស់​​យើង​នៅ​រាត្រី​នេះ ​​បាន​​ចាត់​ទុកថា វត្តមាន​ជាថ្មី​របស់​សម្តេច​ក្រុម​ព្រះ នរោត្តម រណ​ឬ​ទ្ធិ និង​​គណ​បក្ស​ហ្វ៊ុន​ស៊ិនប៉ិច​​នៅ​ក្នុង​​រដ្ឋសភា​ថា គឺ​នៅក្នុង​បុព្វហេតុ​​រក្សា​ស្ថេរភាព​នយោបាយ​នៅ​កម្ពុជា។ ប៉ុន្តែ​​អតីត​​អនុរដ្ឋ​មន្រ្តី​ក្រសួង​​ឧស្សាហកម្ម​​​រូប​នេះ ​បាន​បង្ហាញ​ការសោកស្តាយ​ថា រយៈ​ពេល​៨​ខែនេះ គឺ​ជា​ពេល​វេលា​ខ្លី​​ពេក តែនៅតែសង្ឃឹមក្នុងការ​បំពេញ​តួនាទី​ជា​តំណាង​រាស្ត្រ​​ឲ្យ​​បាន​ល្អ​។

គណបក្ស​សង្រ្គោះជាតិ ដែល​ត្រូវ​បាន​រំលាយ​ទៅ​ហើយ​នោះ បាន​ចេញ​សេចក្តី​ថ្លែង​ការណ៍​​ជា​​ថ្មី​ទៀត​នៅ​ថ្ងៃ​នេះ ដោយ​កោត​សរសើរ​ដល់​សកម្មជន​របស់​ខ្លួន​ដែល​នៅ​តែ​រក្សា​ជំហ​​ជា​មួយ​​គណបក្ស​​នេះ​​។ នេះ​ជា​សារលិខិត ទៅ​កាន់​សមាជិក​របស់​ខ្លួន​បន្ទាប់​ពី​អតីត​គណបក្ស​ប្រឆាំង​ដ៏​ធំ​ជាង​គេ​នេះ បាន​ប្រកាស​កាល​ពី​ថ្ងៃ​ទី ២៤​វិច្ឆិកា​ថា តំណាងរាស្ត្រ​របស់​​ខ្លួន​នៅ​តែ​ជា​តំណាង​ស្រប​ច្បាប់​របស់​ម្ចាស់​ឆ្នោត​នៅ​កម្ពុជា បើ​ទោះ​ជា​ពួក​គេ​ស្ទើរ​តែ​ទាំងអស់ បាន​ចាក​ចេញ​ទៅ​ក្រៅប្រទេស​ក៏​ដោយ៕

នៅ​រសៀល​ថ្ងៃ​​សៅរ៍​​​នេះ ​ក្លិប​អ្នក​កាសែត​កម្ពុជា​ បាន​រៀបចំ​វេទិកា​និពន្ធ​នាយក​សារព័ត៌​មាន​​កម្ពុជា​លើក​ទី១​៤​។ ​ឆ្លៀត​ក្នុង​ឱកាស​នេះ ​លោក​ប៉ែន បូណា ​ប្រធាន​ក្លិប​អ្នក​កាសែត​កម្ពុជា​ បាន​ផ្តល់​បទ​សម្ភាសន៍​ផ្តាច់​មុខ​ដល់​វណ្ណ សុគន្ធា​ អ្នក​យក​ព័ត៌មាន​របស់​យើង​។ ក្រៅ​ពី​លើក​ឡើងពី​គោលបំណង​នៃ​ការ​រៀបចំ​នេះ ​លោកប៉ែន បូណា ​ក៏បាន​លើក​ឡើង​ពី​បញ្ហា​ការ​ចាប់ខ្លួន​អតីត​អ្នកកាសែត​វិទ្យុ​អាស៊ីសេរី​ពីរ​នាក់​ផង​ដែរ​។ ​បើ​តាម​លោក​ប៉ែន បូណា ​មូលហេតុ​ដែល​ក្លិប​មិន​ចេញ​សេចក្តី​ថ្លែងការណ៍​ណា​មួយ​ គឺ​ដោយសារ​តែ​ពេល​នេះ​ក្លិប​កំពុង​តាមដាន​សំណុំ​រឿង​នេះ ​និង​ចង់​ដើរ​តួនាទី​ជួយ​សម្រប​សម្រួល​។ ទោះបី​ជា​យ៉ាង​ណាក៏ដោយ ​លោក​ប្រធាន​ក្លិប​អ្នក​កាសែត​កម្ពុជា​ អំពាវនាវ​ឲ្យ​តុលាការ​ដោះលែង​ពួកគេ​វិញ ​បើ​រក​មិន​ឃើញ​ភស្តតាង​រឹង​មាំ​ណា​មួយ​នោះ​។តទៅ​សូម​ស្ដាប់​បទ​សម្ភាសន៍​រវាង​វណ្ណ​ សុគន្ធា ​និង ​លោកប៉ែន បូណា​៖

ស្ករ​ត្នោត​សរីរាង្គ​របស់​ក្រុមហ៊ុន​ខនហ្វីរេល កាល​ពី​ពេល​ថ្មីៗ​នេះ បាន​ឈ្នះ​ពាន​រង្វាន់​លេខ​១ ថា​ជា​ផលិត​ផល​ល្អ​បំផុត​មក​ពី​កម្ពុជា ខណៈ​ដែល​មាន​ការ​ប្រកួត​ប្រជែង​មួយ​នៅប្រទេស​វៀតណាម តាម​រយៈ​សន្និសីទ​អាស៊ាន​លើក​ទី​១៥​ស្តី​ពី​ចំណីអាហារ។ លោក ហ៊ឹម ពិសិដ្ឋ អគ្គនាយក​រង​នៃ​ក្រុមហ៊ុន​ខនហ្វីរេល បាន​ថ្លែង​ប្រាប់​វិទ្យុ​បារាំង​RFI ថា ពាន​រង្វាន់​នេះ បាន​ធ្វើ​ឲ្យ​ក្រុមហ៊ុន​ខនហ្វីរេល ក៏​ដូច​ប្រទេស​កម្ពុជា​ទាំង​មូល កាន់​តែ​មាន​មោទនភាព ដែល​មាន​ផលិត​ផល​ល្អ មាន​ស្តង់ដា​អនាម័យ​ទទួល​ស្គាល់​ដោយ​អន្តរជាតិ។

ក្នុង​ចំណោម​បក្ស​ទាំង​១១ ដែល​មាន​សិទ្ធិ​ទទួល​យក​អាសនៈ​ក្រុម​ប្រឹក្សា​ឃុំ សង្កាត់​អតីត​គណបក្ស​សង្រ្គោះ​ជាតិ គណបក្ស​ប្រជាធិបតេយ្យ​មូលដ្ឋាន គឺ​ជា​បក្ស​នយោបាយ​មួយ​ដែល​បាន​ប្រកាស​បដិសេធ​មិន​ទទួល​យក។ ជា​ភ្ញៀវ​ប្រចាំ​ថ្ងៃ​របស់​​យើង​នៅ​រាត្រី​នេះ លោក​សាម អ៊ីន ដែល​ជា​អគ្គលេខាធិការ​គណបក្ស​ប្រជាធិបតេយ្យ​មូលដ្ឋាន​បាន​លើក​ឡើង​ថា វា​មិន​យុត្តិធម៌​សោះ​ឡើយ ដែល​យក​អាសនៈ​ក្រុម​ប្រឹក្សា​ឃុំ សង្កាត់​ដែល​ជា​ឆន្ទៈ​របស់​ប្រជាពលរដ្ឋ​អ្នក​គាំទ្រ​អតីត​គណបក្ស​សង្រ្គោះ​ជាតិ​មក​បែង​ចែក​គ្នា​នោះ។

នៅ​ថ្ងៃ​ទី ៥​ខែ​ធ្នូខាង​មុខ​នេះ អង្គការ​ស៊ី​ប៉ា (Sipar) នឹង​រៀបចំ​កម្មវិធី​ជប់​លៀង​អាហារ​ពេល​ល្ងាច (Gala Dinner)​មួយ ដើម្បី​អបអរ​ដល់​ខួប​លើក​ទី ៣៥​ឆ្នាំ​របស់​អង្គការ​នេះ និង​ក៏​ដើម្បី​ស្វែង​រក​មូល​និធី «បង្កើន​ការ​អាន និង​រៀន គឺ​ដើម្បី​កសាង​បរិស្ថាន​ល្អ​មួយ​»។ ដូច្នេះ​ភ្ញៀវ​ប្រចាំ​ថ្ងៃ​របស់​វិទ្យុ​យើង​នៅ​រាត្រី​នេះ គឺ​លោក ហុក សុទ្ធិ ប្រធាន​អង្គការ​ស៊ីប៉ា​។ លោក​ហុក សុទ្ធិ បាន​លើក​ឡើង​ថា រយៈពេល ៣៥​ឆ្នាំ​មក​នេះ ស៊ីប៉ា បាន​ប្រឹងប្រែង​យ៉ាង​ខ្លាំង​លើ​វិស័យ​អំនាន រហូត​ទទួល​បាន​ផល​វិជ្ជមាន​ជា​ច្រើន​។ ប៉ុន្តែ​ទោះ​ជា​យ៉ាង​ណា ការ​អាន​នៅ​កម្ពុជា នៅ​មាន​កម្រិត​ទាប​ជាង​គេ ក្នុង​តំបន់​អាស៊ាន​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ RFI នៅ​រាត្រី​នេះ គឺ​អ្នក​នាង ជា លីដា ប្រធាន​យុទ្ធនាការ “It Takes a world ដើម្បី​បញ្ឈប់​អំពើ​ហិង្សា​លើ​កុមារ” នៃ​អង្គការ​ទស្សនៈ​ពិភព​លោក World Vision។ ឆ្លើយ​តប​នឹង​សំណួរ​របស់​វិទ្យុ​បារាំង​អន្តរជាតិ អ្នក​នាង ជា លីដា បាន​ឲ្យ​ដឹង​ថា ចាប់​ពី​ថ្ងៃ​ទី ២០ វិច្ឆិកា ឆ្នាំ​២០១៧​នេះ អង្គការ​ទស្សនៈ​ពិភព​លោក World Vision បាន​ចាប់​ផ្តើម​បើក​យុទ្ធនាការ​មួយ​ដែល​មាន​ឈ្មោះ​ថា​ “It Takes a world” ដើម្បី​បញ្ឈប់​អំពើ​ហិង្សា​លើ​កុមារ” នៅ​ប្រទេស​កម្ពុជា ក្នុង​ពេល​ជាមួយ​ការ​ប្រារព្ធ​ទិវា​កុមារ​អន្តរជាតិ​របស់​អង្គការ​សហប្រជាជាតិ។ យុទ្ធនាការ​នេះ គឺ​ដើម្បី​គៀរ​គរ​ចលនា​ជា​សកល​ពី​ថ្នាក់​ដឹក​នាំ​រដ្ឋាភិបាល សង្គម​ស៊ីវិល អ្នក​ជំនួញ និង​ប្រជាពលរដ្ឋ​ក្នុង​ការ​ចូល​រួម​ប្តេជ្ញា​ចិត្ត​តែ​មួយ ដើម្បី​ការពារ​កុមារ​ពី​អំពើ​ហិង្សា​គ្រប់​ទម្រង់។ បើ​តាម​អ្នក​នាង ជា លីដា នេះ​គឺ​ជា​លើក​ទី​មួយ​ដែរ ដែល​បុគ្គលិក​អង្គការ​ទស្សនៈ​ពិភព​លោក បាន​បង្ហាញ​ភាព​ជា​គំរូ​មួយ​ទៅ​កាន់​គ្រួសារ​និង​សហគមន៍​នៅ​ក្នុង​ប្រទេស​កម្ពុជា ដោយ​មិន​ប្រើ​ប្រាស់​អំពើ​ហិង្សា​ទៅ​លើ​កូនៗ​របស់​ពួក​គេ។

លោក រ៉ុង ឈុន រួម​ជាមួយ​សមាជិក គជប ពីរ​នាក់​ទៀត​មក​ពី​កូតា គណបក្ស​សង្រ្គោះ​ជាតិ បាន​លា​ឈប់​ពី​សមាជិក​និង​អនុប្រធាន​គណៈកម្មាធិការ​ជាតិ​រៀប​ចំ​ការ​បោះ​ឆ្នោត​ ហៅ​កាត់​ថា គជប ផ្លូវ​ការ​ហើយ ចាប់​ពី​ថ្ងៃ​ទី ២០ វិច្ឆិកា ឆ្នាំ​២០១៧​នេះ។ មូល​ហេតុ នៃ​ការ​លា​ឈប់​នេះ គឺ​ដោយ​សារ​តែ លោក​មិន​អាច​ក្បត់​ឆន្ទៈ​រាស្រ្ត ចូល​រួម​ជាមួយ​ស្ថាប័ន​នេះ ដើម្បី​បែង​ចែក​អាសនៈ​រដ្ឋសភា​អាណត្តិ​ទី​០៥ និង​អាសនៈ​ក្រុម​ប្រឹក្សា​ឃុំ​សង្កាត់​អាណត្តិ​ទី​០៤ ទៅ​ឲ្យ​គណបក្ស​នយោបាយ​ផ្សេងៗ ដែល​មិន​ទទួល​បាន​ការ​គាំទ្រ​ពី​ប្រជាពលរដ្ឋ។ ដូច្នេះ ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ RFI នៅ​រាត្រី​នេះ គឺ​លោក រ៉ុង ឈុន អតីត​សមាជិក​គណៈកម្មាធិការ​ជាតិ​រៀប​ចំ​ការ​បោះ​ឆ្នោត ហៅ​កាត់​ថា គ.ជ.ប តាម​ការ​សាក​សួរ​ពី​វ៉ា សំណព្វ។