ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ RFI នៅ​រាត្រី​នេះ គឺ​លោក សុន ឆ័យ ប្រធាន​ក្រុម​តំណាង​រាស្ត្រ​គណបក្ស​សង្គ្រោះ​ជាតិ។ គណបក្ស​សង្គ្រោះ​ជាតិ នៅ​ថ្ងៃទី ២៥ កញ្ញា​នេះ បានចាប់ផ្តើម​បើក​យុទ្ធនា​ការលើក​បដា​នៅ​​ទូទាំង​ប្រទេស ​ដើម្បី​​ទាមទារ​​ឲ្យ​​មាន​ការ​​ដោះ​​លែង​​​លោក ​កឹម សុខា ​ជា​បន្ទាន់​​និង​​ឥត​ល​ក្ខ័​ណ្ឌ។​ បើតាម​លោក សុន ឆ័យ នេះ​គឺជា​ការ​តស៊ូ​​មតិ​​ដោយ​អហិង្សា​និង​សន្តិវិធី ដើម្បី​ទាមទារ​ឲ្យ​មានការ​ដោះលែង​លោក កឹម សុខា ប្រធាន​​គណបក្ស​មកវិញ។ ទន្ទឹមគ្នានេះ លោក សុន ឆ័យ បាន​លើកឡើងថា ជំហរ​របស់​គណបក្ស​​សង្គ្រោះ​ជាតិ នៅតែ​ចង់​ឲ្យ​មានការ​ចរចារ ជាមួយ​គណបក្សកាន់អំណាច ដើម្បី​ឈាន​ទៅ​បញ្ចប់​ភាព​តឹង​តឹង​នៅពេលនេះ។ ទាក់ទង​នឹង​ព្រឹត្តិការណ៍​នៅ​ថ្ងៃស្អែក​នេះ​វិញ លោក ​សុន ឆ័យ បាន​អះអាងថា ក្រុម​អ្នកតំណាងរាស្ត្រ​គណបក្សប្រឆាំង នឹង​ទៅ​ចូលរួម​ស្តាប់​​សេចក្តីសម្រេច​របស់​តុលាការ​សាលាឧទ្ធរណ៍ លើ​ករណី​របស់លោក កឹម សុខា បើទោះបីជា​មិនមាន​វត្តមាន​របស់លោក កឹម សុខា ក្តី។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​នៅ​យប់​នេះ​គឺ​លោក អាត់ ធន់ ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា។ នៅ​ក្នុង​ពេល​រសៀល​ថ្ងៃ​អាទិត្យ​ទី ២៤ កញ្ញា នេះ ក្រុម​សហជីព​បាន​ឯក​ភាព​គ្នា​កំណត់​យក​ប្រាក់​ខែ​គោល​អប្បបរមា​ចំនួន ១៧៦.២៥ ដុល្លារ ដើម្បី​ដាក់​ចូល​ក្នុង​កិច្ច​ប្រជុំ​ត្រី​ភាគី ចាប់​ពី​ថ្ងៃ​ទី​២៥ កញ្ញា ស្អែក​នេះ​ត​ទៅ។ កិច្ច​ប្រជុំ​ក្រុម​ការងារ​ត្រី​ភាគី​រួម​មាន សហជីព និយោជក និង​ភាគី​រដ្ឋាភិបាល នឹង​ជួប​ប្រជុំ​គ្នា​ដើម្បី​ដាក់​រូបមន្ត​ប្រាក់​ខែ​គោល​រៀងៗ​ខ្លួន ក្នុង​ការ​កំណត់​ប្រាក់​ឈ្នួល​អប្បរមា​ផ្នែក​វាយនភណ្ឌ កាត់ដេរ និង​ផលិត​ផល​ស្បែក​ជើង​សម្រាប់​កម្មករ​កាត់​ដេរ​នៅ​ឆ្នាំ​២០១៨​ខាង​មុខ។

នៅ​ព្រឹក​មិញ​នេះ គណបក្ស​ហ្វ៊ុនស៊ិនប៉ិច​បានធ្វើ​សមាជ​វិសាមញ្ញ ដើម្បី​ផ្លាស់ប្តូរ​រូប​សញ្ញា​សម្គាល់​គណបក្ស​ជាថ្មី​ឲ្យ​ស្រប​នឹង​ច្បាប់​ស្តីពី​គណបក្សនយោបាយ។ ទម្រង់​នៃ​រូប​សញ្ញា​គណបក្ស​រាជានិយម​មួយ​នេះ ត្រូវបាន​រក្សាទុក​ដដែល​ដោយ​គ្រាន់តែ​ដក​រូប​សម្តេចក្រុមព្រះ​ដែលជា​ប្រធាន​គណបក្ស​ចេញ​តែប៉ុណ្ណោះ។ ចំពោះ​ការដក​រូប​សម្តេចក្រុមព្រះ​ចេញ​នេះ លោក​ញ៉េប ប៊ុនជិន ដែលជា​អ្នកនាំពាក្យ​គណបក្ស​ហ្វ៊ុនស៊ិនប៉ិច​បានបញ្ជាក់​ថា គណបក្ស​អាច​នឹង​ចំណាយ​ថវិកា​ប្រមាណ​ជា១០ម៉ឺន​ដុល្លារ​អាមេរិក ដើម្បី​ធ្វើ​ឲ្យ​បាន​រួចរាល់​នៅ​ទូទាំងប្រទេស។

ភ្ញៀវ​ទេសចរ​បរទេស ប្រមាណ​ជា​១៣​ភាគ​រយ បាន​ទិញ​ប័ណ្ណ​ចូល​ទស្សនា​អង្គរ​តាម​ប្រព័ន្ធ Credit Card ចាប់​តាំង​ពី​មាន​ការ​ដាក់​សេវា​នេះ​ឲ្យ​ដំណើរ​ការ​កាល​ពី​ដើម​ខែ​សីហា​កន្លង​ទៅ។ លោក លី សែ នាយក​ប្រតិបត្តិ​គ្រឹះ​ស្ថាន​អង្គរ​បាន​ឲ្យ​ដឹង​ថា ការ​លក់​ប័ណ្ណ​ចូល​ទស្សនា​អង្គរ​តាម​រយៈ​សេវា​ថ្មី​នេះ បង្កើត​ភាព​ងាយ​ស្រួល​និង​មាន​ការ​គាំទ្រ​ជា​ទូ​ទៅ​ពី​សំណាក់​ទេសចរ គ្រាន់​តែ​ការ​ផ្សព្វ​ផ្សាយ​នៅ​មាន​កំរិត​នៅ​ឡើយ។ ដោយ​ឡែក​ការ​លក់​ប័ណ្ណ​ចូល​ទស្សនា​អង្គរ​នេះ នឹង​ត្រូវ​ធ្វើ​ឡើង​ដែរ​តាម​ប្រព័ន្ធ​អន​ឡាញ ហើយ​ប្រព័ន្ធ​នេះ​នឹង​ដំណើរ​ការ​ចាប់​ពី​ដើម​ឆ្នាំ​២០១៨​ត​ទៅ។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ RFI នៅ​រាត្រី​នេះ គឺ​លោក​នាយ​ឧត្តមសេនីយ៍ គៀត ច័ន្ទថារិទ្ធ អគ្គ​ស្នងការ​រង​នៃ​អគ្គ​ស្នងការ​ដ្ឋាន​នគរបាល​ជាតិ​និង​ជា​អ្នក​នាំ​ពាក្យ។ ឆ្លើយ​តប​នឹង​សំណួរ​របស់​វិទ្យុ​បារាំង​អន្តរជាតិ RFI លោក​នាយ​ឧត្តមសេនីយ៍​បាន​ពន្យល់​ពី​ករណី​បង្កៃ​គ្រាប់​បែក​នៅ​ក្នុង​មន្ទីរពេទ្យ​ជោរ៉ៃ ដែល​ជា​មន្ទីរពេទ្យ​វៀតណាម​ប្រចាំ​នៅ​ក្នុង​ទីក្រុង​ភ្នំពេញ​កាល​ពី​យប់​ថ្ងៃ​ទី​១៩​កញ្ញា​នោះ​ថា មិន​មែន​ជា​ករណី​ប៉ុន​ប៉ង​ធ្វើ​ឲ្យ​ផ្ទុះ​នៅ​ក្នុង​មន្ទីរពេទ្យ​នេះ​ទេ។ បើ​តាម​លោក​នាយ​ឧត្តមសេនីយ៍ គ្រាប់​បែក​ទាំង​ពីរ​គ្រាប់​នោះ ផលិត​នៅ​ក្នុង​ប្រទេស​ចិន ត្រូវ​បាន​ជន​សង្ស័យ​លាក់​ទុក​ក្នុង​កែប​ម៉ូតូ ដើម្បី​យក​ទៅ​ឲ្យ​បង​ថ្លៃ​នៅ​ក្នុង​ខេត្ត​កំពង់ស្ពឺ។ យ៉ាង​ណា​ក្តី​ ករណី​នេះ អាជ្ញាធរ​កំពុង​បើក​ការ​ស៊ើប​អង្កេត​រក​អ្នក​ពាក់​ព័ន្ធ​បន្ថែម​ទៀត។ ទាក់​ទង​ករណី ផាវ​គ្រាប់​បែក ដែល​កំពុង​សម្លាប់​ក្មេង​នៅ​ក្នុង​ទីក្រុង​ភ្នំពេញ, ខេត្ត​កណ្តាល និង​ខេត្ត​បន្ទាយមានជ័យ​វិញ អាជ្ញាធរ​បាន​ចេញ​បញ្ជា​ឲ្យ​បិទ​ការ​នាំ​ចូល​ពី​ប្រទេស​ថៃ​ជាបន្ទាន់។

សម្តេច​ឧត្តម​ចរិយា ​ឆឹង ប៊ុនឈា ​សមាជិក​ថេរសភា​សង្ឃ​និង​ជា​អគ្គនាយក​រង​ពុទ្ធិកៈ​សិក្សា​គណៈ​មហានិកាយ ​បាន​មាន​សង្ឃ​ដីការ​ថា ​ការ​ធ្វើ​បុណ្យ​ភ្ជុំបិណ្ឌ​នៅ​ឆ្នាំ​នេះ​ប្រព្រឹត្ត​ទៅ​បាន​រលូន​ ដោយសារ​ទាំង​ពុទ្ធ​បរិស័ទ​និង​ព្រះសង្ឃ ​រួមទាំង​សមត្ថកិច្ច​ផងដែរ​ មាន​ការ​រៀបចំ​បាន​ល្អ​។ សម្តេច​ ឆឹង ប៊ុនឈា ​មាន​សង្ឃដី​ការ​បញ្ជាក់​ថា ​សន្តិភាព​សំខាន់​ណាស់ ក្នុង​ការ​ប្រតិបត្តិ​បុណ្យទាន​ហើយ​ព្រះអង្គ​អំពាវនាវ​ឲ្យ​អ្នក​ពាក់ព័ន្ធ​ថែ​រក្សា​វា​ឲ្យ​បាន ​និង​មាន​សាមគ្គី​ធម៌​រវាង​គ្នា ​បើទោះណា​ជា​មាន​ការ​ខ្វែង​គំនិត​គ្នា​រវាង​ខ្មែរ​យ៉ាងណា​ក៏ដោយ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរ​ជាតិ​នៅ​រាត្រី​ថ្ងៃទី១៩ ខែ​កញ្ញា​នេះ គឺ​ លោក​ឧត្តម​សេនីយ៍​ឯក រុន រ័ត្នវាសនា ប្រធាន​នាយកដ្ឋាន​នគរបាល​ចរាចរណ៍ និង​សណ្តាប់​ធ្នាប់​សាធារណៈ។ ...

ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ RFI នៅ​រាត្រី​នេះ គឺ​លោក ហង់ ជួនណា​រ៉ុ​ន រដ្ឋមន្ត្រីក្រសួង​អប់រំ យុវជន និង​កីឡា។ ឆ្លើយតប​នឹង​សំណួរ​របស់​វិទ្យុ​បារាំង​អន្តរជាតិ លោក ហង់ ជួនណា​រ៉ុ​ន បាន​ឲ្យ​ដឹងថា ក្រោម​នយោបាយ​កំណែរ​ទម្រង់​លើ​វិស័យ​អប់រំ ក្រសួង​គ្រោង​នឹងដាក់​ឲ្យ​សាកល្បង​ចំពោះ​ការផ្លាស់ប្តូរ​ម៉ោង​បង្រៀន​របស់លោក​គ្រូ​អ្នកគ្រូ​នៅ​ថ្នាក់បឋមសិក្សា​ពី​បង្រៀន​មួយពេល​ទៅជា​បង្រៀន​ពេញ​មួយថ្ងៃ​វិញ។ ការសាកល្បង​ជំហាន​ដំបូង នឹងធ្វើ​ឡើង​នៅ​សាលាបឋមសិក្សា​ចំនួន៣ នៅក្នុង​ខេត្តសៀមរាប និង​ខេត្តកំពង់ចាម ដោយ​បន្ថែម​ប្រាក់ខែ​ដល់​គ្រូបង្រៀន​ប្រមាណ​ជា៦០%។ ការណ៍​នេះ គឺ​ដើម្បី​ឆ្លើយតប​ទៅនឹង​របាយការណ៍​ថា សិស្ស​ថ្នាក់​ទី៦ប្រមាណ​ជា៣០ទៅ៤០% មិនទាន់​ចេះ​អាន​ភាសា​ខ្មែរ។ ដោយឡែក​លើ​លទ្ធផល​នៃ​ការប្រលង​បាក់​ឌុបថ្មីៗនេះ​វិញ លោក ហង់ ជួនណា​រ៉ុ​ន បាន​សាទរ​ចំពោះ​សិស្ស​ដែល​ប្រលង​ជាប់​បាន​និទ្ទេស A កាន់តែ​កើនឡើង​ពី​ឆ្នាំទៅ​មួយឆ្នាំ។ ហើយ​ដើម្បី​រក្សា​និរន្តរភាព​នេះ ក្រសួង​គ្រោង​នឹង​ស្នើ​បង្កើត​នាយកដ្ឋាន​ប្រលង​ដាច់ដោយឡែក​មួយ ដើម្បី​ពង្រឹង​ការ​ប្រលង​​បាក់​ឌុប​នៅ​ឆ្នាំក្រោយ។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​នៅ​យប់​នេះ​គឺ​លោក អាត់ ធន់ ប្រធាន​សម្ព័ន្ធ​សហជីព​ប្រ​ជា​ធិបតេយ្យ​កម្មករ​កាត់​ដេរ​កម្ពុជា។ នៅ​ថ្ងៃ​ទី​២៥​ខែ​កញ្ញា​ខាង​មុន​នេះ ក្រុម​ការងារ​ត្រី​ភាគី​រួម​មាន សហជីព និយោជក់ និង​ភាគី​រដ្ឋាភិបាល នឹង​ជួប​ជជែក​គ្នា​ដើម្បី​ដាក់​រូប​មន្តប្រាក់​ខែ​គោល​រៀងៗ​ខ្លួន ក្នុង​ការ​កំណត់​ប្រាក់​ឈ្នួល​អប្បរមា​ផ្នែក​វាយ​នភណ្ឌ កាត់​ដេរនិង​ផលិត​ស្បែក​ជើង​សម្រាប់​ឆ្នាំ​២០១៨។ បើតាម លោក អាត់ ធន់ ការ​ជជែក​បញ្ហាប្រាក់​ខែ​កម្មករ​នៅ​ឆ្នាំនេះ នឹង​ទាម​ទារ​ឲ្យ​បញ្ចុះ​តម្លៃ​ទឹក និង​ភ្លើង​នៅ​ទូទាំង​ប្រទេស។

ថ្ងៃនេះ កម្លាំង​នគរបាល​អន្ដោប្រវេសន៍​បាន​ចុះ​ឃាត់ខ្លួន​ជនជាតិ​ចិន៥០នាក់​បន្ថែមទៀត​ដែល​ពាក់ព័ន្ធ​ករណី​បោក​លុយ​តាម​ទូរស័ព្ទ និង​ចាប់ជំរិត​តាម​ប្រព័ន្ធ​Internet។ នេះ​មិនមែនជា​លើក​ទី១ សម្រាប់​អាជ្ញាធរ​ខ្មែរ​ព្រោះថា​កន្លងមក​អាជ្ញាធរ​ធ្លាប់បាន​ឃាត់ខ្លួន​និង​បញ្ជូន​ជនជាតិ​ចិន​ជាច្រើន​នាក់​ទៅ​កាត់ទោស​នៅក្នុង​ប្រទេស​កំណើត​វិញ។ ថ្វីបើ​ករណី​ចាប់ជំរិត​បែបនេះ មិនទាន់​កើតមាន​ទូលំទូលាយ​លើ​ជនជាតិខ្មែរ​ក៏ដោយ ក៏ប៉ុន្តែ​លោក​អ៊ុក ហៃ​សិលា ប្រធាន​នាយកដ្ឋាន​ស៊ើបអង្កេត​និង​អនុវត្ត​នីតិវិធី​នៃ​អគ្គនាយកដ្ឋាន​អន្តោប្រវេសន៍​ដែលជា​ភ្ញៀវ​របស់​យើង​នៅ​រាត្រី​នេះ បាន​លើកទឹកចិត្ត​ដល់​ពលរដ្ឋ​ទាំងអស់​ដែល​ជួបប្រទះ​ការចាប់​ជំរិត​តាម​ប្រព័ន្ធ​អ៊ី​ន​ធើ​ណែ​ត​ឲ្យ​ប្តឹង​មក​សមត្ថកិច្ចភ្លាមៗ ដើម្បី​អាច​បង្ក្រាបបាន​ទាន់ពេលវេលា។ តទៅ​នេះ សូម​ស្តាប់​បទសម្ភាសន៍​រវាង​វណ្ណ សុគន្ធា និង លោក​អ៊ុក ហៃ​សីឡា៖