ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ RFI នៅ​រាត្រី​នេះ គឺ​លោកស្រី មូរ សុខ​ហួរ អនុប្រធាន​គណបក្ស​ស​ង្គ្រោះ​ជាតិ។ កាលពី​ថ្ងៃ​អង្គារ ទី០៣ តុលា កន្លងទៅ លោកស្រី មូរ សុខ​ហួរ បានសម្រេច​ចាកចេញ​ពី​ប្រទេស​កម្ពុជា​យ៉ាង​តក់ក្រហល់ ដោយ​លើក​ហេតុផល​ថា ស្ថានភាព​នៅក្នុង​ប្រទេស​កម្ពុជា​នាពេល​បច្ចុប្បន្ន​នេះ គ្រោះថ្នាក់​ខ្លាំងណាស់​សម្រាប់​មេដឹកនាំ​គណបក្ស​សង្គ្រោះ​ជាតិ។ លោកស្រី មូរ សុខ​ហួរ ពេលនេះ ដែល​កំពុង​ស្ថិតនៅ​ទីកន្លែង​មួយ​ដែលមាន​សុវត្ថិភាព​ហើយ បាន​ឆ្លៀត​ផ្តល់​បទសម្ភាសន៍​ដល់​វិទ្យុ​បារាំង​អន្តរជាតិ RFI ថា ការចាកចេញ​របស់លោក​ស្រី គឺ​ដើម្បី​គេច​ចេញពី​សេណារីយោ ដែល​គេច​ង់​បំបិតមាត់​គណបក្សប្រឆាំង នៅមុន​ការបោះឆ្នោត។ តែ​យ៉ាងណាក៏ដោយ លោកស្រី មូរ សុខ​ហួរ បាន​អះអាងថា លោកស្រី​មានបំណង​ចង់​វិល​ត្រលប់​វិញ ដើម្បី​ចូលរួម​ការបោះឆ្នោត​នាពេលខាងមុខ។

គ្រាប់បែក​គីមី​២​គ្រាប់ ​ដែល​ទំលាក់​ពីលើ​យន្តហោះ​អាមេរិក​នៅ​ចំណុច​ស្រុក​រមាសហែក ​ខេត្ត​ស្វាយរៀង ​ត្រូវបាន​រកឃើញ​ដោយ​ក្រុម​ការងារ​របស់​រដ្ឋាភិបាល​នៅ​ថ្ងៃ​អង្គារ​នេះ ​បន្ទាប់ពី​បើក​ប្រតិបត្តិការ​រយៈពេល​២​ថ្ងៃ​មក​នេះ​។ ​លោក​ទេស​រដ្ឋមន្ត្រី ​សេរី កុសល ​អនុប្រធាន​ទី​១​នៃ​អាជ្ញាធរ​មីន ​កម្ពុជា​ថ្លែងថា ​គ្រាប់បែក​ទី​១​នឹង​ត្រូវ​យកចេញ​ពី​ដី​នៅ​ថ្ងៃ​ស្អែក ​ដែល​មាន​ការ​ចូលរួម​ពី​អ្នក​ជំនាញការ​គ្រាប់បែក​មកពី​សហរដ្ឋ​អាមេរិក​។ ​លោក​សេរី កុសល​ បញ្ជាក់ថា​ការ​រំដោះ​គ្រាប់បែក​គីមី​ទាំងពីរ​គ្រាប់​ពី​ក្នុង​សាលារៀន ​និង​វត្ត​អារាម​នេះ ​នឹង​ត្រូវ​ចំណាយ​ពេល​១​សប្តាហ៍​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​នៅ​យប់​នេះ គឺ លោក​មៀច សុផាន់​ណា ប្រធាន​គណៈកម្មាធិការ​ប្រយុទ្ធ​ប្រឆាំង​ផលិត​ផល​ក្លែង​ក្លាយ។ នៅ​ថ្ងៃ​នេះ គណៈកម្មាធិការ​ប្រយុទ្ធ​ប្រឆាំង​ផលិត​ផល​ក្លែង​ក្លាយ បាន​កម្ទេច​ចោល​គ្រឿង​សំអាង​៨១​តោន ដែល​សមត្ថកិច្ច​ថា​ជា​របស់​ក្លែង​ក្លាយ។ លោក​សុផាន់​ណា បាន​ប៉ាន់​ស្មាន​ថា ការ​កម្ទេច​ចោល​គ្រឿង​សំអាង​នៅ​ថ្ងៃ​នេះ​ គឺ​មាន​ទឹក​ប្រាក់​ប្រហែល​ពី​៦​លាន​ដុល្លារ ទៅ​៧​លាន​ដុល្លារ​អាមេរិក។ លោក​មៀច សុផាន់​ណា​បាន​លើក​ឡើង​ថា ដើម្បី​លុប​បំបាត់​ផលិត​ផល​ក្លែង​ក្លាយ​ប្រជាពលរដ្ឋ និង​សមត្ថកិច្ច ត្រូវ​តែ​ចូល​រួម​ទាំង​អស់​គ្នាុំ។

ភ្ញៀវ​ប្រចាំ​ថ្ងៃ​របស់​វិទ្យុបារាំង​អន្តរជាតិ​នៅ​ថ្ងៃ​ចន្ទ ទី២ តុលា​នេះ គឺ​លោក​ហ៊ុន ម៉ាណែត កូនប្រុសច្បង​របស់​លោក​នាយករដ្ឋមន្រ្តី​ហ៊ុន សែន និង​ជា​ប្រធាន​អង្គភាព​ប្រឆាំង​ភេរវកម្ម​របស់​កម្ពុជា។ ឆ្លើយ​នឹង​សំណួរ​របស់​គួច គន្ធារ៉ា លោកហ៊ុន ម៉ាណែត​ដែល​កំពុង​បំពេញ​ទស្សនកិច្ច​នៅ​ក្នុង​ប្រទេស​បារាំង និង​ប្រទេស​មួយ​ចំនួន​ក្នុង​តំបន់​អឺរ៉ុប​បាន​បញ្ជាក់​ថា ការ​រៀបចំ​ជំនួប​ជាមួយ​ប្រជាជន​ខ្មែរ​នៅ​ក្រៅ​ប្រទេស​មិនមែន​ជា​ការ​លួចលាក់​ដើម្បី​គេច​ពី​បាតុករ​ទេ និង​ថា ការ​រៀបចំ​រចនាសម្ព័ន្ធ​បក្ស​នៅ​ក្រៅ​ប្រទេស ទោះបី​ជា​បក្ស​ណា​ក៏​ដោយ​ក៏​មិនមែន​ជា​ការ​បំបែកបំបាក់​សហគមន៍​ខ្មែរ​នៅ​បរទេស​ដែរ។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​នា​រាត្រី​នេះ​គឺ លោក សាំ ពិសិដ្ឋ ប្រធាន​មន្ទីរ​សាធារៈការ​និងដឹក​ជញ្ជូន​ប្រចាំ​រាជធានី​ភ្នំពេញ។ ជុំវិញ​ការ​ស្ទះ​ចរាចរណ៍​នៅ​ស្ពាន​ជ្រោយ​ចង្វារ​នៅ​ថ្ងៃអាទិត្យ​នេះ លោក សាំ ពិសិដ្ឋ អំពាវ​ឲ្យ​អ្នក​ធ្វើ​ដំណើរ​ជិះ​ពង្វាង​ផ្លូវ​ចំពោះ​រថយន្ត​ធុន​ធំ ។​ ដោយឡែក​អ្នក​ធ្វើ​ដំណើរ​អាច​ឆ្លង​កាត់​សាឡាង​ដែល ដំណើរ​ការ​ស្រាប់​នៅ​ម្ដុំ​សណ្ឋា​គារ​​សុខា​ត្រើយ​ម្ខាង។ លោក សាំ ពិសិដ្ឋ គូស​បញ្ជាក់​ថា នៅ​ពេល​ដែល​ស្ពាន​បាឡេ​សាងសង់​រួច​រាល់ នៅ​៦​ខែ​ខាង​មុខ​ទៀត​នោះ ម្ដុំ​ជ្រោយ​ចង្វារ​នឹង​លែង​ស្ទះ​ទៀត​ហើយ។

ភ្ញៀវ​ប្រចាំ​ថ្ងៃ​របស់​វិទ្យុបារាំង​អន្តរជាតិ​នា​ថ្ងៃ​សៅរ៍ ទី៣០ កញ្ញា​នេះ គឺ​លោក​ប្រាក់ សុខុន រដ្ឋមន្រ្តី​ការបរទេស និង​សហប្រតិបត្តិការ​អន្តរជាតិ។ ឆ្លើយ​នឹង​សំណួរ​របស់ គួច គន្ធារ៉ា លោក​ប្រាក់ សុខុន​បាន​បញ្ជាក់​ថា កម្ពុជា​មិនមែន​មិន​ចង់​ទទួល​យក​ជនជាតិ​ខ្លួន​ឯង​ដែល​អាមេរិក​ចាប់​បញ្ជូន​មក​ទេ តែ​សុំ​ឲ្យ​មាន​ការ​កែប្រែ​លើ​ចំណុច​ខ្លះ​នៅ​ក្នុង​កិច្ចព្រមព្រៀង​ដែល​មាន​ស្រាប់​ចុះ​ហត្ថលេខា​កាល​ពី​ឆ្នាំ ២០០២​រវាង​កម្ពុជា និង​អាមេរិក។

ក្រុម​ការងារ​បច្ចេកទេស​ត្រី​ភាគី​ស្តីពី​ការ​ពិភាក្សា​ប្រាក់​ឈ្នួល​អបប្បរមា​កម្មករ​និ​យោ​ជិ​ក ​នៃ​វិស័យ​វាយនភ័ណ្ឌ ​កាត់ដេរ​និង​ដេរ​ស្បែកជើង ​បាន​បើក​កិច្ច​ចរចា​មួយ​ឈុត​ទៀត​ហើយ​នៅ​ថ្ងៃ​សុក្រ​នេះ ​ដើម្បី​ស្វែងរក​ដំណោះស្រាយ​ផ្លូវ​កណ្តាល​មួយ​កំណត់​ច្បាស់លាស់​ពី​ការ​តម្លើង​ប្រាក់​ឈ្នួល​កម្មករ​កាត់ដេរ​នៅ​ឆ្នាំ​២០១៨​ខាងមុខ​។ ​​លោក ​​អាត់ ធន ​​ប្រធាន​សហភាព​ការងារ​កម្ពុជាបាន​ថ្លែងថា ​ការ​ចរចា​នៅតែ​មាន​សភាព​តានតឹង​ ដោយ​ភាគី​ទាំងពីរ​នៅតែ​មាន​គម្លាត​តួលេខ​ឆ្ងាយ​ពីគ្នា​ច្រើន​នៅឡើយ​។ ​លោក​ អាត់ ធន់ ​បញ្ជាក់ថា ​ភាគី​ទាំងអស់​នៅមាន​ឱកាស​ជជែក​គ្នា​១​លើក​ទៀត​មុន​នឹង​ឈានទៅ​សម្រេច​តួលេខ​ចុងក្រោយ​សម្រាប់​ឆ្នាំ២០១៨​។

លោក​ព្រឹទ្ធាចារ្យ វណ្ណ មូលីវណ្ណ បាន​ទទួល​មរណភាព នៅ​វេលា​ម៉ោង ៩ និង៤៥ នាទី ព្រឹក ថ្ងៃ ទី២៨ ខែកញ្ញានេះ ដោយ​ជរាពាធ​ក្នុង​ជន្មាយុ​៩១​ឆ្នាំ។ សព​របស់​បិតា​ស្ថាបនិក​ស្ថាបត្យកម្ម​ខ្មែររូបនេះ កំពុង​តម្កល់​ទុក​ធ្វើ​បុណ្យ​ទៅ​តាម​ប្រពៃណី ស្ថិត​នៅ​ក្នុង​ភូមិ​មណ្ឌល៣ សង្កាត់​ស្ល​ក្រាម ក្រុង​សៀម​រាប ខេត្ត​សៀមរាប។ មរណភាព​របស់​លោក វណ្ណ ម៉ូលីវណ្ណ បាន​ធ្វើ​ឲ្យ​ប្រជាពល​រដ្ឋខ្មែរ​សោក​ស្តាយ។ ដោយ​ឡែក​លោកស្រី ចៅ ស៊ុន​កិរិយា អ្នក​នាំ​ពាក្យ​អាជ្ញាធរ​ជាតិ​អប្សរា​និងជា​អតីត​ជំនួយ​ការ​ផ្ទាល់​របស់​លោក​ព្រឹទ្ធាចារ្យ​តាំង​ពី​ឆ្នាំ​១៩៩៥​មក​នោះ បាន​ចាត់​ទុក​មរណភាព​របស់​លោកវណ្ណ ម៉ូលីវណ្ណ ទៅ​នឹង​កម្ពុជា​បាត់​បង់​គ្រាប់​ពេជ្រ​ដ៏​មាន​តម្លៃ​មិន​អាច​កាត់​ថ្លៃ​បាន។ តើ​លោក វណ្ណ ម៉ូលីវណ្ណ ជា​មនុស្ស​ដែល​មាន​បុគ្គលិក​លក្ខណៈ​បែប​ណា?

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​នៅ​រាត្រី​នេះ​គឺ​លោក​អ៊ុត ឈន អ្នក​នាំ​ពាក្យ និង​ជា​សមាជិក​ក្រុម​ប្រឹក្សា​ធម្មនុញ្ញ។ ឆ្លើយ​នឹង​សំនួរ​របស់​វិទ្យុ​បារាំង​អន្តរជាតិ​លោក​លើក​ឡើង​ថា ទោះ​បី​មាន​តួ​នាទី​បក​ស្រាយ​រដ្ឋធម្មនុញ្ញ ឬ​ច្បាប់​ក៏​ដោយ លុះ​ត្រា​តែ​មាន​ការ​ស្នើ​ត្រឹម​ត្រូវ ទើប​ក្រុម​ប្រឹក្សា​ធម្មនុញ្ញ​បក​ស្រាយ​បាន មិន​មែន​ចេះ​តែ​បក​ស្រាយ​ច្បាប់​តាម​ការ​នឹក​ឃើញ​នោះ​ទេ។ រហូត​មក​ដល់​ពេល​នេះ រដ្ឋ​ធម្មនុញ្ញ​កម្ពុជា​បាន​ធ្វើ​វិសោធនកម្ម​ចំនួន​៨​ដង លោក​អ៊ុត ឈន បញ្ជាក់​ថា​វិសោធនកម្ម​៨​ដង វា​មិន​ច្រើន​ពេក​ទេ សម្រាប់​កម្ពុជា។

ស្ថានទូត​បារាំង​ប្រចាំ​នៅ​កម្ពុជា ​នៅ​ថ្ងៃ​សៅរ៍​ទី​៣០​កញ្ញា​ខាងមុខ​នេះ ​នឹង​បើកទ្វារ​ទទួល​ស្វាគមន៍​សាធារណជន​ចូល​ទស្សនា​ដោយ​សេរី​ជា​លើក​ទី​៣​នៅ​ក្នុង​ក្របខ័ណ្ឌ​នៃ​ទិវា​បេតិកភណ្ឌ​។ ​ឯកអគ្គរដ្ឋទូត​បារាំ​ង​ប្រចាំ​នៅ​កម្ពុជា ​លោកស្រី ​Eva Nguyen Binh ​បាន​ប្រាប់​វិទ្យុ​បារាំង​ RFI ​ថា ​ស្ថានទូត​បារាំង ​ដែលមាន​ទីធ្លា​បៃតង​ធំ​ជាង​គេ​នៅ​ភ្នំពេញ ​ដើមឈើ​ធំ​ៗ​ ត្រឈឹងត្រឈៃ ​ស្វាគមន៍​ដល់ ​ពលរដ្ឋ​ខ្មែរ​កាន់តែ​ច្រើន​ចូល​ទស្សនា​កន្លែង​ដ៏​ស្រស់ស្អាត ​ដោយ​តាម​ធម្មតា​ស្ថានទូត​បារាំង​គឺ​ជា​កន្លែង​ហាមឃាត់​​មិនអាច​ចូល​ទស្សនា​​សេរី​​ឡើយ​។