ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្ដរជាតិ​នា​ថ្ងៃ​នេះ​គឺ​លោក ជុន ច័ន្ទបុត្រ អនុប្រធាន​វិទ្យុ​អាស៊ី​សេរី ផ្សាយ​ជា​ភាសា​ខ្មែរ​។ នៅ​ក្នុង​បទ​សម្ភាស​ជាមួយ​វិទ្យុ​បារាំង លោក ជុន ច័ន្ទបុត្រ ...

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរ​ជាតិ​នៅ​យប់​នេះ​គឺ លោក សំ សុគង់ មេធាវី​មួយ​រូប ក្នុង​ចំណោម​មេធាវី​៧​រូប​របស់​លោក កឹម សុខា ប្រធាន​គណបក្ស​សង្គ្រោះ​ជាតិ​។ ជុំវិញ​សំណុំ​រឿង​លោក កឹម សុខា លោក​មេ​ធាវី សំ សុគង់ អះ​អាង​ថា មាន​ភស្ដុតាង​គ្រប់​គ្រាន់​ដើម្បី​ស្នើ​ឲ្យ​តុលាការ​ទម្លាក់​បទ​ចោទ និង​ផ្ដល់​ឲ្យ​​កូន​ក្ដី​របស់​លោក​អាច​ស្ថិត​នៅ​ក្រៅ​ឃុំ​បណ្ដោះ​អាសន្ន​បាន។ ​បើ​តាម​លោក សំ សុគង់ ក្រុម​មេ​ធាវី​ក៏​គ្រោង​នឹង​ស្នើ​តុលាការ​ស៊ើប​អង្កេត​បន្ថែម​ ដើម្បី​បង្ហាញ​ភាព​ស្អាត​ស្អំ​របស់​លោក កឹម សុខា ផង​ដែរ។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរ​ជាតិ​នៅ​យប់​នេះ​គឺ លោក សុខ ឥសាន អ្នក​នាំ​ពាក្យ​គណបក្ស​ប្រជាជន​។ ជុំវិញ​ការ​លើក​ឡើង​របស់​លោក William Heidt ឯកអគ្គរដ្ឋទូត​សហរដ្ឋ​​អាមេរិក​​ប្រចាំ​​នៅ​​កម្ពុ លោក សុខ ឥសាន ថា​បើ​មិន​ចង់​ឲ្យ​កម្ពុជា​ទាញ​អាមេរិក​ភ្ជាប់ជាមួយ​ករណី​លោក កឹម សុខា ទេ អាមេរិក​បង្ហាញ​ពី​ភាព​ស្អាត​ស្អំ​របស់​ខ្លួន​មក​ថា ស្ថិតនៅ​ពី​ក្រោយ​​ខ្នង​លោក កឹម សុខា មែន​ឬ​អត់? លោកកឹម សុខា ដែល​រដ្ឋាភិបាល​ចោទថា ទទួល​បាន​ការ​បណ្ដុះ​បណ្ដាល​ពី​អាមេរិក​ដើម្បី​ផ្ដួល​រលំ​របប​ដឹក​នាំ​បច្ចុប្បន្ន។

លោក​នាយក​រដ្ឋមន្ដ្រី ហ៊ុន សែន កំពុង​តែ​ធ្វើ​ដំណើរ​ទស្សនកិច្ច​នៅ​ប្រទេស​ចិន។ ឆ្លៀត​ក្នុង​ឱកាស​នេះ សឿង ភារៈ បាន​ជួប​សម្ភាស លោក​ឈាង វណ្ណារិទ្ធិ ជា​អ្នក​ស្រាវ​ជ្រាវ​ជាន់​ខ្ពស់​នៃ​វិទ្យាស្ថាន​ខ្មែរ​សម្រាប់​កិច្ច​សហប្រតិបត្តិការ និង​សន្តិភាព និង​ជា​អ្នក​សា្រវជ្រាវ​អំពី​តំបន់​អាស៊ី​ប៉ាស៊ីហ្វិក ដើម្បី​សាក​ល្បង​សិក្សា​ពី​ទំនាក់​ទំនង​រវាង​ចិន និង​កម្ពុជា។ ជា​ទំនាក់​ទំនង​ដៃ​គូ​យុទ្ធសាស្ត្រ​គ្រប់​ជ្រុង​ជ្រោយ ដែល​ចិន​បង្ហាញ​ជំហរ​គាំទ្រ​កម្ពុជា​លើ​គ្រប់​វិស័យ បើ​ទោះ​បី​ជា​ប្រទេស​មួយ​ចំនួន​សម្ដែង​ក្ដី​ព្រួយ​បារម្ភ​ក៏​ដោយ។

ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ RFI នៅ​រាត្រី​នេះ គឺ​លោកស្រី មួរ សុខ​ហួរ អនុ​ប្រធាន​​​គណបក្ស​ស​ង្គ្រោះ​ជាតិ។​ កាលពី​ព្រឹក​ថ្ងៃទី ១១ កញ្ញា ក្រុម​អ្នកតំណាងរាស្ត្រ​គណបក្ស​​សង្គ្រោះ​ជាតិ១៧រូប ដែលមាន​ទាំង​សមាជិក​ព្រឹទ្ធសភា​ផង បានធ្វើ​ដំណើរ​ទៅ​កាន់​​ពន្ធនាគារ (ម3) ត្រពាំង​ផ្លុ​ង ដើម្បី​សួរសុខទុក្ខ​លោក កឹម សុខា ប៉ុន្តែ​ត្រូវបាន​រារាំង​ដោយ​​​អាជ្ញាធរ​កម្ពុជា។ យ៉ាងណាក្តី ក្រុម​សមាជិកសភា​គណបក្សប្រឆាំង​ដឹកនាំ​ដោយ​លោក​​ស្រី មួរ សុខ​ហួរ បានធ្វើ​សន្និសីទកាសែត​ខ្លី​មួយ​ដោយបាន​បញ្ជាក់​ជំហរ​ថា លោក កឹម សុខា នៅតែ​ជា​ប្រធាន​គណបក្ស ហើយ​ថា គណបក្ស​នេះ នឹងមិន​ចូលរួម​ការ​បោះ​ឆ្នោត​​ជាតិ​នៅ​ឆ្នាំ ២០១៨ ទេ បើ​ការបោះឆ្នោតជាតិ​មិន​ប្រព្រឹត្ត​ទៅដោយ​សេរី ត្រឹមត្រូវ និង​​​យុត្តិធម៌ ពិសេស​បើ​មិនមាន​ការដោះលែង​លោក កឹម សុខា។

លទ្ធផល​ប្រឡង​បាក់​ឌុប​នៅក្នុង​ឆ្នាំ២០១៧ នេះ ត្រូវបាន​ក្រសួង​អប់រំ​ប្រកាស​ឲ្យ​ដឹង​ហើយ​នៅ​រសៀល​នេះ សម្រាប់​ក្រុងភ្នំពេញ និង​ខេត្តកណ្តាល។ ចំណែកឯ​ខេត្ត​ដទៃទៀត​នៅ​ទូ​ប្រទេស នឹង​ប្រកាស​នៅ​ថ្ងៃទី១១ កញ្ញា ស្អែក​នេះ។ អ្វី​ជា​កត់សម្គាល់ បាក់​ឌុប​នៅ​ឆ្នាំនេះ មាន​សិស្ស​ចំនួន៤២៤នាក់ បាន​ជាប់​និទ្ទេស​A ជា​ចំនួន​មួយ​មាន​កើនឡើង​ជាង​ឆ្នាំមុន។ លោក​សន ជ័យ នាយក​ប្រតិបត្តិ​គណនេយ្យភាព​សង្គម​កម្ពុ​ជា ដែលជា​ភ្ញៀវ​របស់​យើង​នៅ​រាត្រី​នេះ បាន​លើកឡើងថា ចំនួន​សិស្ស​ជាប់​និទ្ទេស A ច្រើន​បែបនេះ គឺ​បាន​បង្ហាញថា សិស្ស​នុ​សិស្ស​កម្ពុជា​បាន​ខិតខំ​រៀនសូត្រ​ជាង​មុន។ តទៅ​នេះ សូម​ស្ដាប់​បទសម្ភាសន៍​រវាង​វណ្ណ សុគន្ធា និង​លោក​សន ជ័យ៖

ប្រធាន​គម្រោង​ស្ដី​ពី​ការ​សិក្សា​អំពើ​ប្រល័យ​ពូជសាសន៍​នៅ​កម្ពុជា នៃ​មជ្ឈមណ្ឌល​ឯកសារ​កម្ពុជា លោក ផេង ពង្សរ៉ាស៊ី បាន​បញ្ជាក់​ថា យុវជន​កម្ពុជា​អាច​កាន់​តែ​មាន​ភាព​ងាយ​ស្រួល​ក្នុង​ការ​សិក្សា​អំពី​របប​ខ្មែរ​ក្រហម។ លោក​បន្ដ​ថា អ្នក​សិក្សា​ទាំង​ឡាយ​គ្រាន់​តែ​ចូល​ទៅ​កាន់​គេហទំព័រ​ www.khmerrougehistory.org ដែល​ជា​គេហទំព័រ​ថ្មី​របស់ DC-Cam។ ប្រធាន​គម្រោង​រូប​នេះ បញ្ជាក់​ថា ឯកសារ​ រូប​ថត និង​វីឌីអូ ទាក់​ទង​របប​ខ្មែរ​ក្រហម​យ៉ាង​ច្រើន ត្រូវ​បាន​តម្កល់​នៅ​ក្នុង​គេហទំព័រ​ថ្មី​នេះ។

ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ RFI នៅ​រាត្រី​នេះ គឺ​លោក ហង្ស ពុទ្ធា អ្នកនាំពាក្យ​គណៈកម្មាធិការ​ជាតិ​រៀបចំ​ការបោះឆ្នោត ហៅ​កាត់​ថា គ.ជ.ប។ ឆ្លើយតប​នឹង​សំណួររ​បស់​ RFI លោក ហង្ស ពុទ្ធា បានទទួល​ស្គា​ល់ពី​ការថយចុះ​នៃ​ចំនួន​អ្នក​ទៅ​ចុះឈ្មោះ​បោះ​ឆ្នោត​ថ្មី គិត​ត្រឹម​រយៈពេល៧ថ្ងៃ​មកនេះ។ ប៉ុន្តែ​លោក​បាន​លើកឡើងថា ការ​បាន​ថយចុះ​មិនមែន​មានន័យថា ចំនួន​សរុប​នៃ​អ្នក​ទៅ​ចុះឈ្មោះ​បោះឆ្នោត​ថយចុះ​នោះទេ បើ​ធៀប​នឹង​ចំនួន​អ្នក​ទៅ​ចុះឈ្មោះ​បោះឆ្នោត កាលពី​ឆ្នាំ២០១។ សូមបញ្ជាក់ថា គិត​ត្រឹម​រយៈពេល​៧ថ្ងៃ​មកនេះ មាន​ប្រជាពលរដ្ឋ​ប្រមាណ៤ម៉ឺន៣ពាន់​នាក់ ស្មើនឹង២.៦៧% ប៉ុណ្ណោះ ​ដែល​បាន​ចេញទៅ​ចុះឈ្មោះ​បោះឆ្នោត​នៅ​ទូទាំងប្រទេស ក្នុងចំណោម​ប្រជាពលរដ្ឋ​​ដែល​ត្រូវ​ចុះឈ្មោះ​ថ្មី​ក្នុង​ចំនួន​ប៉ាន់ស្មាន ១លាន៤សែន​នាក់។ យ៉ាងណាក៏ដោយ លោក ហង្ស ពុទ្ធា បាន​អំពាវនាវ​ឲ្យ​ប្រជាពលរដ្ឋ​ឲ្យ​ទៅ​ចុះឈ្មោះ ចាប់ពី​ថ្ងៃទី ១កញ្ញា រហូតដល់​ថ្ងៃទី ០៩ វិច្ឆិកា​ខាងមុខ។

ថ្លែង​ក្នុង​នាម​ជា​ភ្ញៀវ​ប្រចាំ​ថ្ងៃ​របស់​វិទ្យុ​បារាំង​នៅ​យប់​មិញ​នេះ​ ​លោក ហុង លីម តំណាង​រាស្ត្រ​ខ្មែរ​ប្រចាំ​នៅអូស្រ្តាលីជឿ​ជាក់​ថា បាតុ​កម្ម​នៅ​ក្រៅ​ប្រទេស នឹង​មានឥទ្ធិពល​មក​លើ​រដ្ឋាភិបាល​ក្រុង​ភ្នំពេញ​តាម​រយៈ​ការ​មើល​ឃើញ​ពី​សហគមន៍​អន្តរជាតិ។ សូមបញ្ជាក់ថា លោក ហុង លីម និង​ពលរដ្ឋ​ខ្មែរ​រស់​នៅ​អូស្ត្រាលី​នឹង​ធ្វើ​បាតុកម្ម​នៅ​ថ្ងៃសៅរ៍​ខាង​មុន​នេះ ដើម្បី​ទទូច​ឲ្យ​រដ្ឋាភិបាល​ក្រុង​ភ្នំពេញ​ដោះ​លែង​លោក​ កឹម សុខា។ សូម​ស្ដាប់​បទ​សម្ភាស​រវាង អេង គីមហុង និង​លោក ហុង លីម ដូច​ត​ទៅ

បន្ទាប់ពី​មាន​ការ​​ចាប់​ខ្លួន​​លោក​​កឹម សុខា ​ ប្រធាន​គណបក្ស​សង្គ្រោះ​ជាតិ ​កាល​ពី​ថ្ងៃ​ទី​៣​ខែ​កញ្ញា​​ ដោយ​មានការ​ចោទថា​ជាប់​ពាក់ព័ន្ធ​នឹង​អំពើ​ក្បត់ជាតិ ​ប្រទេស​លោក​ខាងលិច​ក៏ដូច​ជា​អង្គការ​អន្តរជាតិ​មួយ​ចំនួន​បាន​បញ្ចេញ​ប្រតិកម្ម​ព្រោងព្រាធ​ ខ្លះ​សម្តែង​ការ​សោកស្តាយ​ ហើយ​ខ្លះទៀត​ទាមទារ​ឲ្យ​មាន​ការ​ដោះលែង​លោក ​កឹម សុខា​ ដោយ​ឥត​លក្ខខណ្ឌ​។ ​ក៏​ប៉ុន្តែ​លោក​សុខ ឥសាន ​អ្នក​នាំពាក្យ​គណបក្ស​ប្រជាជន​កម្ពុជា​ថ្លែង​ប្រាប់​វិទ្យុ​បារាំង ​RFI ​ថា ​ប្រតិកម្ម​​របស់​ប្រទេស​និង​អង្គការ​អន្តរជាតិ​ទាំងនោះ​ មិនមាន​ឥទ្ធិពល​មក​លើ​រដ្ឋាភិបាល​កម្ពុជា​បច្ចុប្បន្ន​នោះ​ទេ​។