Á þessum fordæmalausu tímum hafa margir þurft að temja sér á mettíma nútímatækni og vinna að heiman, fjarkennsla og fjarfundir eru nú daglegt brauð, fólk er að stjórna í gegnum fjarbúnað og víst er þetta hefur verið heilmikil áskorun fyrir marga. Hvernig heldur maður athygli nemenda við fjarkennslu og hvernig kemur maður málum sínum á framfæri við svona aðstæður? Röddin er vöðvi sálarinnar segir Þórey Sigþórsdóttir leikkona og við ræddum við hana í þættinum í dag um mikilvægi þess að hafa röddina í lagi og kunna að beita henni til að ná áhrifum, vernda og hafa betri skilning á henni sem atvinnutæki.

Við sögðum frá því í upphafi þáttar á föstudaginn að þá voru liðin þrjátíu ár frá því að Hubblessjónaukanum var skotið á loft með geimferjunni Discovery hinn. Hann er spegilssjónauki en mælitæki hans geta numið vítt svið rafsegulrófsins. Sjónaukinn er samstarfsverkefni NASA og ESA og er nefndur eftir bandaríska stjörnufræðingnum Edwin Hubble sem gerði eina mestu vísindauppgötvun 20. aldar þegar hann uppgötvaði að alheimurinn er að þenjast út. En hvað gerir þessi sjónauki og hvað færir hann okkur jarðarbúum. Sævar Helgi Bragason, Stjörnu-Sævar, kom í þáttinn og sagði okkur frá þessum merkilega sjónauka og mikilvægi hans.

Lesandi vikunnar í þetta sinn var Alexandra Briem, hún er varaborgarfulltrúi Pírata í Reykjavík. Við fengum að vita hvaða bækur eru á náttborðinu hjá henni, hvað hún hefur verið að lesa undanfarið og hvaða bækur og höfundar hafa haft áhrif á hana í gegnum tíðina.

UMSJÓN GUÐRÚN GUNNARSDÓTTIR OG GUNNAR HANSSON