جەواد رەحیم ساعیدی، ئەندامی هاوپەیمانیی فەتح لەبارەی رۆڵی نەتەوە یەکگرتووەکانەوە لە هەڵبژاردنەکانی عێراقدا بە رادیۆی رووداوی راگەیاند: "ئێمە بەڵگەکانمان پێشکەشی جێنین پلاسخارت، نوێنەرەی نەتەوە یەکگرتووەکان کرد، بەڵام ئەو بێلایەن نییە و خۆی بە لایەنێک دەزانێت. ئەمەیش بە بەڵگەی ئەوەی لەو راپۆرتەی پێشکەشی ئەنجوومەنی ئاسایشی کرد تەنیا باسی تێبینییەکانی لیستە براوەکانی کرد. تەنانەت ئەو هەڕەشەی کرد وەک ئەوەی بڵێیت سەرپەرشتیاری عێراق بێت و عێراق ملکەچی ویستی ئەو بێت."

کەیفی مستەفا، بەڕێوەبەری گشتیی شوێنەواری هەرێمی کوردستان بە رادیۆی رووداوی راگەیاند: "تاوەکو ئێستا نزیکەی پێنج هەزار و 800 ناوچەی شوێنەواری لای ئێمە تۆمار کراون. ئەگەر تەواوی هەرێمی کوردستان رووپێو بکەین، پێموایە ژمارەی شوێنەوارەکان بگاتە نزیکەی 10 هەزار دانە."

کۆچبەرێک: گەنجەکانی نێو کەمپی بێڵارووس بە زۆڕی دەبردرێنە سەر سنوور ... 13 کەس گیانیان لەدەستداوە

#رێیاسۆر لەگەڵ کاوار ساڵح

Koçberek: Ciwanên nav kempa Bêlarûs bi zorê dibin ser sinor... 13 kesî cane xwe ji destda

#Rêyasor li gel Kawar Salih

حاتەم حەمید، بەڕێوەبەری گشتیی ناوەندی نیشتمانی بۆ بەڕێوەبردنی سەرچاوە ئاوییەکانی عێراق بە رادیۆی رووداوی راگەیاند: "بەهۆی گرتنەوەی ئاوەوە لەلایەن تورکیا و ئێرانەوە ساڵی رابردوو پلانی کشتوکاڵمان بە رێژەی 50٪ تێکچوو. لە شەتولعەرەب بەهۆی کەمبوونەوەی ئاوەوە زەویی شۆرەکات زیاد بووە."

جەبار یاوەر، ئەمینداری گشتیی وەزارەتی پێشمەرگە بە رادیۆی رووداوی راگەیاند: "دەتوانم بڵێم هەموو جارێک کە داعش دێن پەلاماری هێزەکانی پێشمەرگە دەدەن، لەژێر دەسەڵاتی هێزەکانی سوپای عێراقەوە دێن. دوای ئەوەی کارەکەیشیان دەکەن هەر بۆ ئەو ناوچانەی ژێر دەسەلاتی سوپای عێراق دەگەڕێنەوە، چونکە هێزەکانی سوپای عێراق تەنیا ئەو ناوچانە دەپارێزن کە تێیاندا جێگیرن."

د. رەهێڵ فەرەیدوون، بریکاری وەزارەتی تەندروستیی حکومەتی هەرێمی کوردستان بە رادیۆی رووداوی راگەیاند: "رێکخراوی تەندروستیی جیهانی پێشتر بڕیاری دابوو کە تاوەکو کۆتایی ساڵی 2021 20٪ـی کۆمەڵگەکان ڤاکسین لە خۆیان بدەن، دوایی بڕیاری گۆڕی و کردی بە 40٪. بە دڵنیاییەوە ئێمە ناگەینە ئەو رێژەیە. ئێمە تاوەکو ئێستا لەو خەڵکانەی جارێک خۆیان کوتاوە گەیشتووینەتە 14٪ی هەموو کۆمەڵگە و لەوانەیشی کە دوو جار خۆیان کوتاوە گەیشتووینەتە 9٪."

رەهێڵ عەبدولواحید، کۆچبەرێکی خەڵکی سلێمانییە کە لە بێلاڕووسەوە هەوڵی داوە بچێتە ئەوروپا و دەرنەچووە، ئێستا گەڕاوەتەوە هەرێمی کوردستان. ئەو چەند جارێک هەوڵی داوە بچێتە پۆڵەندا بۆ ئەوەی لەوێوە بە یەکێک لە وڵاتانی ئەڵمانیا یان بەریتانیا بگات و دەڵێت لە یەکێک لە جارەکاندا کە لەناو قوڕاوێکدا بوون باوکێک منداڵەکەی خۆی فڕێ داوە و گوتوویەتی: "ناتوانم بەرپرسیارێتیی هەڵبگرم."

هاوکات رەهێڵ عەبدولواحید باس لە سەرەتای کۆچی بەکۆمەڵی کۆچبەران، کە بە لێشاوەکە ناسراوە، لە بێلاڕووسەوە بۆ سنووری پۆڵەندا دەکات کە ئەو پێیوایە وڵاتێک بۆ بەرژەوەندیی خۆی بەکاریهێناوە.

کەریم سڵێمان، بریکاری وەزارەتی کشتوکاڵ و سەرچاوەکانی ئاوی حکومەتی هەرێمی کوردستان بە رادیۆی رووداوی راگەیاند: "ئێستا کشتوکاڵیش بەهۆی کەمبارانییەوە کەمی کردووە، چونکە جووتیارانمان چاوەڕێی بارانن وو بۆ کشتوکاڵەکەیان پشتی بە باراناو دەبەستن. باشترە جووتیاران ئەو بەروبوومانە بچێنن کە ئاوی کەمتریان دەوێت."

ئەکرەم ئەحمەد، بەڕێوەبەری بەنداو و کۆگاکانی ئاو لە هەرێمی کوردستان بە رادیۆی رووداوی راگەیاند: "وشکەساڵی کاریگەرییەکی زۆری لەسەر بەنداوەکانی هەرێمی کوردستان هەبوو و ئێستایش بەردەوامە؛ ئاو لە بەنداوەکاندا زۆر کەمی کردووە. ئەمساڵیش هیچ دڵخۆشییەک نییە، چونکە کاریگەریی گۆڕانی کەشوهەوا وایکردووە کە پێشبینییەکان دەرناکەون."

بەڕێوەبەری بەنداو و کۆگاکانی ئاو ئاماژەی بەوە دا، ئەگەر ئەمساڵیش وشکەساڵییەکە وەک پار بێت مەترسیی ئەوە هەیە کە ئەو شوێنانەی ئاویان لێبووە چۆڵ بکرێن و گوندەکان چۆڵ ببن و کۆچکردن رووبدات. بەوەیش بەروبوومی کشتوکاڵی کەم دەبێت. 

شاخەوان عەبدوڵڵا، بەربژێری سەرکەوتووی پارتی دیموکراتی کوردستان لە کەرکووک بۆ پەرلەمانی بەغدا بە رادیۆی رووداوی راگەیاند: "من سێ رۆژ لەمەوپێش لەسەر ئەم کێشەیەی چیمەن لەگەڵ فەرماندەی ئۆپەراسیۆنەکاندا قسەم کرد. هەبوونی هێزی ئەمنی لە هەر شوێنێک ئاساییە، بەڵام ئەو کاتە نائاساییە کە بە خەڵکی گوندەکە بڵێت تاپۆمان بۆ بهێنن، ئەگەر تاپۆ نەهێنن ئەوە زیادەڕۆن و زەویی تۆ نییە. ئەم کارە دەستوەردانە لە کاری حکومەتدا، بە تایبەتی ئەم ناوچانە کێشەلەسەرن و هێشتا بابەتی تاپۆیان یەکلایی نەبووەتەوە."

شاخەوان عەبدوڵڵا گوتیشی: "دوای قسەکردنم لەگەڵ فەرماندەی ئۆپەراسیۆنەکانی کەرکووک، ئەو دوای کرد کە ئەو کارە نەکرێت. بەڵام ئەمڕۆ لەلایەن ئەفسەرێکی سوپاوە ئەم کارەیان پێکراوە. دیسان پێش کاژێرێک قسەم لەگەڵ فەرماندەی ئۆپەراسیۆنەکان کرد و پێمگوت: 'فەرمانەکەی تۆ جێبەجێ نەکراوە.' گوتی: 'پێیانبڵێن هیچ کەسێک تاپۆیان نەداتێ و، ئەگەر جارێکی دیکە داوای تاپۆیان لێ بکەن لێپێچینەوە دەکەم. ئەم هێزە تەنیا بۆ بابەتی ئەمنی لەوێن.' "