د. شەونم زرار، ئەندامی سەرکردایەتیی یەکێتیی نیشتمانیی کوردستان بە رادیۆی رووداوی راگەیاند: "چوونی شاندی یەکێتی بۆ بەغدا تەنیا بۆ هەڵسەنگاندنی رەوشەکەیە، ئەگینا گفتوگۆی جیددیی لەگەڵ لایەنە عێراقییەکاندا نەکردووە. پێش یەکێتییش شاندی پارتی چووە. یەکێتی سەقامگیریی عێراقی بە لاوە گرنگە و دەیەوێت کورد هاوبەشێکی راستەقینە بێت نەک تەنیا بەشداریکەر بێت. خۆزگە شاندی یەکێتی و پارتی بە هاوبەشی بچوونایەتە بەغدا، بۆ ئەوەی کار لەسەر هاوبەشایەتییەکی راستەقینەی کورد لە حکومەتی عێراقدا بکەین."

عومەر گوڵپی، ئەندامی لیژنەی دارایی و ئابووری لە پەرلەمانی کوردستان بە رادیۆی رووداوی راگەیاند: "لە دوای داهاتی نەوت، گەورەترین داهاتی هەرێمی کوردستان گومرگە کە یەکێکە لە کێشە گەورەکان. چەند رێگە بوونەتە هۆی ئەوەی کە تەنیا 30٪-40٪ـی داهاتی گومرگ بۆ خەزێنەی گشتی بگەڕێتەوە."

ئەو پەرلەمانتارە گوتیشی: "لە دەروازە سنووییەکاندا قاچاخچێتیی ئاشکرا ئێستایش بەردەوامە و، کۆمپانیای حیزبیی نایاسایی بە نایاسایی پارە لە خەڵک وەردەگرن. ئەم کۆمپانیایانە بە کێبەرکێ ئەو کارەیان وەرنەگرتووە، بەڵکو بە حیزبایەتی و قۆرخکاری بووە. ئەم کۆمپانیایانە تەنیا 20٪-30٪ی داهات بۆ حکومەت دەگەڕێننەوە."

عەبدولڕحمان سدیق، سەرۆکی دەستەی ژینگەی هەرێمی کوردستان بە رادیۆی رووداوی راگەیاند: "بەهۆی بۆردوومانەکانی تورکیا و ئێران و گرووپە چەکدارەکانی دیکەوە لە ساڵی 2010ە تاوەکو 2019 ملیۆنێک و 30 هەزار دۆنم دارستانی هەرێمی کوردستان سووتاوە."

چارەنووسی بەرشەلۆنە و مان یونایتد چی دەبێت؟

لیوا عەبدولخالق تەلعەت، نوێنەری هەرێمی کوردستان لە فەرماندەیی هێزە هاوبەشەکانی عێراق بە رادیۆی رووداوی راگەیاند: "وا بڕیارە لە 2021/12/01ـەوە دوو لیواکەی هێزە هاوبەشەکانی نێوان سوپای عێراق و پێشمەرگە پێکبهێنرێن و لەو شوێنانەدا جێگری ببن کە بۆشایی ئەمنی هەیە.  دوای ئەم دوو لیوایە دوو لیوای دیکەیش پێکدەهێنرێت بۆ ئەوەی بتوانرێت ئەو ناوچانە زیاتر کۆنترۆڵ بکرێن."

لە سۆران یەکەمین فێستیڤاڵی شانۆی سەرشەقام لەسەر ئاستی هەرێمی کوردستان ساز دەکرێت و بەڕێوەبەری رۆشنبیریی ئەو ئیدارە سەربەخۆیە رایدەگەیێنێت، لە دەڤەری ئەوان شانۆ و هونەر لە ئاستێکی باشدان.

یوسف عومەر رواندزی، بەڕێوەبەری رۆشنبیریی سۆران بە رادیۆی رووداوی راگەیاند: "ئەمە یەکەمین فێستیڤاڵە کە لەسەر ئاستی هەرێمی کوردستان بێت و لە دەڤەری سۆران ساز بکرێت. ئامانجی سەرەکیمان لەم فێستیڤاڵە ئاشتکردنەوەی خەڵکە لەگەڵ هونەر. هەروەها ئامانجێکی دیکەیشمان ئەوەیە کە پەیوەندییەکی پتەو لەنێوان هونەرمەندانی شارەکانی هەرێمی کوردستاندا دروست بکەین."

بەڕێوەبەری بەشی ئایتی لە وەزارەتی تەندروستی رایدەگەیێنێت، تاوەکو ئێستا زیاتر لە 50 هەزار کارتی ڤاکسین بە هاووڵاتییان دراونەتەوە و هەر کارتێکیش هەڵەی تێدا بێت لە هەمان رۆژدا جارەسەر دەکرێت.

حەربی کەتۆ، بەڕێوەبەری بەشی ئایتی لە وەزارەتی تەندروستیی هەرێمی کوردستان بە رادیۆی رووداوی راگەیاند: " تاوەکو ئێستا زیاد لە 50 هەزار کارتی ڤاکسین بە هاووڵاتییان دراونەتەوە. بۆ هەر کارتێکی ڤاکسین پێنج هەزار دینار وەردەگیردرێت لە کاتێکدا لە بەغدا بۆ هەر کارتێک 30 هەزار دینار وەردەگیردرێت."

عەباس ئەکرەم، گوتەبێژی وەزارەتی خوێندنی باڵا و توێژینەوەی زانستیی هەرێمی کوردستان بە رادیۆی رووداوی راگەیاند: "بۆ ئەمساڵ بە راسپاردەی وەزیری خوێندنی باڵا و توێژینەوەی زانستی پلانی وەرگرتنی دەرچووان زیاترە، بۆیە وەزارەت رێژەی زیاتر لە 100٪ی بۆ دەرچووان تەرخان کرد کە لە ژمارەی پێشکەشکارانی ئەمساڵ زیاترە."

ئەمساڵ 43 هەزار و 277 دەرچوو کە دەکاتە رێژەی 82٪ی دەرچووان لە زانکۆ و پەیانگەکان بە هەرسێ سیستەمی خوێندنی گشتی، پارالێل و ئێواران وەرگیراون. هاوکات حەوت هەزار و 943 دەرچوو بەهۆی هەڵەپڕکردنەوە و هەڵنەبژاردنی شوێنی گونجاو بە نمرەکانیان و بەهۆی کەموکوڕی لە ناوەندەکانی پڕکردنەوەی زانکۆلاینەوە وەرنەگیراون کە دەکاتە 18٪. هەروەها چوار هەزار و 67 کورسیی بەتاڵ ماونەتەوە. 

ئازاد تۆفیق، پارێزگاری هەڵەبجە بە رادیۆی رووداوی راگەیاند: "لیژنەکە 300 خاڵیان هەبوو بۆ ئەوەی هەڵەبجە ببێتە پارێزگا. ئێمە زۆرمان لە 300ەکە تێپەڕاندبوو. دواجار وەڵامی هەموو داواکارییەکانیان درایەوە. ئێستا هیچ رێکارێکی یاسایی و گرتنەبەری لەلایەن حکومەتی هەرێمی کوردستان و پارێزگای هەڵەبجەوە نەماوە و تۆپەکە لە ساحەی حکومەتی عێراقدایە."