د. رەهێڵ فەرەیدوون، بریکاری وەزارەتی تەندروستیی حکومەتی هەرێمی کوردستان بە رادیۆی رووداوی راگەیاند: "بە راستی بەشێکی زۆری خەڵک خەمساردن. ئەگەر خەڵک بەم جۆرە بە دەم ڤاکسین لەخۆدانەوە بێن، چاوەڕێ دەکرێت دۆخەکە لەوە خراپتر ببێت. پێشنیازێک هەیە کە ئەگەر فەرمانبەران ڤاکسین لە خۆیان نەدەن، هەموو هەفتەیەک پشکنینی پی سی ئاڕ بکەن. ئەگەر ئەوەیش نەکەن پێشنیار کراوە مووچەیان نەدرێتێ. ئەوەیش بۆ پارێزگاریکردن لە ژیانی خۆی و کەسوکاری."

هاونیشتمانییەکی باشووری کوردستان کە رێی کۆچی گرتووەتە بەر و لە کەمپێکی لاتڤیا دەستبەسەرە دەڵێت: "تۆمەتی تووندڕەوییان بۆ هەڵبەستووم."

د. محەممەد ئیحسان، شرۆڤەکاری سیاسی و شارەزای کاروباری عێراق بە رادیۆی رووداوی گوت: "بە بۆچوونی من حکومەتی داهاتووی عێراق بە سازان دەبێت، بەڵام من پێمخۆشە حکومەتی زۆرینە بێت. پێکهێنانی حکومەت بە سازان گەڕاندنەوەی عێراقە بۆ خاڵی سفر و رێزنەگرتنە لە هەڵبژاردن و ویستی خەڵک، ئەوەیش مانای وایە جوار ساڵی دیکەیش عێراق لە ئاڵۆزیدا دەبێت."

بەڕێوەبەری بەنداوی دەربەندیخان رایدەگەیێنێت کە بەهۆی وشکەساڵی و کەمبارانییەوە رۆژانە نزیکەی هەشت سانتیمەتر ئاوی بەنداوەکە کەمدەکات و پار تێکڕای داهاتی ئاوی بەنداوەکە 19٪ی تێکڕای داهاتی ساڵانە بووە.

رەحمان خانی، بەڕێوەبەری بەنداوی دەربەندیخان بە رادیۆی رووداوی راگەیاند: "پار بەهۆی کەمیی بەفر و بارانەوە ئاوێکی زۆر کەم لە سەرچاوەکانەوە هاتە ناو بەنداوی دەربەندیخان. هاوکات ئەو بەنداوانەی لە دیوی ئێرانەوە لەسەر رووباری سیروان کە سەرچاوەی سەرەکیی بەنداوی دەربەندیخانە دروست کرابوون، کاریگەرییان هەبوو لەوەی کە پار کەمترین ئاو لە مێژووی بەنداوەکەدا بێتە ناویەوە کە 900 ملیۆن مەتر سێجا ئاو بوو لە کاتێکدا ساڵانە بە تێکڕا چوار ملیار و 700 ملیۆن مەتر سێجا ئاو بووە کە ئەوەی پار دەکاتە 19٪ی تێکڕای داهاتی ساڵانە."

ئازۆلا گیایەکی خۆڕسکی سەرخەسی ئیسفەنجییە و لەناو ئاودا دەژی. بۆ بەخێوکردنیشی پێویستی بەوەیە گۆماوی بۆ بگیرێتەوە.

حامید ئیسماعیل، جووتیاری نموونەیی لە هەڵەبجە و بەڕێوەبەری رێکخراوی جووتیارانی ئەڤرێنەری کوردستان بە رادیۆی رووداوی راگەیاند: "ئێمە وەکو خولیامان بۆی کە زیاتر لە چوار ساڵە کاری لەسەر دەکەین و، پرۆژەی ماسی، قاز، مراوی و مریشکی کوردیمان هەیە، بە دوایدا گەڕاین. پێشتر چەند جارێک لە دەرەوەی وڵاتەوە هێنامان و سەرکەوتوو نەبووین لەبەر ئەوەی کە لە فڕۆکەخانەکانەوە دەهات دەبوو لە ئاودا بهاتایە. پاشان لە کاتی گەڕانماندا لە کانیاوێکی کوردستاندا دۆزیمانەوە. دواتر لەگەڵ چەند ئەندازیارێکی میسر لە ئەسکەندەریە قسەمان کرد و پاش هەوڵ و ماندووبوونیان جەختیان لەوە کردەوە کە ئەو گیایەی لە هەرێمی کوردستانە هەر وەک ئەوەیە کە لە میسرە."

مەنال محەممەد، بەرپرسی بەڕێوەبەرایەتیی کۆچ و کۆچبەران و وەڵامدانەوەی قەیرانەکان لە پارێزگای دهۆک بە رادیۆی رووداوی راگەیاند: "حکومەتی عێراق بۆ پێشکەشکردنی هاوکاری بە ئاوارەکانی سنووری پارێزگای دهۆک لە ئاستی پێوستدا نییە. هێشتا لە 200 لیتر نەوتی پار 100 لیتری داوە و ئەوی دیکەی نەداوە. هاوینانیش 40 لیتر بۆ چێشتلێنانە کە ئەم هاوینە ئەوەیش نەدرا."

عەلی حوسێن، ئەندامی سەرکردایەتیی پارتی دیموکراتی کوردستان بە رادیۆی رووداوی راگەیاند: "ئێمە دوای هەڵبژاردنەکانی پەرلەمانی عێراق بۆ بەرچاوڕوونیی خۆمان لە هەرێی کوردستان و ئامادەکاری بۆ گفتوگۆکانی بەغدا بە لە کۆتایی هەفتەی رابردوو بە ئامادەبوونی سەرۆک مەسعوود بارزانی لە مەکتەبی سیاسی بڕیار درا پارتی سەردانی هەموو لایەنەکانی دیکە بکات. هەر ئەو لایەنانەیش نا کە کورسییان بە دەست هێناوە، بەڵکو ئەوانەی کە بەربژێریان سەر نەکەوتوون و تەنانەت ئەوانەیشی کە بەربژێریان نەبووە."

سەعدی ئەحمەد پیرە، ئەندامی مەکتەبی سیاسیی یەکێتیی نیشتمانیی کوردستان بە رادیۆی رووداوی راگەیاند: "ئێستا کە هەڵبژاردنی پێشوەختە کراوە و ئەنجامەکان دەرچوون، هەوڵ هەیە بۆ ئەوەی زەمینەسازی بکرێت بۆ ئەوەی کۆسپ و تەگەرەکانی کاتی هەڵبژاردن نەهێڵرێت، وەک ئەو سەردانەی دوێنێی شاندی پارتی بۆ لای یەکێتی. ئەم دیدارە سرووشتی دانوستاندنی نەبوو و تەنیا بۆ زەمینەسازی بووە."

شاخەوان عەبدوڵڵا، بەربژێری دەرچووی پارتی دیموکراتی کوردستان لە کەرکووک بە رادیۆی رووداوی راگەیاند: "ئەو گەنجانەی گیرابوون ئێستا هەموویان بەربوون. ئەو گەنجانە لەسەر ئاڵای کوردستان نەگیرابوون، بەڵکو لەلایەن لایەنێکی سیاسییەوە هەوڵ درا لەو شارەدا ئاڵای کوردستان قەدەخە بکرێت. هەندێک کەس نێردرانە ناو ئاهەنگی پارتییەوە و تەقەیان کرد. دوای ئەوەی لە دوو رۆژدا بەڵگە کۆکرایەوە، هێزە ئەمنییەکان بۆیان دەرکەوت هەڵە بوون و ئاهەنگگێڕەکان نەبوون کە ئاژاوەیان ناوەتەوە و ئەندامی لایەنێکی دیکەی سیاسی بوون کە لەو شارەدا دۆڕاوە."