حەربی کەتۆ، بەڕێوەبەری بەشی ئایتی لە وەزارەتی تەندروستیی هەرێمی کوردستان لەبارەی هێواشیی دروستکردنی کارتی ڤاکسینەوە بە رادیۆی رووداوی راگەیاند: "پرۆسەکە وردەکاریی زۆری تێدایە، لەبەر ئەوەی بۆ دەرەوەی وڵاتە نامانەوێت کە هاووڵاتی گەشت دەکات تووشی گرفت ببێت. بۆ ناو و رۆژی لەدایکبوونیش پشت بە پاسۆرتی کەسەکە دەبەستین. هەر کارتێکیش کێشەی هەبێت یان هەڵەی تێدا بێت بۆی چارەسەر دەکرێت و هەڵەکەی راست دەکرێتەوە."

مەحما خەلیل، بەربژێری پارتی دیموکراتی کوردستان لە پارێزگای نەینەوا بە رادیۆی رووداوی راگەیاند: "من لە پارێزگای نەینەوا لە بازنەی سێی شنگال بەربژێرم. بانگەشەی هەڵبژاردن لە سنووری شنگال بەشێوەیەکی ئاسایی ناکرێت. دەستدرێژی دەکرێتە سەر پۆستەرەکانمان و تاوەکو ئێستا ئێمەی بەربژێرانی پارتی لە نەینەوا ناتوانین لەناو خەڵکی خۆماندا بگەڕێین و ئاسایشمان نەپارێزراوە."

ئەنەس عارف، سەرپەرشتیاری نووسینگەی دیالەی کۆمیسیۆنی باڵای سەربەخۆی هەڵبژاردن بە رادیۆی رووداوی راگەیاند: "لە سنووری پارێزگای دیالە نزیکەی 90٪ی کارتەکانی دەنگدان بە هاووڵاتییان دراونەتەوە. لە خانەقین هەشت بنکەی تۆمارکردن هەیە کە سەر بە بازنەی چوارن."

سیروان محەمەد، گوتەبێژی بەڕێوەبەرایەتیی گشتیی کارەبای سلێمانی بە رادیۆی رووداوی راگەیاند: "بە داخەوە لەگەڵ نزیکبوونەوەی هەڵمەتی هەڵبژاردنی پەرلەمانی عێراق، بەشێک لە بەربژێرەکان ستوونەکانی کارەبا بەکار دەهێنن و بانگەشەکانیان لەحیم دەکەن کە زیانێکی گەورە بە ستوونەکە دەگەیەنن کە لاوازی دەکەن. داوا لە هەموو بەربژێرەکان دەکەین کاتێک بانگەشەکانیان هەڵدەواسن لەحیم بەکار نەهێنن."

شێرزاد رەشید، بەرپرسی بەشی خوێندنی کوردی لە کەرکووک بە رادیۆی رووداوی راگەیاند: "ئێمە هەموو پێداویستی و مووچەی مامۆستایانمان و دابینکردنی کتێب لەلایەن هەرێمی کوردستانەوەیە. زۆر هەوڵمان دا تاقیکردنەوەکانمان لەگەڵ هەرێمی کوردستاندا بن، بەڵام رێگری کرا و، حکومەتی عێراق گوتی ئەگەر تاقیکردنەوەکانتان لەگەڵ هەرێمی کوردستاندا بێت و ئەوان سەرپەرشتی بکەن، ئەوا خوێندکاری خوێندنی کوردی لە وەرگرتنی کۆدی زانکۆلاینی عێراق بێبەش دەبێت و لە زانکۆکانی عێراق وەرناگیردرێت. ئیتر ئەو کاتە خوێندکاری ئێمە لە هەموو زانکۆکانی کەرکووک و عێراق بێبەش دەبوو، بۆیە ئێمە خوێندنمان لەگەڵ قوتابخانەکانی حکومەتی عێراق دەست پێدەکات."

کوردۆ یەشار، نوێنەری دەزگای لووتکە لە تورکیا بە رادیۆی رووداوی راگەیاند: "ئێستا لە تورکیا کۆچبەری زۆر نەماون و ژمارەیان کەم بووەتەوە. ئێستا یۆنانیش پەنابەر وەرناگرێت، ئەوەیشی بڕوات سووکایەتیی پێ دەکات و دەیخاتە ناو دەریاوە. گەنجانێک بزر بوون، چونکە پۆلیسی یۆنان فڕێی داونەتە ناو ئاو. رێگەی وشکانی نەماوە."

ئارام نەجات، سەرۆکی شارەوانیی چەمچەماڵ بە رادیۆی رووداوی راگەیاند: "رووبەری سەوزایی لە چەمچەماڵ زۆر لە خوار ستانداردی جیهانییەوەیە کە 7٪ـە. بەڵام ئێمە بەردەوام لە هەوڵی زیادکردنی رێژەی سەوزاییداین. لە چەند رۆژی رابردوودا بە مەبەستی زیاتر خزمەتکردنی ژینگە هەڵمەتێکمان بۆ سەوزکردنی سنووری چەمچەماڵ راگەیاند، بە داخەوە لە چەند شەوی رابردوودا چەند کەسێکی نابەرپرس کۆمەڵێک لەو نەمامانەیان دزیوە."

کاروان عومەر، بەرپرسی هۆبەی تۆماری دەنگدەران و داتا و زانیارییەکان لە لقی هەولێری کۆمیسیۆنی باڵای سەربەخۆی هەڵبژاردنەکانی عێراق بە رادیۆی رووداوی راگەیاند: "کۆمیسیۆن لە هەر پارێزگایەکی هەرێمی کوردستان بەپێی ژمارەی ئاوارە دەنگدەرەکان بنکەی تۆماری کردووەتەوە و وێستگەی بۆ ئامادە کردوون. بۆ نموونە، لە هەولێر 20 بنکەی دەنگدانمان هەیە کە لە 65 وێستگە پێکدێت کە 25 هەزار و 500 ئاوارەی دەنگدەرمان هەیە. هەروەها بۆ زانیارییشتان دەنگدانی ئاوارەکان خرایە رۆژی 2021/10/08 کە رۆژی دەنگدانی تایبەتە."