ئەرکی پاککردنەوەی ناوشاری سۆران و کۆکردنەوەی خاشاکەکەی لە ئەستۆی کۆمپانیای پاپا گرووپدایە کە ئێستا کرێکارەکانی مانیان گرتووە لەبەر ئەوەی شەش مانگە مووچەیان وەرنەگرتووە.

کاوە نەجم، سەرۆکی شارەوانیی سۆران بە رادیۆی رووداوی راگەیاند: "تازەکی گرێبەستی کۆمپانیای پاپا گرووپ بۆ پاککردنەوە نوێکراوەتەوە. نوێکردنەوەی گرێبەستەکە بۆ کۆکردنەوەی خۆڵ و خۆشاک زۆری پێچوو تا لە وەزارەتی داراییەوە پەسندکرا. هێشتا کۆمپانیاکە سولفەی وەرنەگرتووە، بۆیە کرێکارەکانی دەڵێن: 'تاوەکو مووچە وەرنەگرین ئامادە نیین کاربکەین.' "

ئەیسەر یاسین، ئەندامی لیژنەی پاڵپشتیی تەکنیکی لە نووسینگەی هەولێری کۆمیسیۆنی باڵای سەربەخۆی هەڵبژاردنەکانی عێراق بە رادیۆی رووداوی راگەیاند: "ئەگەر وای دابنێین کەسێک دوو جار لە دوو وێستگە دەنگ بدات، لەناو ئامێرەکانماندا فلاش میمۆرییەک هەیە کە دەنگدان تەواو بوو، ئەو میمۆرییانە دەدرێنە نووسینگەی هونەری لە بەغدا. لەوێ سێرڤەرێکی زۆر گەورەمان هەیە کە هەموو میمۆرییەکان لەو سێرڤەرە دەدرێت. هەر پەنجەمۆرێک دووبارە بێت، هەردوو دەنگەکە دەسووتێن."

دلێر عەبدوڵڵا، بەڕێوەبەری پەروەردەی ناوەندی هەولێر بە رادیۆی رووداوی راگەیاند: "ئەمڕۆ لە پەروەرەدەی ناوەندی هەولێر 205 هەزار قوتابی لەناو پۆلدا دەست بە خوێندن دەکەن کە بەسەر 410 قوتباخانەی ناوەندی شاردا دابەش کراون."

هۆگر چەتۆ، رێکخەری تۆڕی شەمس بۆ چاودێریی هەڵبژاردن بە رادیۆی رووداوی راگەیاند: "پێشتر نەتەوە یەکگرتووەکان لە هەڵبژاردنەکانی عێراقدا تا ساڵی 2018 دوو کاری هەبووە: راوێژپێدان و هاوکاریی هونەریی کۆمیسیۆن. بەڵام ئەم جارە بە بڕیارێک دەبێت نێردەی نەتەوە یەکگرتووەکان بە چڕی چاودێریی هەڵبژاردنەکە بکات و راپۆرت پێشکەشی ئەمینداری گشتیی نەتەوە یەکگرتووەکان بکات. کاتێک راپۆرت بەو دەدرێت، خۆبەخۆ پێشکەش بە ئەنجوومەنی ئاسایش دەکرێت و بەوەیش رەوایەتیی هەڵبژاردنەکە لە ئاستی نێودەوڵەتیدا دەکەوێتە بەر سەنگی مەحەک."

رێکخەری تۆڕی شەمس بۆ چاودێریی هەڵبژاردن ئامژەی بەوە دا، ئەگەر هەڵبژاردنەکە پاک نەبێت، ئەوا لە رووی سیاسییەوە لە ئەنجوومەنی ئاسایش دانی پێدا نانرێت و وڵاتان مامەڵەی سیاسی لەگەڵ عێراقدا ناکەن، هەر وەک ئەوەی بەسەر بیلاڕووسیا و ڤێنزوێلادا هاتووە.

ئەحمەد مازن، بەڕێوەبەری راگەیاندنی لقی هەولێری کۆمسیۆنی باڵای سەربەخۆی هەڵبژاردنەکانی عێراق بە رادیۆی رووداوی راگەیاند: "تاوەکو ئێستا لە سنووری هەولێر سەرپێچییەکمان بینیوە و بە وێنە و ڤیدیۆ بۆ لیژنەی ناوەندمان بەرز کردووەتەوە. سزاکانیش بە گوێرەی جۆری سەرێچییەکەن لە ملیۆنێک دینارەوە بۆ 10 ملیۆن دینار و، زیندانیکردن لە مانگێکەوە بۆ زیاتر. ئەوە هەر تەنیا بەربژێران ناگرێتەوە، بەڵکو ئەو هاووڵاتییانەیش دەگرێتەوە کە بانگەشە و رێکلامەکانی بەربژێرەکان دەدڕێنن. تاکە سەرپێچییەکەیش هی یەکێک لە بەربژێرەکان بوو کە پۆستەری خۆی لە تاوەری کارەبا دابوو و سیکۆتینیشی بەکار هێنابوو. "

فەخرەدین عەبدوڵڵا، بەڕێوەبەری گشتیی بەشە ناوخۆییەکانی کوڕان لە زانکۆی سەلاحەدین بە رادیۆی رووداوی راگەیاند: "ئێمە نەمانگوتووە کە بەشە ناوخۆییەکان ناکەینەوە، سەرۆکی زانکۆیش ئەوەی خستووەتە روو کە بەشە ناوخۆییەکان دەکرێنەوە. بەڵام کەموکووڕیمان هەیە. گازمان نییە، ئەگەر کارەبا بکوژێتەوە، من ناتوانم بۆیان هەڵبکەمەوە. بەڵام وەکو بینا ئامادەیە و هیچ کێشەیەکمان نییە. سەرۆکی زانکۆیش ئەو دەسەڵاتانەی نەدراوەتێ کە پارە خەرج بکات."

هەڵگورد نەجیب، قایمقامی سۆران بە رادیۆی رووداوی راگەیاند: "ئەگەر هێزەکانی رۆژهەڵاتیش لەو ناوچانە بن، ئەو هێزانە لە ساڵانی نەوەدەکانی سەدەی رابردووەوە لەو ناوچەيیە هیچ چالاکییەکی سەربازییان نییە. ئەوەی من دەیخوێنمەوە ئەوەیە کە بۆ تێکدانی سەقامگیریی هەرێمی کوردستانە، ئەگەرنا ئەم بۆردوومانە لە رووی سەربازییەوە هیچ ئامانجێک بۆ حکومەتی ئێران ناپێکێت."

ئامانج عەزیز، بەڕێوەبەری لقی سلێمانیی کۆمیسیۆنی باڵای سەربەخۆی هەڵبژاردنەکانی عێراق بە رادیۆی رووداوی راگەیاند: "هەڵبژاردنی ئەم جارە بە کارتی ئەلیکترۆنیی دەنگدان دەبێت، کارتەکە کورتخایەن یان درێژخایەن بێت، کە ژمارەی ناوەندی تۆمار و بنکەی دەنگدانی لەسەر نووسراوە. بۆیە دەنگدەر هەر لە رێگەی کارتە ئەلیکترۆنییەکەیەوە کە زانیارییەکانی لەسەر نووسراوە، دەتوانێت بڕوات بۆ ئەو بنکەی دەنگدانەی کە لەوێ دەنگ دەدات. بەوەیش دەنگدەری بازنەیەک بە هیچ شێوەیەک ناتوانێت بچێت لە بازنەیەکی دیکە دەنگ بدات. کارتەکە تەنیا بە تۆماری دەنگدەران و ئامێری ئەو بازنەیە ناسێنراوە کە دەنگدەرەکە دەبێت لەوێ دەنگ بدات."

د. ئاسۆ زەنگەنە، بەڕێوەبەری پاراستنی تەندروستی و سەلامەتیی خۆراک لە وەزارەتی تەندروستی بە رادیۆی رووداوی راگەیاند: "کارتی ڤاکسین سیستمێکی نوێیە، هەموو رێکارەکانی تەواو بووە و بڕیارە لەم رۆژانەدا کارتەکان چالاک بکرێن و دراونەتە بەڕێوەبەرایەتییەکان. پێشبینی دەکەم لە هەفتەی داهاتووەوە کارتەکە دابەش بکرێت."