رەزاق خەیلانی، بەڕێوەبەری فەرمانگەی هۆشیاریی ژینگەیی و راگەیاندن بە رادیۆی رووداوی راگەیاند: "ئێستا نزیکەی ملیۆنێک و 900 هەزار ئۆتۆمبێل لە هەرێمی کوردستاندان کە لەوانەیە لە کۆتایی ساڵدا بگاتە دوو ملیۆن. ئێمە شەش ملیۆن کەسین، دوو ملیۆن ئۆتۆمبێلمان هەیە! ئەمە لە هیچ وڵاتێکدا شتی وانییە کە سێ کەس ئۆتۆمبێلێکیان بەربکەوێت."

زرار ئەحمەد، بەڕێوەبەری ئاوی ئاکرێ بە رادیۆی رووداوی راگەیاند: "حکومەت بۆ هەزار لیتر ئاو 50 دینار وەردەگرێت کە ئەوە نرخێکی زۆر هێماییە. ئەو ماڵانەیشی کە پێوەری ئاویان بۆ بەستراوە، ئەگەر نرخێکی زۆر زیادیان بۆ هاتبووەوە، نابێت لە 45 هەزار دینار زیاتر بدەن. ئەوەی هەندێک کەس دەڵین 900 هەزار دینارم بۆ هاتووەتەوە یان زیاترم بۆ هاتووەتەوە، ئەوە بە بنچینە دانانرێت. هیچ فەرمانگەیەکی ئاو لە هەرێمی کوردستاندا ئەو پارە زۆرانەی لە کەس وەرنەگرتووە. ئەوە بەهۆی هەندێک گرفتی میکانیکییەوەیە لە پێوەرەکاندا. هەر ماڵێکیش پێوەری ئاو دانەنێت مانگانە 100 هەزار دینار بەهای ئاوی لێ وەردەگیردرێت."

کاروان عومەر رەحمان، بەرپرسی هۆبەی تۆماری دەنگدەران و تکەنەلۆجیا و زانیاری لە نووسینەگەی هەولێری کۆمیسیۆنی باڵای سەربەخۆی هەڵبژاردنەکان بە رادیۆی رووداوی راگەیاند: "ئێمە وەکو نووسینەگەی هەولێری کۆمیسیۆنی باڵای سەربەخۆی هەڵبژاردنەکان هیچ بڕیاریکمان بۆ دواخستنی هەڵبژاردن بۆ نەهاتووە. ئێمە لەسەر خشتەی کاری خۆمان دەڕۆین و بە هیچ شێوەیەک بیر لە دواخستن ناکەینەوە."

رەجەب حاجی عەزیز، سەرۆکی ئەنجوومەنی عەلوەی هەولێر بە رادیۆی رووداوی راگەیاند: "نرخی سەوزە و میوە لە چاو مانگێک پێش ئێستادا گران بووە، بە تایبەتی نرخی تەماتە، خەیار و پەتاتە. مانگی پێشوو تەماتە لە عەلوە کیلۆی بە 250 دینار بوو ئێستا بە 1000 دینارە، واتە 750 دیناری چووەتە سەر." 

سەعید مستەفا، جێگری سەرۆکی لیژنەی دەستپاکیی پەرلەمانی کوردستان رایدەگەیێنێت: "دڵنیاین لەوەی کە لە هەرێمی کوردستاندا گەندەڵی هەیە، بەڵام رێژەیەکمان لە بەردەستدا نییە. گەندەڵییەکەیش لە ئاستێکدایە کە کاریگەریی لەسەر هەندێک سێکتەری حکومەتی هەرێمی کوردستان هەیە، بە تایبەتی پرسی داهاتی حکومەتی هەرێمی کوردستاندا. حکومەتی هەرێمی کوردستانیش بە باشی بەرەنگاری دەبێتەوە بۆ ئەوەی لەوە زیاتر پەرە نەسێنێت."

ئەندامێکی پەرلەمانی عێراق لەبارەی دواخستنی هەڵبژاردنەکانی عێراق ئاماژە بەوەدەکات، چاوەڕێدەکرێت لە چەند رۆژی داهاتوودا بەفەرمی هەڵبژاردن دوابخرێت، ئەگەر دوانەخرێت رەنگە گرفتی گەورەی ئەمنی و سیاسییمان بۆ دروست بکات.