ئارێز عەبدوڵڵا، ئەندامی سەرکردایەتیی یەکێتیی نیشتمانیی کوردستان بە رادیۆی رووداوی راگەیاند: "ئێستا یەکێتی دەستی بە هەڵمەتی هەڵبژاردن کردووە، بەڵام بەو گەرموگوڕییە نییە کە پێویستە هەبێت. کاتێک خەڵکی زۆر بەشداری بکەن بۆ یەکێتی باشە، دیسان رێژەی بەشداریکردنیش بۆ حیزبەکان و بە تایبەتی حیزبە گەورەکان هەر وەکو یەکە. هەرچەندە لە رابردوویشدا ئەوەمان دیوە کە کێشە لەناو حیزبێکدا هەبووبێت دەنگدەری ئەو حیزبە سارد بوونەتەوە، بەڵام من دڵنیام کە رۆژی هەڵبژاردن لایەنگرانی یەکێتی خۆیان ئامادە دەکەن و بە گەرموگوڕی دەنگ دەدەن. بە گشتییش پێمان وایە نزیکەی 20 کورسی دەهێنین."

پشتیوان وەرتی، بەڕێوەبەری کۆمپانیاکانی پارێزگای هەولێر بە رادیۆی رووداوی راگەیاند: "ئێستا ناوی کۆمپانیاکان لە بەڕێوەبەرایەتیی گشتیی کۆمپانیاکان تۆمار دەکرێن. تاوەکو ئێستا نزیکەی 30 هەزار کۆمپانیا لە هەرێمی کوردستان تۆمار کراون کە نزیکەی 20 هەزاریان لە هەولێرن لەو ژمارەیش نزیکەی دوو هەزار و 400یان لقی کۆمپانیای بیانین. لە هەولێر زۆرترین کۆمپانیا تۆمار دەکرێن."

فیراس سدیق، بەڕێوەبەری سامانی ئاژەڵ لە وەزارەتی کشتوکاڵ رایگەیاند: "ئێمە لە گۆشتی مریشکدا گەیشتووینەتە خۆبژێوی و ئەوەی بەرهەم دێت لە خواستی ناوخۆ زیاترە. لە هەرێمی کوردستاندا 1676 رۆژەی بەخێوکردنی پەلەوەری گۆشت هەن. کە لە کۆتاییەکانی ساڵی 2019وە هاوردەکردنی مریشکی بەستوومان قەدەخە کرد، ئێستایش کە چوار مانگێکە پارچەکانی مریشکیشمان قەدەخە کردووە، ئەوانە وایان کردووە پرۆژەی زیاتر دابمەزرێنرێن. ئێستا ئێمە لە بەڕێوەبەرایەتیی سامانی ئاژەڵ لە وەزارەتی کشتوکاڵ 385 مامەڵەی بەرهەمهێنانی پەلەوەری گۆشتمان لە بەردەستدایە کە چاوەڕێن مۆڵەت وەربگرن."

د. رێبوار بابکەیی، ئەندامی لیژنەی وزە و سامانە سرووشتییەکان لە پەرلەمانی کوردستان بە رادیۆی رووداوی راگەیاند: "پرسی بەنزین ستراتیجییە و پەیوەستە بە ژیانی خەڵکەوە، بۆیە پێویستە حکومەتی هەرێمی کوردستان ئەو بابەتە بخاتەوە ژێر دەستی خۆی و وەزارەتی سامانە سرووشتییەکان پاڵێوگەی تایبەت بەخۆی هەبێت. ئەو پرسە لە دەستی کەرتی تایبەتدا شکستی هێنا و نەیتوانی ئەو پرسە چارەسەر بکات. چارەسەر ئەوەیە وەزارەتی سامانە سرووشتییەکان لە کەرتی تایبەتی وەربگرێتەوە، خۆی بەنزین بەرهەم بهێنێت و بە نرخێکی گونجاو بیداتە هاووڵاتی."

کامیل قەزاز، بریکاری وەزیری کارەبای حکومەتی هەرێمی کوردستان بە رادیۆی رووداوی راگەیاند: "لەگەڵ ئەنجوومەنی وەزیراندا خەریکی لێکۆڵینەوەین کە بیدەینە کەرتی تایبەت، لەبەر ئەوەی کە کەرتی کارەبا بەرەو ئەوە دەچێت کە نەتوانێت پارەی خۆی دەربهێنێتەوە. کەرتی تایبەت سەرکەوتن بەدەست دەهێنێت بەو مەرجەی نرخی کارەبا لەسەر هاووڵاتی زیاد نەکرێت و بە نرخی ئەمڕۆ پارەی لێ وەربگیردرێت و 24 کاژێر کارەبایشی هەبێت. خۆیشمان بەسەر ئەو کەرتەوە چاودێر دەبین. کەرتی تایبەت و وەزارەتی کارەبایش ناتوانن نرخ زیاد بکەن و ئەوە لە دەسەڵاتی ئەنجوومەنی وەزیراندایە."

حوسێن حەمەد، بەڕێوەبەری گشتیی کارەبای هەولێر رایگەیاند: "هەموو هەنگاوەکانی حکومەت لە بواری کارەبادا بۆ باشترکردنی دۆخی کارەبایە و یەکێک لەو هەنگاوانەیش دانی دابەشکردنی کارەبایە بە کەرتی تایبەت کە ئێستا لەلایەن وەزارەتی کارەباوە کاری لەسەر دەکرێت. لە 2007 بەدواوە بەشی زۆری کارەبا درا بە کەرتی تایبەت و، ئەو کارەبایەی لە هەرێمی کوردستان بەرهەم دەهێنرێت زیاتر لە 84٪ی لەلایەن کەرتی تایبەتەوەیە. ئەگەر ئەو هەنگاوە گرنگە لکە کاتی خۆیدا نەنرابایە ئێستا دۆخی کارەبامان لەمە خراپتر دەبوو."

کەریم سلێمان، بریکاری وەزارەتی کشتوکاڵ و سەرچاوە ئاوییەکانی هەرێمی کوردستان بە رادیۆی رووداوی راگەیاند: "دروستکردنی نۆ بەنداو پرۆژەیەکی گرنگ و ستراتیجییە. ئێستا لەو قۆناخەدایە کە کۆمپانیاکان تەندەری داواکاری بۆ وەرگرتنی پرۆژەکان پێشکەش بکەن. لیژنەیەکی تایبەتی ئێمە و لیژنەیەکی وەزارەتی پلاندانان داواکارییەکان هەڵدەسەنگێنن. تاوەکو ئێستایش نزیکەی 59 کۆمپانیا داواکارییان پێشکەش کردووە و ئامادەن ئەو بەنداوانە دروست بکەن و 30 لەو تەندەرانە وەرگیراون. کۆمپانیاکان بیانییشیان تێدایە، وەک ئەمریکی و تورکی."

زەکیە سەید ساڵح، بریکاری وەزارەتی کار و کاروباری کۆمەڵایەتی بە رادیۆی رووداوی راگەیاند: "خەڵکی ئێمە لە بەرهەمهێنەوە بوونەتە بەرخۆر، هەمووی پشتی بە مووچە بەستووە. ئێمە وەکو وەزارەت بەڕێوەبەرایەتیی تایبەت بە رەخساندنی هەلی کارمان هەیە، وەک بەڕێوەبەرایەتییەکانی راهێنانی پیشەیی و راهێنانی کار. ئەو بەڕێوەبەرایەتییانە لێکۆڵینەوە لە بازاڕی کار دەکەن. ئەو کەسانەی کاریان نییە و دەیانەوێت کارێک پەیدا بکەن با سەردانی بەڕێوەبەرایەتییەکانمان بکەن و ناویان تۆمار بکەن بۆ ئەوەی راهێنانیان پێبکەین و دواتر کاریان بۆ پەیدا بکەین."

لیوا عەبدولخالق تەڵعەت، نوێنەری وەزارەتی ناوخۆ و پێشمەرگە لە ژووری ئۆپەراسیۆنە هاوبەشەکانی عێراق بە رادیۆی رووداوی راگەیاند: "ئەو سنوورانەی لەگەڵ هەرێمی کوردستاندا هاوبەشن، ئەگەر هێزەکانی سوپای عێراق هاوئاهەنگییان لەگەڵ پێشمەرگەدا نەبێت، بە دڵنیاییەوە زۆر سەختە بتوانرێت بە تەنیا کۆنترۆڵ بکرێن."