ئەحمەد پشدەری، سەرۆکی رێکخراوی هەنگەوانانی کوردستان بە رادیۆی رووداوی راگەیاند: "ئەمساڵ وشکەساڵی وای کرد کە گەرادانان و شەڵخەی هەنگ بەرەو کەمی بڕوات، بەڵام بەرهەمی هەنگوینمان زۆر باشمان هەبوو و لە چاو ساڵانی پێشوو هەنگوینمان زۆر زیادی کرد. ئەوەیش بەهۆی ئەوەوە بوو کە ئەمساڵ زووتر گەرما هات و بووە مایەی ئەوەی شیلەی گوڵان زیاد ببێت. بۆیە ئەمساڵ بەرهەمی هەگوین لە هەرێمی کوردستاندا زۆر باشە."

ئەزوەر جەعفەر، بەڕێوەبەری ناحیەی حاجیئاوا لە ئیدارەی راپەڕین رایگەیاند: "یەکێک لە هۆکارەکانی کۆچی گەنجان لە حاجیئاوا ئەوەیە کە دوورە لە شارە گەورەکان و کاری تێدا نییە و کۆمپانیاکان زیاتر لە شارە گەورەکانن. هەروەها پاشەکشەی کەرتی ئابووری و کشتوکاڵیش کە نەیانتوانیوە بژێوی خێزانەکان دابین بکەن، بێکاری و نەبوونی دامەزراندن بۆ دەرچووانی زانکۆ و پەیمانگەکان هۆکاری دیکەن بۆ کۆچی گەنجان. هۆکاری سەرەکیی کۆچ لە ناحیەکەی ئێمە بێکارییە. هۆکارێکی دیکەیش ناجێگیریی دۆخی سیاسی و ئابوورییە لە عێراق و ناوچەکەدا. لە شەش-حەوت مانگی رابردوودا لە دەڤەری راپەڕین نزیکەی حەوت هەزار کەس کۆچیان کردووە."

Piştî 7 salan ji komkojiya Kurdên Êzdî, Dehan çîrokên ne bihîstî di nava malbatên rizgarbûyî yên destê DAIŞê hene, Her yek bi riyeke cude ji destê DAIŞê li Musil, Telefer, Reqe û Tebqe û hin bajarên din ku ketibûn bin kontirola DAIŞê rizgar bûn.

شێخ شامۆ نعمۆ، راوێژکاری سەرۆکی حکومەتی هەرێمی کوردستان بۆ کاروباری ئێزدییان بە رادیۆی رووداوی راگەیاند: "ئەو گرووپە چەکدارانەی لە شنگالدان هەڵگری ئەجێندایەکی هەرێمایەتین و ئەو ئەجێندایە ئەو رێککەوتنە پەسند ناکات. من گوێم لە هەندێک سیاسەتمەداری شیعەی عێراقی بووە کە دەڵێن: 'ئەو رێککەوتنە هیچ نییە.' ئەو ئەجێندایە دەزانێت ئەگەر ئەو رێککەوتنەی شنگال جێبەجێ ببێت، ئەوا ئەوان لە شنگالدا جێیان نامێنێت. رێککەوتنەکە ئارامی دێنێتە ئاراوە و خەڵکی شنگال دەگەڕێنێتەوە، ئەجێنداکە ئەوەی ناوێت. ئەوان شنگال وەک سەربازگەیەکی هەواڵگری و سیخوڕی بەکاردەهێنن."

سەرکەوت ئەحمەد، گوتەبێژی پۆلیسی سلێمانی بە رادیۆی رووداوی راگەیاند: "لە سەرەتای ئەو هەڵمەتەوە رێژەی تەقەکردن و بوونی ئۆتۆمبێلی جامڕەش و رووداوەکانی تیژڕەوی لە سلێمانیدا کەم بووەتەوە. زیاتر لە 12 ئۆتۆمبێل دەستیان بەسەردا گیراوە کە جامڕەش، ژمارەڕەش و بێسەرەتا بوون. زیاتر لە 500 پەردە و جامی ڕەش لێکراونەتەوە. زیاتر لە 10 چەکی بێمۆڵەت دەستیان بەسەردا گیراوە. ژمارەیەکی زۆر چەقۆ، خەنجەر و کەرەستەی شەڕکردن دەستیان بەسەردا گیراوە."

حەربی کەتۆ، بەڕێوەبەری بەشی ئایتی لە وەزارەتی تەندروستیی حکومەتی هەرێمی کوردستان بە رادیۆی رووداوی راگەیاند: "سەرەتای هاتنی ڤاکسین بۆ هەرێمی کوردستان ئێمە سیستمی کوردڤاکسمان دانا کە هەرکەسێک دەتوانێت خۆی تێدا تۆمار بکات. لە دوای هاتنی شەپۆلی سێیەمی کۆرۆنا خەڵکێکی زۆر خۆیان بۆ کوتان بە ڤاکسین تۆمار دەکەن و لە زیادبوونیشدایە. زیاتر لە 420 هەزار کەس خۆیان تۆمار کردووە. لە هەموو هەرێمی کوردستانیشدا 131 بنکەمان بۆ کوتان بە ڤاکسین هەیە."

ئاسۆ عومەر عوسمان، بەڕێوەبەری وردبینیی خانووبەرە لە بەڕێوەبەرایەتیی گشتی تۆماری خانووبەرەی هەرێمی کوردستان بە رادیۆی رووداوی راگەیاند: "بۆ نموونە کەسێکی بیانی بۆ تاپۆکردنی موڵک پێویستی بە رەزامەندیی چەند لایەنێک هەیە. جگە لە عەرەبی عێراقی، واتە وڵاتانی دراوسێ کە یاسایەکی تایبەتی هەیە و جیا لە بیانییەکانی دیکە مامەڵەیان لەگەڵ دەکرێت؛ رێکارەکانی کەمتر و ئاسانترە لە چاو تورکێک یان فارسێک. ئەوەیش پێویستی بە بڕیاری وەزیری ناوخۆ، وەزیری داد و وەزیری شارەوانییە کە دەبێت 30 کیلۆمەتر لە سنوورەکان دوور بن. هیچ جیاوازییەک لەنێوان عەرەبێکی عێراقی و کوردێکی هەرێمی کوردستاندا نییە. ئامارێکی وردمان لە بەردەستدا نییە کە چەندە عەرەب خانوو و موڵک دەکڕن و بە ناویانەوە تۆمار دەکرێت، بەڵام هەیە و رێژەکە لە جاران زیاترە."

ماجید سەید ساڵح، جێگری پارێزگاری دهۆک بە رادیۆی رووداوی راگەیاند: "چەندین  مانگە تۆپبارانی تورکیا لە سنووری  قەزاکانی زاخۆ و ئامێدی بەردەوامە. ئەگەر رۆژانە نەبێت، ئەوا دوو رۆژ جارێکە. لە سنووری ئەو دوو قەزایەدا نزیکەی 30 هەزار دۆنم زەوی سووتاون. زیانێکی زۆر بەر جووتیاران کەوتووە کە بە نزیکەی نۆ ملیار دینار دەخەمڵێنرێت. نزیکەی 20 گوندیش چۆڵکراون کە زۆربەیان لە سنووری شارۆچکەی دەرکارن."

تەحسین عەبدوڵڵا، بەڕێوەبەری ئاوی سۆران بە رادیۆی رووداوی راگەیاند: "سۆران لە ساڵی 2009وە پرۆژەی ئاوی بۆ جێبەجێ نەکراوە، ئەو فراوانبوونە خێرایەی سۆران و هاتنی ئەو گەشتیارە زۆرە بووەتە هۆی ئەوەی سۆران زوو گەورە ببێت. کاتی ئەوەیە پرۆژەیەکی نوێی ئاو بۆ سۆران جێبەجێ بکرێت."

عەدنان مەسنوور، بەرپرسی نووسینگەی ماددەی 140 لە دیالە و واست بە رادیۆی رووداوی راگەیاند: "ئەو بەعەرەبکردنەی سەدام کردی، هێندەی ئەم بەعەرەبکردنە نییە کە لە دوای 16ی ئۆکتۆبەرەوە دەکرێت. دوای 16ی ئۆکتۆبەر کە خانەقین حەشدی شەعبیی تێهات، دۆخێکی خراپی بەسەردا هات. ئێستایش هەزاران لە خەڵكی خانەقین شارەکەیان جێهێشتووە. زیاتر لە 30 گوندی کوردی بە تەواوەتی چۆڵ کراون. زۆربەی ماڵە کوردەکان خانووەکانیان بۆ فرۆشتن داناون. زۆربەی زۆریان بۆ شارەکانی هەرێمی کوردستان دەچن."