کرێکارێک لە سلێمانی دەڵێت، لە بەڕێوەبەرایەتیی باجی دەرامەتی سلێمانی بە خەمڵاندن و بەبێ هیچ ئامارێک باجی سێ ساڵ کرێکارییان لێسەندووە. جێگری بەڕێوەبەری ئەو بەڕێوەبەرایەتییەیش دەڵێت، ئەوە یاسایە و تەنانەت عەرەبانچییش دەبێت باج بدات.

گۆران جەلال، کرێکارێکی دانیشتووی سلێمانییە و بە رادیۆی رووداوی راگەیاند: "بۆ بەستنی پێوەری کارەبا چوومە فەرمانگەی کارەبا. لەوێ بۆ پشتگیرییەک بۆ فەرمانگەی باجی دەرامەتیان ناردم. چوومە بەشی ئەستۆپاکی هیچم لانەبوو. ناردیانم بۆ بەشێکی دیکە، لەوێ فایلێکیان بۆ کردمەوە و گوتیان: 'چ کارەیت؟' گوتم: 'کرێکارم.' کرێکارییەکەیان وەک پیشە بۆ ئەژمار کردم و، باجی سێ ساڵیان بۆ نووسیم. نازانم بەپێی چ ئامارێک دەرامەتی هەر ساڵێکیان بە نزیکەی حەوت ملیۆن دینار بۆ خەمڵاندم!"

د. محەممەد شوکری، سەرۆکی دەستەی وەبەرهێنان بە رادیۆی رووداوی راگەیاند: "هەر پرۆژەیەکی وەبەرهێنان خاوەنەکەی رایکردبێت، حکومەت پرۆژەکە دەداتە وەبەرهێنەری دیکە، لە ئایندەیەکی نزیکدا دەست بە کار دەکرێتەوە و تەواو دەکرێت و، رادەستی ئەو خەڵکە دەکرێت کە یەکەیان تێدا کڕیوە."

بێوار عەبدولعەزیز، گوتەبێژی بەرگریی شارستانیی دهۆک بە رادیۆی رووداوی راگەیاند: "شەوی سێشەممە ئاگرەکەی زاوێتە دوای هەوڵ و ماندووبوونێکی چوار رۆژە توانرا لە کاژێر 02:00ی شەودا کۆنترۆڵ بکرێت. زیانێکی زۆر بە دارستانەکانی ناوچەکە گەیشتووە، زیاتر لە 10 هەزار دۆنم سووتاوە."

شاناز نەقشبەندی، گوتەبێژی تەندروستیی هەڵەبجە بە رادیۆی رووداوی راگەیاند: "بە داخەوە لە پارێزگای هەڵەبجە بەهۆی بڵاوبوونەوەی ئەم شەپۆلە تازەیەی کۆرۆنای دەلتا رێژەی تووشبوون بە ڤایرۆسی کۆرۆنا لە لووتکەدایە. هەروەها پابەندبوونی هاونیشتمانییان بە رێنماییەکانەوە لە ئاستی پێویستدا نییە و بە شێوەی پێویست بە دەم لەخۆدانی ڤاکسینی کۆرۆناوە نایەن."

سدیق محەممەد، بەڕێوەبەری ناحیەی قادرکەرەم بە رادیۆی رووداوی راگەیاند: "ئاوەکە رۆژبەڕۆژ دادەبەزێت. من خۆم دوێنێ چوومەتە سەری، لە پێرێ کەمتر بووە. لەو باوەڕەدام پێنج رۆژی دیکە هیچ ئاو لە چەمی رۆخانەدا نامێنێت و ماسییەکانی لەناو دەچن. ئەم گۆمەی ئێستا ماسیی زۆری تێدا مرداربووەتەوە، خۆمان پار و پێرار ماسیی زۆرمان تێکردووە بۆ ئەوەی زیاد بکەن، بۆیە ئێستا مرداربوونەوەکە لەوێدا زیاترە."

د. ناسر هەرکی، ئەندامی لیژنەی بەرگری و ئاسایش لە پەرلەمانی عێراق بە ردایۆی رووداوی راگەیاند: "ئێستا لە عێراقدا سەرچاوەی هێز جیاوازە، هاوئاهەنگییەکی تەواو لەنێوان سوپا، حەشدی شەعبی و هێزە ئەمنییەکانی دیکەدا نییە. هاوکات ئەجێندای وڵاتانی هەرێمی و نێودەوڵەتییش لە عێراقدا هەیە. بۆیە چاوەڕوان دەکەم عێراق بەرەو ئاقارێکی نادیار بڕوات، رەنگە شەڕێکی ناوخۆیی لە عێراقدا رووبدات. کەموکووڕییەکی زۆر لەناو هێزە عێراقییەکاندا هەیە، بۆیە پێویستیان بە بە مەشق و هاوکاریی هاوپەیمانان هەیە."

نوێنەری مامۆستایانی وانەبێژ رایدەگەیێنێت، ئەگەر ئەمساڵ وەزارەتی پەروەردەی حکومەتی هەرێمی کوردستان دایاننامەزرێنێت، با هاوشێوەی مامۆستایانی وانەبێژی عێراق بۆ ساڵی خوێندنی 2021-2022 بیانکاتە گرێبەست. 

کارووخ عەبدوڵڵا، نوێنەری مامۆستایانی وانەبێژ بە رادیۆی رووداوی راگەیاند: "ئێمە لە پەروەردەکان بەڵێننامەمان پێ پڕکراوەتەوە؛ هیچ گرێبەستێک لەنێوانماندا نییە. ئێمە لەو قوتابخانانەی کە دەوام دەکەین لە رووی گواستنەوە و مۆڵەتوەرگرتنەوە هیچ مافێکمان نییە. لە رووی ئەرک و ماندووبوونیشەوە هاوشێوەی مامۆستایانی دامەزراو رۆڵ دەبینین، بەڵام لە مافدا زۆر لەوان جیاوازین."

بەڕێوەبەری فڕۆکەخانەی سلێمانی رایدەگەیێنێت، ئێستا کە جەژنی قوربان نزیک بووەتەوە، خەڵکی ئێمە 15 رۆژێکە دەستی کردووە بە ئامادەکاری بۆ گەشت. ئێستا قەرەباڵخییەکی زۆر هەیە بۆ گەشتکردن بۆ تورکیا، لوبنان، میسر و دوبەی.

تاهیر عەبدوڵڵا، بەڕێوەبەری فڕۆکەخانەی سلێمانی بە رادیۆی رووداوی راگەیاند: "رۆژانە 1000 بۆ 1500 کەس لە فڕۆکەخانەی سلێمانییەوە گەشت دەکەن. هەروەها ئەوەندەی گەشت دەکەن، ئەوەندەیش لە وڵاتانی دەرەوە بۆ هەرێمی کوردستان دەگەڕێنەوە بۆ ئەوەی سەردانی کەسوکاریان بکەن."

وەزارەتی پەروەردە: ئەو ماددانەی لە پرۆگرامەکانی خوێندن لابراون کاریگەرییان لەسەر ئاستی قوتابیان نابێت