سەربەست سەبری، بەڕێوەبەری ناحیەی کانی ماسێ بە رادیۆی رووداوی راگەیاند: "تاوەکو ئێستا ئەو رێککەوتنەی نێوان تورکیا و حکومەتی بەعسی پێشوو بەردەوامە کە وا رێککەوتبوون هەریەکەیان بە قووڵایی 25 کیلۆمەتر بچنە ناو خاکی یەکدییەوە. پێویست بوو دوای رووخانی حکومەتی بەعس لە 2003، ئەو هاوڕێیانەمان لە پەرلەمانی عێراق هەوڵێکیان بۆ نەهێشتنی ئەو رێککەوتننامەیە بدایە."

د. جەمال کۆچەر، ئەندامی پەرلەمانی عێراق بە رادیۆی رووداوی راگەیاند: "پێشتریش گوتوومانە کە سەختە هەڵبژاردن لەو کاتەدا بکرێت کە دیاری کراوە، چونکە حیزبە گەورەکانی شیعە، سوننە و کورد حەز دەکەن هەڵبژاردن نەکرێت. لەبەر ئەوەی لەو کورسییانە زیاتر بە دەست ناهێنن کە ئێستا هەیانە."

کامەران حەمید، خوێندکاری زانکۆی کەرکووک بەر رادیۆی رووداوی راگەیاند: "من قوتابیی زانکۆی کەرکووکم لە بەشی یاسا. تاقیکردنەوەکانمان لە رۆژی 2021/07/25ـدا دەست پێدەکەن کە هاوکاتە لەگەڵ تاقیکردنەوەکانی 12ی ئامادەیی لە هەرێمی کوردستان." 

هاوار محەممەد، ئەندامی مەکتەبی هەڵبژاردنی پارتی دیموکراتی کوردستان بە رادیۆی رووداوی راگەیاند: "ئێمە لە هەوڵی ئەوەداین کە بەربژێرەکانمان بتوانن لە سنووری ماددەی 140ـدا بە ئازادانە هەڵمەتی هەڵبژاردن بکەن. تا ئێستا رێگریی زۆر لە بەربژێرەکانمان دەکرێت و وەکو پێویست ناتوانن لە کەرکووک، پارێزگای نەینەوا، دیالە و سەلاحەدین هەڵمەتەکەیان سازبکەن."

حسێن رەقیب، بەڕێوەبەری نووسینگەی هەولێری دەستەی هەڵبژاردنەکان لە هەرێمی کوردستان بە رادیۆی رووداوی راگەیاند: "نزیکەی 75٪ـی دانیشتووانی هەرێمی کوردستان ناویان تۆمار کردووە. لەو کاتەوەی تۆماری بایۆمەتری راگیراوە، هیچ بڕیارێک نییە بۆ ئەوەی هاووڵاتی بتوانێت بە کارتە کۆنەکەی بایۆمەتری دەنگ بدات."

ئومێد ئەحمەد، گوتەبێژی وەزارەتی کارەبای حکومەتی هەرێی کوردستان بە رادیۆی رووداوی راگەیاند: "تا ئێستاکە 760 هەزار پێوەری زیرەکی کارەبامان داناوە. نزیکەی نیوەمان تێپەڕاندووە و، پلانمان هەیە تا کۆتایی ئەمساڵ و سەرەتای ساڵی ئایندە تەواوی پرۆژەکە جێبەجێ ببێت. بە تەواوبوونی ئەو پرۆژەیە سەرپێچییەکان لە هەرێمی کوردستاندا کۆتاییان پێدێت. تاوەکو ئێستایش 10٪ی سەرپێچییەکان کۆتاییان پێ هاتووە."

عەلی عەبدولڕەحمان، جێگری بەڕێوەبەری گشتیی باج و خانووبەرەی میری لە هەرێمی کوردستان بە رادیۆی رووداوی راگەیاند: "یاسای وەبەرهێنان کە ساڵی 2006 دەرچووە و کۆمپانیاکان تا 10 ساڵ لە باج دەبەخشێت، من لای خۆمەوە تێبینیی زۆرم لەسەر یاسای وەبەرهێنان هەیە. بە بۆچوونی خۆم ئەو یاسایە کارێکی زۆر خراپ بووە."

رێبوار بابکەیی، ئەندامی لیژنەی وزە و سامانە سرووشتییەکان لە پەرلەمانی کوردستان بە رادیۆی رووداوی راگەیاند: "لە چەند رۆژی داهاتوودا نرخی بەنزین دادەبەزێت و جۆرەکەیشی باش دەبێت. وەزارەتی سامانە سرووشتییەکان ئەو باجە 25 دۆلارییە کەم دەکاتەوە کە لەسەر هەر تۆنێکی هاوردەی داناوە. لە بەرامبەر ئەوەدا داوایان لێ دەکرێت کە جۆری باشی بەنزین هاوردە بکەن."

د. دلۆڤان محەممەد، بەڕێوەبەری گشتیی تەندروستیی هەولێر گوتی: "پێشتر لە هەولێر رێژەی تووشبوون بە ڤایرۆسی کۆرۆنا گەیشتبووە 3٪، بەڵام ئێستا بۆ 8٪ زیاد بووە. ئێمە بۆ دەستنیشانکردنی تووشبووانی ڤایرۆسی کۆرۆنا رۆژانە نزیکەی هەزار پشکنین دەکەین. ئەگەر کوتان بە ڤاکسین بەردەوام نەبووایە ئەوا ئەگەری هەبوو رێژەی تووشبوون زیاتر بێت. رۆژانە نزیکەی حەوت بۆ هەژدە نەخۆشمان لە چاودێریی چڕدا هەیە و 35 تووشبووی مامناوەندیشمان هەیە."