رێبوار تاڵەبانی، سەرۆکی پێشووی ئەنجوومەنی پارێزگای کەرکووک بە رادیۆی رووداوی راگەیاند: "لە کەرکووکدا رقی کۆنی نەتەوەکان لەسەر ئاستی تاک و کۆمەڵایەتی وەک دیاردەیەک و بە شێوەیەکی زۆرینە بەرامبەر بە کورد هەر هەیە. ئەوەی حیزبی بەعس بە 35 ساڵ بە کوردی کەرکووکی کرد، دوای 16ی ئۆکتۆبەر بە هاوکاریی هەموو لایەنەکان لەوە زیاتریان کرد. ئێستا کورد بەبێ ماف و ناز ماوەتەوە."

رۆمیۆ هەکاری، سەرۆکی لیژنه‌ى کاروباری کۆمەڵایەتی و داكۆكیكردن له‌ مافی مرۆڤ بە رادیۆی رووداوی راگەیاند: "ئەمڕۆ پەرلەمانی کوردستان دەنگ لەسەر پرۆژەیاساکە دەدات کە تێیدا باس لە زیادکردنی مووچەی کەمئەندامان کراوە. لە پرۆژەیاساکەدا خاوەنی پرۆژەکانی نیشتەجێبوون ناچار دەکرێن کە ئەو پێداویستییانە دابین بکەن کە کەمئەندام پێویستیانە. هەروەها پرۆژەکانی کەرتی تایبەت ناچار دەکرێن کە رێژەیەک کەمئەندام بۆ کارکردن وەربگرن کە لە 5٪ کەمتر نەبن، ئەوەیش دوای شیاندنەوە و راهێنانیان."

سۆران ئه‌بوبه‌کر، جێگری دووەمی سەرۆکی ژووری بازرگانیی هەولێر بە رادیۆی رووداوی راگەیاند: "بڕیارە 2021/07/13 شاندێکی باڵای حکومەتی یۆنان و 26 کۆمپانیای ئەو وڵاتە بە مەبەستی پێشخستنی بازرگانی لەنێوان هەرێمی کوردستان و یۆنان سەردانی هەولێر بکەن. ئەوە یەکەم جارە شاندێکی بەم شێوەیە سەردانی هەرێمی کوردستان بکەن. ئێمەیش وەک ژووری بازرگانیی هەولێر پەیوەندیمان بە نزیکەی 250 کۆمپانیای خۆماڵییەوە کردووە کە لەم کۆنفرانسەدا بەشداری بکەن."

زەردەشت عەبدولڕەزاق، بەڕێوەبەری ئاوی هەولێر بە رادیۆی رووداوی راگەیاند: "ئەو کەسانەی ئاو بە فیڕۆ بدەن و سەرپێچی بکەن، لەمەو دوا دەست بە سزادانیان دەکەین، وەک ئەو کەسانەی شەقامەکان دەشۆن و لە دەرەوە ئۆتۆمبێل دەشۆن. ئەمڕۆ سێشەممە بڕیار لەسەر چۆنیەتیی سزادانەکە دەدرێت."

زەردەشت رەفیق، بەرپرسی راگەیاندنی سەرۆکایەتیی شارەوانیی سلێمانی بە رادیۆی رووداوی راگەیاند: "شارەوانی پارەی کۆکردنەوەی خۆڵ و خاشاک لە ماڵان وەردەگرێت کە بۆ هەر مانگێک پێنج هەزار دینارە. ئەمە پێی دەگوترێت داهاتی خۆڵ و خاشاک، بەڵام وابزانم ئەم بڕیارە لە هەولێر نەچووتەوە بواری جێبەجێکردنەوە و تەنیا لە سلێمانی دەستی پێکراوە."

ئەحمەد کامەران، بەڕێوەبەری خزمەتگوزاری لە وەزارەتی کشتوکاڵ و سەرچاوەکانی ئاو بە رادیۆی رووداوی راگەیاند: "لە چاو ساڵەکانی رابردوودا رێژەی باجمان لەسەر بەرهەمی هاوردە زیاد کردووە بۆ ئەوەی بەرهەمی خۆمان بە باشی ساخ ببێتەوە. بۆ هەر کیلۆیەک تەماتە 1000 دینار باجمان داناوە کە لە 15ی حوزەیرانەوە تا 15ی تشرینی دووەم لەسەریەتی. ئێمە لە هەرێمی کوردستاندا ئەوەندە ساردکەرەوەی پێویستمان نییە کە بەرهەمی جووتیارانمانیان تێدا هەڵبگرین."

زەردەشت عەبدولخالق، بەڕێوەبەری ئاوی هەولێر بە رادیۆی رووداوی راگەیاند: "ئیستاکە نزیکەی 120 بیرمان ئاویان دابەزیوە کە ئەوەیش هۆکاری کەمبوونەوەی ئاوی بەشێک لە گەڕەکەکانی هەولێرە. هەروەها ئەمساڵ دوو جار بۆریی ئاوی ئیفراز سێ شکاوە کە ئەوەیش کاریگەریی لەسەر بێئاوی هەبووە. هۆکارێکی ستراتیجی هەیە کە خەڵک نایزانن و ئاگایان لێی نییە کە ئەویش کەمیی کارەبایە. ئێمە لە هەولێر 1200 بیرمان هەیە کە بە کارەبا کار دەکەن. ئەو کارەبایەیشی کە دەدرێت کەمە کە بیرەکان بەپێی پێویستیی خۆیان کار ناکەن. لە لایەکی دیکەیشەوە دوای گەرمیان هەولێر بۆ وشکەساڵی دووەمە."

ئیبراهیم شێخۆ، گوتەبێژی رێکخستنی مافی مرۆڤی عەفرین بە رادیۆی رووداوی راگەیاند: "بە گوێرەی زانیارییەکانمان شەڕەکە لە گوندی عەبیدانی عەفرین لەنێوان چەکدارانی گرووپەکانی نوخبە و سقووری شیمالدا بووە. هەردوو گرووپ دەیانویست دەست بەسەر شوێنەوارەکاندا بگرن و تاڵانیان بکەن. لە ئەنجامی شەڕەکەدا پێنج چەکدار کوژراون. ئێستا چەکدارانی نوخبە لە ناوچەکە نەماون و شوێنەکە بە تەواوەتی لە دەستی چەکدارانی سقووڕ شەمەردایە."