هەڵکەوت محەممەد، ئەندامی مەکتەبی جێبەجێکاری یەکێتیی جووتیارانی کوردستان بە رادیۆی رووداوی راگەیاند: "وەزارەتی کشتوکاڵی هەرێمی کوردستان لەگەڵ سێ کۆمپانیای کەرتی تایبەتدا گرێبەستی کردووە کە گەنم لە جووتیاران وەربگرن. سەرەڕای ئەوەی دەستخۆشیمان لەو هەنگاوە کرد، بەڵام گرفتی زۆرە. تاوەکو ئێستا تەنیا هەولێر ئامادەیە گەنم وەربگرێت. سایلۆی سلێمانی تازە بەردی بناخەی دانراوە و ئەمساڵ بۆ وەرگرتنی گەنم ئامادە نییە، دهۆکیش هیچی دیار نییە. نرخی وەرگرتنیش بۆ هەر تۆنێک لەگەڵ عێراقدا جیاوازە کە نمرە یەک بە 475 هەزار دینار، نمرە دوو 420 هەزار دینار و نمرە سێیش کەمتر لەوە کە ئەو نرخانە لە بەرژەوەندیی جووتیاراندا نییە. 475 هەزار دینار لە کوێ و 610 هەزار دینار لە کوێ؟"

زەردەشت عەبدولخالق، بەڕێوەبەری گشتیی ئاوی هەولێر بە رادیۆی رووداوی راگەیاند: "من ئێستا هەر ئەو بڕی ئاوە دابین دەکەم کە پار و ئەم زستانەیش دابینم کردووە. بۆچی ئەو کاتانە گلەیی نەبووە و بەشی کردووە و ئێستا بەشی ناکات؟ چونکە ئێستا ئاوی زیاتر بە کار دەهێنێت؛ ماڵ دەشوات، موبەڕیدە بە کار دەهێنێت. ئەوان درک بەوە ناکەن کە ئێستا زیاتر ئاو بە کار دەهێنن. ئێمە دوو رۆژ جارێک ملیۆنێک و نیو مەتر سێجا ئاو بۆ شاری هەولێر دابین دەکەین. باشە ئەو ئاوە بۆ کوێ دەچێت؟ خۆ خۆمان نایبەین! هەر بۆ هاووڵاتی دەچێت. بەڵام دابەشکارییەکە لە چوستییەکەی هێناوەتە خوارەوە، چونکە ئەو گەڕەکانەی بە باشی ئاویان بۆ دەڕوات، دەستی پێوە ناگرن بەلووعەکانیان ناگرنەوە تاوەکو بۆ گەڕەکەکانی دیکە بچێت."

ئەحەمەد مام رەسووڵ، بەڕێوەبەری کاروباری زیندانییانی سیاسی بە رادیۆی رووداوی راگەیاند: "سەرۆکوەزیران بڕیاری داوە کە شایستەی دارایی ئەو زیندانییانەی هیچ مووچەیەکی دیکەیان نییە خەرج بکرێت، بەڵام بە هۆکاری دواکەوتنی کاروبارەکانی لیژنەی پێداچوونەوەکە مووچەکەیان دوا کەوتووە. ئێستا لیژنەکە دەستیان بە کار کردووە و کارەکانیان زۆر باش دەڕوات. وەک قۆناخی یەکەم دۆسیەی 639 زیندانیی سیاسیی پەسند کراوە کە هیچ مووچەیەکی دیکەیان نییە. ئێمەیش لە 2021/05/01ـەوە مووچەکانمان بۆ بەستوونەتەوە و دەتوانن سەردانی بانکی بێخاڵ بکەن بۆ وەرگرتنی."

گولیزار رەشید حاجی، جێگری سەرۆکی لیژنەی وزەو سامانە سرووشتییەکان لە پەرلەمانی کوردستان بەرادیۆی رووداوی راگەیاند: "من بەدواداچوونم بۆ نرخی کارەبا کردووە و وەزارەتی کارەبا دەڵێت کە ئەوان نرخیان زیاد نەکردووە و ئەوە لە دەسەڵاتی ئەنجوومەنی وەزیراندایە. بەڵام لە لایەکی دیکەوە ئەم گرفتە لە راستکردنەوەی نرخی دینار بەرامبەر بە دۆلار سەری هەڵداوە، چونکە هەموو پرۆژەکانی وەزارەتی کارەبا بە دۆلارە، تەنیا کۆکردنەوەی داهاتی بە دینارە. ئەمەیش 20٪ لەسەر هاووڵاتییان زیاد بووە."

ئاری جەلال، سەرۆکی دەزگای لووتکە بۆ کاروباری ئاوارە و پەنابەران بە رادیۆی رووداوی راگەیاند: "بەهۆ بڵاوبوونەوەی ڤایرۆسی کۆرۆناوە کە گەشتە ئاسمانی و زەمینییەکان لە ساڵی 2020ـدا راگیران، رێژەی پەنابەری و کۆچبەری لە چاو ساڵانی رابردوودا زۆر دابەزی، بەڵام ئەمساڵ بەپێی ئەو ئامارەی بە دەستی ئێمە گەیشتووە 26 هەزار و 972 کەسی عێراقی روویان لە وڵاتانی ئەوروپا کردووە و داوای مافی پەنابەرێتییان پێشکەش کردووە."

سەربەست سەبری، بەڕێوەبەری ناحیەی کانی ماسێ بە رادیۆی رووداوی راگەیاند: "تورکیا لەم شەڕەیدا قورسترین چەک بەکار دەهێنێت. بەو هۆیەیشەوە زیاتر لە 10 هەزار دۆنم زەویی دێمی و بەراو سووتاوە."

زیاد، تۆفیق، دانیشتووی گوندی باکرمان بە رادیۆی رووداوی گوت: "ساڵی 2008 بەردی بناخەی پرۆژەی ئاومان بۆ دانرا و لە 2012دا کەوتە بواری جێبەجێکردنەوە. لە ساڵی 2015یشدا پرۆژەکە تێکچوو و لە کار کەوت. ئەو پرۆژەیە لە سەرانسەری پارێزگای دهۆکدا پرۆژەیەکی گەورە بوو. ئەو ماتۆڕانەیش خرابوونە سەر رووبارەکە نەماون. ئێستاکە پشت بە بیرێکی کۆن دەبەستین کە ساڵی 1980 حکومەت کردوویەتی و ئەو کاتە گوندەکە 80 ماڵ بووە. ئەو بیرەیش بەشمان ناکات و کێشەمان چارەسەر ناکات."

د. جەمال کۆچەر، ئەندامی لیژنەی دارایی پەرلەمانی عێراق بە رادیۆی رووداوی راگەیاند: "بەرپرسانی بەغدا هیچ قسەیەکیان لە بارەی ئەو 200 ملیار دینارەوە نەکردووە و هەر بەرپرسانی هەرێمی کوردستانن لەم بارەیەوە قسە دەکەن. ئەگەر مانگانە 200 ملیار دینار بدەنە هەرێمی کوردستان، ئەوە مانای وایە لە چوارچێوەی یاسای بودجە دەرچوون، چونکە یاسای بودجە دەڵێت دەبێت هەرێمی کوردستان نرخی 250 هەزار بەرمیل نەوت بە نرخی سۆمۆ رادەستی عێراق بکات. نرخی سۆمۆیش نرخێکی جێگیر نییە؛ هەر رۆژەی نرخێکە و زیاد و کەم دەکات."

د. بژار مووسا، گوتەبێژی تەندروستیی هەولێر بە رادیۆی رووداوی راگەیاند: "ئێستا لە هەولێر هەرسێ جۆری ڤاکسینەکانی فایزەر، ئاسترازینیکا و سینۆفارم هەن و، تاوەکو ئێستایش زیاتر لە 40 هەزار کەس ڤاکسینیان لێدراوە. ڤاکسینی تەواو لە بەردەستدایە بە تایبەتی بۆ ئەوانەی کە جاری یەکەم لە خۆیان داوە. هەموو هەوڵێک بۆ ئەوەیە کە کەسەکە جاری یەکەم ڤاکسینی لە خۆی داوە."