د. ئاسۆ حەوێزی، گوتەبێژی وەزارەتی تەندروستیی هەرێمی کوردستان بە رادیۆی رووداوی راگەیاند: "تاوەکو ئێستا لە هەرێمی کوردستان 117 هەزار قورچک ڤاکسینمان لە خەڵک داوە بەوانەیشەوە کە دووەم جار کوتراون. رۆژانە خەڵک بە ڤاکسینی کۆرۆنا دەکوترێن. ئێستاکە زیاتر لە 180 هەزار کەس ناوی خۆیان بۆ کوتان بە ڤاکسینی کۆرۆنا تۆمار کردووە بەوانەیشەوە کە کوتراون."

رێڤینگ هرووری، سەرۆکی لیژنەی کاروباری پێشمەرگە لە پەرلەمانی کوردستان بە رادیۆی رووداوی راگەیاند: "لە شەڕی ئەم دواییەدا تورکیا نزیکەی هەشت بارەگای نوێی داناوە. گەریلاکانی پەکەکە شەڕی پارتیزانی دەکەن و بارەگای دیاریکراویان لە چیاکانی ناوچەکەدا نییە و بەردەوام شوێنگۆڕکێ دەکەن."

فازڵ نەبی، بریکاری پێشووی وەزارەتی دارایی عێراق بە رادیۆی رووداوی راگەیاند: "بەغدا زۆر جار بەربەست دروست دەکات بۆ ئەوەی یاسای بودجە تایبەت بە هەرێمی کوردستان جێبەجێ نەکرێت. پێشتر زۆر بە ئاسانی دەتوانرا ئەو کێشەیە چارەسەر بکرێت، بە تایبەتی لەلایەن وەزارەتی دارایی عێراقەوە. وا دیارە ئەو نیازپاکییەی بۆ جێبەجێکردنی نەبووە."

د. محەممەد رەشید، بەرپرسی چاودێریی دەرمانخانەکانی بازاڕی هەولێر لە دامەزراوەی کۆنترۆڵی جۆری بە رادیۆی رووداوی راگەیاند: "داوا لە هاووڵاتییان دەکەم دەرمانێک نەکڕن کە لەزگەی پێوە نەبێت. ئەگەر چوونە دەرمانخانەیەک و دەرمانەکە لەزگەی پێوە نەبێت، نرخەکەی لە هی خۆی زیاتر بێت یان شوێنی هەڵگرتنی دەرمانەکە گونجاو نەبێت، دەتوانن تیمەکانمان لە رێگەی ژمارەی "07502356000"ـەوە پەیوەندیمان پێوە بکەن."

رائید ڕێباز زێوەر، گوتەبێژی بەڕێوەبەرایەتیی بەرەنگاربوونەوەی تووندوتیژی دژی ئافرەتان و خێزان بە رادیۆی رووداوی راگەیاند: "دوای ئەوەی لە تۆڕە کۆمەڵایەتییەکاندا وا بڵاو کرایەوە کە سێ منداڵ، دوو کچ و کوڕێک، لەلایەن باوەژنەکەیانەوە بە ئاگاداریی باوکیان ئەشکەنجەی جەستەیی و دەروونی دراون، دەستبەجێ تیمێکمان ئامادە کرد و رەوانەی گەڕەکی مامزاوای هەولێرمان کردن. دواتر خۆیان ون کردووە."

کامەران دۆسکی، سەرپەرشتیاری کارگەی دۆشاوی هەریر بە رادیۆی رووداوی راگەیاند: "ئێمە دەتوانین رۆژانە 100 تۆن تەماتە وەربگرین و ئامادەین کە رۆژانە 20 تۆن ئاوەتەماتە بخەینە بازاڕەوە. ئەگەر حکومەت و خەڵک هاوکارمان بن دەتوانین زیادی بکەین بۆ 40-50 تۆن لە رۆژێکدا. بەڵام پێویستمان بە پشتیوانییە، چونکە تێچووەکەی زۆرە، هەر لە کارەبا، گاز وایل، کرێکار، ساردکەرەوە و گەلێک شتی دیکە. لەو باوەڕەداین لە هەفتەیەک تا 10 رۆژی دیکەدا بتوانین تەماتە وەربگرین."

ئەدیب جەعفەر، بەڕێوەبەری ناحیەی دەرکار بە رادیۆی رووداوی راگەیاند: "جموجووڵی چەکدارانی پەکەکە لە سنووری ناحیەکەی ئێمەدا کەمە، ئەوەیش دوای ئەوەی کە سوپای تورکیا لە ناوچەکەدا خاڵی سەربازییان جێگیر کرد، ئیتر ئەوان شوێنەکانیان چۆڵ کرد و چوونە شوێنی دیکە. ئەو خاڵەی پێشمەرگە بۆی چوو لە بەرزاییەکانی ناوچەکەدایە و پێویستە پێشمەرگەی تێدا بێت. ئەگەر ئەوانی لێ نەبێت ئەو کاتە سوپای تورکیا دێن دەیگرن."

رێژین سدیق، بەڕێوەبەری بەرهەمهێنانی بنەتۆو لە وەزارەتی کشتوکاڵی هەرێمی کوردستان بە رادیۆی رووداوی راگەیاند: "ئەو بنە تۆوانەی لە ناوخۆی هەرێمی کوردستان بەرهەم هێنراون هەموویان لە ناوەندەکانی توێژینەوە بەرهەم هێنراون. بە گوێرەی ئەزموون و ئەنجامەکانیش بەرهەمیان زۆر لەو بنە تۆوانە باشترە کە هاوردەی هەرێمی کوردستان کراون، بەڵام بە داخەوە تاوەکو ئێستا نەمانتوانیوە بڕێکی زۆر تۆو بەرهەم بهێنین کە بەشی هەموو جووتیاران بکات، بۆیە هەموو ساڵێک رێگە بەوە دەدەین کە لە دەرەوە بنە تۆو هاوردە بکرێت."

کاروان کەریم خان، بەڕێوەبەری ناحەیەی هەریر بە رادیۆی رووداوی راگەیاند: "رۆژی شەممە 2021/6/05 بەهۆی گڕگرتنی دەڕاسەیەکەوە ئاگر لە گەنمی ناوچەکە بەر بوو و زیانی بە جووتیاران گەیاند و چەند سەعاتێک بەردەوام بوو. بە مەزەندەی سەرەتایی نزیکەی هەزار دۆنم زەوی سووتاوە کە هەر تەنیا گەنم نییە و خانووی پلاستیکی و نزیکەی 60 پوورەی هەنگ سووتاون. هەروەها ئامێری کشتوکاڵی و ئاودێرییش سووتاون."

ناسر هەرکی، ئەندامی لیژنەی ئاسایش و بەرگریی پەرلەمانی عێراق بە رادیۆی رووداوی راگەیاند: "ناکرێت عێراق تەنیا تەماشاکەری شەڕی پەکەکە و تورکیا بێت. تا ئێستا عێراق نەیتوانیوە هەموو سنوورەکانی خۆی بپارێزێت و لە هەموو لایەکەوە دەبەزێنرێن."