هەرێم کەمال ئاغا: داوا لە پەکەکە دەکەین بیانوو نەداتە دەست تورکیا

سەردار نۆڕێ، هونەرمەندی شێوەکار لە هەڤپەیڤینێکی تایبەتدا لەگەڵ رادیۆی رووداو رایگەیاند، بازاڕی فرۆشتنی تابلۆی رەسەنی هونەرمەندانی کورد سستە و زۆربەی شوێنەکانی وەک هۆتێل، مۆتێل و چێشتخانەکان تابلۆی کۆپیکراوی بیانی دەکڕن و هەڵدەواسن کە پێویستە حکومەت لە رێگەی وەزارەتی رۆشنبیرییەوە ئەو شوێنانە ناچار بکات تاوەکو تابلۆی رەسەنی هونەرمەندانی کورد بکڕن و هەڵبواسن.

د. بژار مووسا، گوتەبێژی بەڕێوەبەرایەتیی تەندروستیی هەولێر بە رادیۆی رووداوی راگەیاند: "ئێمە رێکارەکانی خۆمان بۆ رووبەڕووبوونەوەی شەپۆلی نوێی ڤایرۆسی کۆرۆنا گرتووەتە بەر. ئومێدەوارین هاووڵاتییان پابەندی رێنماییەکان بن بۆ ئەوەی بتوانین پێکەوە رێگری لە بڵاوبوونەوەی بکەین. پێمان وایە ئەم جۆرە نوێیە مەترسیدارە و خۆپارێزی تاکە چارەسەرە. ئەم جۆرەیان خێرایی بڵاوبوونەوەی گەلێک زۆرە."

کوێستان ئەکرەم، سەرۆکی شارەوانیی هەڵەبجە بە رادیۆی رووداوی راگەیاند: "ژمارەیەک پرۆژەی باش لە هەڵەبجەدا بەردی بناخەیان بۆ دانرا، بەڵام بەهۆی قەیرانی داراییەوە وەستان و تەواو نەکران. دواتر بەهۆی شەڕی داعشەوە کە بودجەکانیان لەسەر ئەنجوومەنی وەزیران بوو هەموو پارەکانیان بۆ شەڕی داعش سەرف کران. ئەمانە هۆکار بوون کە نەتوانین وەک پێویست خزمەتی هاووڵاتییان بکەین. لەناو ناوەندی هەڵەبجەدا نۆ پرۆژەمان هەن کە هەموویان وەستێنراون. ئەو پارەیەیشی بۆیان دابین کرابوو نەماوە، بۆ شەڕی داعش سەرف کرا و دەبێت جارێکی دیکە بودجەیان بۆ دابین بکرێتەوە."

ئەرسەلان عابد، سەرۆکی تۆڕی رێکخراوەکانی هەڵەبجە بە رادیۆی رووداوی راگەیاند: "هەڵەبجە لەو کاتەوەی بووەتە پارێزگا لە خراپترین دۆخی کارگێڕی و ئابووریی خۆیدایەتی. بە داخەوە ئیستا نە پارێزگایە نە قەزا؛ لە تخووبێکی راگوزەردایە. نە ئەنجوومەنی پارێزگای هەیە و نە هیچ دەسەڵاتێکی چاودێری و یاسادانان لەم پارێزگایەدا هەیە. ئەو یاسایەیش کە لە پەرلەمان بۆ دانانی ئەنجوومەنی پارێزگا دەرچوو، تاوەکو ئێستا جێبەجێ نەکراوە. یاسایەکی دیکەیش دەرکرا بۆ ئەوەی ببێتە پایتەختی ئاشتی و پشتیوانی بکرێت و قەرەبوو بکرێتەوە تا کۆنفرانس و جالاکیی گەورەی تێدا سازبکرێت. تاوەکو ئێستا ئەوەیش جێبەجێ نەکراوە."

سەرەتای مانگی تەممووز بڕیاری وەرگرتنی باج لە هۆتێل و مۆتێل و شوێنە گەشتیارییەکان و رێستۆرانتەکان جێبەجێ دەکرێت و رێژەی 10٪ دەچێتە سەر مینۆ و بلیتی کۆتایی حسابات.

زیرەک بیا، سەرۆکی کۆمەڵەی چێشتخانە و میوانخانەکانی هەولێر بە رادیۆی رووداوی راگەیاند: "ئێمە لە بەڕێوەبەرایەتیی گەشتوگوزاری هەولێرەوە نووسراوێکمان بۆ هات کە باج لەسەر شوێنە چوار ئەستێرەیی و پێنج ئەستێرەییەکان زیاد دەبێت. ئێمە کۆبوونەوەیەکمان لەنیوان بەڕێوەبەرایەتیی گەشتوگوزاری هەولێر و خاوەنی چێشتخانە و میوانخانە چوار و پێنج ئەستێرەییەکاندا رێکخست. زیاتر لە دوو کاژێر گفتوگۆمان کرد. خاوەنی چێشتخانە و میوانخانەکان رازی نەبوون بە هیچ شێوەیەک ئەو باجە بدەن. گوتیان: 'ئێمە ناتوانین باج لە خەڵکی خۆمان وەربگرین، بەڵام ئەگەر بیانی بێت دەتوانین وەک وڵاتانی دیکە وەریبگرین.' هەموویان بڕیاریان داوە ئەگەر ئەو بڕیاری وەرگرتنی باجە جێبەجێ بکرێت هەموویان ئەستێرەکانیان کەم بکەنەوە. ئەگەر ئەو شتەیش بکرێت، ئەو کاتە لە کوالێتییان کەم دەبێتەوە و ئەو کاتە هەموویان دەبنە دوو و سێ ئەستێرە."

رائید سەرکەوت کاڕەش، گوتەبێژی بەرگریی شارستانیی هەولێر بە رادیۆی رووداوی راگەیاند: "لەم شەش مانگەدا لە سنووری هەولێردا 642 رووداوی ئاگرکەتنەوە روویان داوە کە ئەوەیش ژمارەیەکی زۆرە. داوا لە هاووڵاتییان دەکەم کە پابەندی رێنمایەکان بن بۆ ئەوەی لە رووداوی نەخوازراو دوور بن."

کارزان ئەمیر، موقەدەمی پۆلیس و بەڕێوەبەری راگەیاندنی بەڕێوەبەرایەتیی گشتیی پۆلیسی هەرێمی کوردستان بە رادیۆی رووداوی راگەیاند: "ئێستا لە هەرێمی کوردستان زیاتر لە 20 هەزار هاووڵاتیی ئاسایی مۆڵەتی یاسایی چەکهەڵگرتنیان لایە کە لە دەرەوەی هێزە ئەمنییەکانن و داوای فەرمییان بۆ هەڵگرتنی چەک پێشکەش کردووە و مۆڵەتیان وەرگرتووە. هەیشیانە لەوانەیە نەزانێت چەکەکەی بەکار بهێنێت."