نزیکەی مانگێک پێش ئێستا لە گوندی قازانبڵاخی کەرکووک دوو ئامۆزا لەسەر سەگێک دەبێتە شەڕیان و یەکێکیان ئەوی دیکەیان دەکوژێت. خوشکی کوژراوەکە دەڵێت، تاوەکو ئێستا بکوژەکە دەستگیر نەکراوە، هەرچەندە لای پۆلیسیش سکاڵایان تۆمار کردووە. پۆلیسیش دەڵێت، هەڵهاتووە.

دونیا رزگار، خوشکی کوژراوەکە بە رادیۆی رووداوی راگەیاند: "ئەوە نزیکەی مانگێکە براکەم کوژراوە، هێشتا بکوژەکە دەستگیر نەکراوە کە ئامۆزایەکمە و ماڵی مامیشم دەستیان تێیدا هەبووە. دوای ئەوەی کوشتوویەتی هەموویان هەڵهاتوون. رووداوەکە 2021/10/23 روویداوە کە لەسەر سەگێک بووە. کێشەی ئەم سەگەیش بۆ ساڵێک پێش ئێستا دەگەڕێتەوە."

لانە لوقمان مەمووندی، رائیدی مافپەروەر و بەرپرسی نووسینگەی بەرەنگاربوونەوەی توندوتیژی دژی ئافرەتان و خێزان لە خەبات بە رادیۆی رووداوی راگەیاند: "لە سنووری قەزای خەبات بەراورد بە پار تۆمارکردنی سکاڵا بەهۆی تووندوتیژی دژی ئافرەتانەوە لە زیادبووندایە. لە ساڵی 2019دا دوو هەزار و 705 سکاڵا تۆمار کراوە، لە 2020ـدا بووەتە دوو هەزار و 399 سکاڵا و لە 2021ـدا بووەتە دوو هەزار و 837 سکاڵا."

د. توانا نەجەف، بەڕێوەبەری گشتیی فەرمانگەی کارگێڕی و دارایی وەزارەتی خوێندنی باڵا و توێژینەوەی زانستی بە رادیۆی رووداوی راگەیاند: "دەرماڵە گرفت نییە و مافێکی ئاسایی خوێندکارانە کە پێش ساڵی 2014 هەیانبووە و ئێستا داوای گەڕاندنەوەی ئەو مافەیان دەکەن. خوێندکاران پەیامەکەیان گەیشتووە و ئێمە کاری لەسەر دەکەین و، لەگەڵ ئەنجوومەنی وەزیران و وەارەتی دارایی لەسەر هێڵین."

حوسێن کەلهوڕی گەنجێکی خەڵكی قەڵادزێی هەرێمی کوردستانە و تەمەنی 26 ساڵە. یەکێکە لەو کۆچبەرانەی کە توانیویەتی بە پارە لە سنووری بێلاڕووس-پۆڵەنداوە خۆی دەرباز بکات و بگەڕێتەوە مینسک. ئەو لەناو ئەو لێشاوە کۆچبەرەدا بوو کە رۆژی 2021/11/08 بەرەو سنووری پۆڵەندا رۆیشتبوون. حوسێن دەڵێت، پۆلیسی بێلاڕووس کۆچبەران لە سەربازگەکاندا کۆدەکاتەوە و بەسەر سنووری پۆڵەندا و لیتوانیادا دابەشیان دەکات.

عەلی حسێن، ئەندامی سەرکردایەتیی پارتی دیموکراتی کوردستان بە رادیۆی رووداوی راگەیاند: "ئێمە دەمانەوێت حکومەتێکی دەزگایی لە عێراق هەبێت کە حکومەتی هاووڵاتی بێت. دەزگاکانی یاسادانان، جێبەجێکردن و بڕیاردان هەریەکەیان کاری خۆیان بکەن. عێراق دەوڵەتێکی فیدراڵییە، رۆحی دەوڵەتی فیدراڵی لە عێراقدا رەنگی نەداوەتەوە. ئەوانەی حوکمڕانن و پێگەیان بەهێزە ئێستایش باوەڕیان بەم دەستوورە نییە و نایانەوێت جێبەجێی بکەن."

چەند لایەنێکی شیعە لەژێر ناوی "ئیتاری تەنسیقی"ـدا دەیانەوێت هاوپەیمانێتییەک پێکبهێنن بۆ ئەوەی لە پەرلەماندا گەورەترین فراکسیۆن دروست بکەن و بتوانن حکومەتی نوێی عێراق پێکبهێنن.

فارس عیسا، نوێنەری حکومەتی هەرێمی کورستان لە بەغدا بە رادیۆی رووداوی راگەیاند: "هەر لایەنێک کە دەچێتە هەڵبژاردنەوە دەیەوێت سەرکەوتوو بێت، گەورەترین فراکسیۆنی هەبێت و حکومەت پێکبهێنێت. ئەمە مافێکی رەوای هەر لایەنێکی سیاسییە کە ئیتاری تەنسیقییش ئەو مافەی هەیە کە لە دەوڵەتی قانوون و فەتح و چەند لایەنێکی دیکە پێکهاتووە. هاوکات رەوتی سەدریش هەوڵ دەدەن متمانە بە کورد و سوننە بهێنن بۆ ئەوەی لەگەڵیان بن و پێکەوە گەورەترین فراکسیۆن دروست بکەن و حکومەت پێکبهێنن."

ئاری جەلال، سەرۆکی دەزگای لووتکە بۆ کاروباری ئاوارە و پەنابەران بە رادیۆی رووداوی راگەیاند: "لە ساڵی 2015دا 186 هەزار و 222 کەس لە عێراقەوە کۆچیان کردووە بۆ دەرەوەی وڵات کە 25 کەسیان مردوون و حەوتیان بێسەروشوێنن. لە ساڵی 2016دا 160 هەزار و 716 کەس کۆچیان کردووە کە 132 کەسیان مردوون و تەرمی 78 کەسیان دۆزراوەتەوە و 54یان بێسەروشوێنن. لە ساڵی 2017دا 92 هەزار کەس کۆچیان کردووە. لە ساڵی 2018دا 69 هەزار کەس کۆچیان کردووە. لە 2019دا بوو بە 53 هەزار کەس. ساڵی 2020 بەهۆی بڵاوبوونەوەی ڤایرۆسی کۆرۆنا و راگرتنی گەشتە زەمینی و ئاسمانییەکانەوە ژمارەکە بە تەواوەتی کەمی کرد بۆ 34 هەزار کەس. ئەمساڵیش تاوەکو مانگی تشرینی یەکەم نزیکەی 40 هەزار کەس کۆچیان کردووە."

بە گوتەی سەرۆکی دەزگای لووتکە بۆ کاروباری ئاوارە و پەنابەران، لە ساڵی 2015وە 449 کەس مردوون کە تەرمی 226 کەسیان گەڕێنراونەتەوە عێراق کە خەڵکی هەر لە زاخۆ تاوەکو بەسرەیان تێدا بووە و، 187 کەسیش تاوەکو ئێستا چارەنووسیان نادریارە. 

هیوا خدر، بەرپرسی فیدارسیۆنی سەرانسەریی پەنابەرانی عێراقی لە تورکیا بە رادیۆی رووداوی راگەیاند: "لە تورکیا لە 10 مانگی رابردوودا 124 هەزار و 503 کۆچبەر لە زۆربەی نەتەوەکان دەستگیر کراون کە سێ هەزار و 836 کەسیان عێراقین کە نزیکەی 80٪یان خەڵکی هەرێمی کوردستانن. هەر لەو ماوەیەدا 330 کۆچبەر مردوون کە زۆرینەیان لە دەریادا بووە، بە تایبەتی دەریای ئیجە."