د. باخان تاڵەبانی، پزیشکی پسپۆڕی نەشتەرگەری لە نەخۆشخانەی گشتیی هەڵەبجە بە رادیۆی رووداوی راگەیاند: "لە نەخۆشخانەی هەڵەبجە دەرمانی بەسەرچوو بە نەخۆش دراوە. دوای ئەوەی بەڕێوەبەری تەندروستی گرنگی بەو بابەتە نەدا، چووین داواکاری گشتیمان ئاگادار کردەوە و کرا بە دۆسیە. لە بەردەم داواکاری گشتیدا ئاماژەیان بەوە دا کە بەپێی فەرمانێکی وەزارەی دەتوانن تا 11 ساڵ دەرمانی بەسەرچوو بەکاربهێنن. ئەمەیش زۆر نامەعقوولە، چونکە دەبێت هەر دەرمانێک مانگێک پێش بەسەرچوونی پووچەڵ بکرێتەوە و بۆ کۆگەی دەرمان بنێردرێتەوە. ئەم دەرمانانە لەناو کۆگای تایبەتی نەخۆشخانەی فریاکەوتندا بینراون و وێنەیان گیراوە. ساڵێک و نۆ مانگە کراوەتە دۆسیە و هیچ ئەنجامێکی نەبووە. ئەوان بە دەستتێوەردانی لایەنێکی دیاریکراو ئەو شتانەیان راگرتوون کە تایبەتن بە هەڵدانەوەی فایلەکان و ناهێڵن دۆسیەکە بجووڵێت."

سامان حسێن، سکرتێری یەکێتیی کەمئەندامانی کوردستان بە رادیۆی رووداوی راگەیاند: "حکومەتی هەرێمی کوردستان لە هیچ پرۆژەیەکی وەک ئاوەدانکردنەوە، نیشتەجێبوون و رێگەوباندا بیری لە کەمئەندامان نەکردووەتەوە. تاوەکو ئەم ساتە حکومەتی هەرێمی کوردستان یەک کورسیی بۆ کەمئەندامان دابین نەکردووە. ئەوەی هەیە هەمووی هی خێرخوازانە. تەنانەت وەزارەتی کاریش کە کورسی دابین دەکات لە رێگەی خێرخوازانەوەیە.جگە لەو هاوکارییە مادییە 100 بۆ 150 هەزار دینارییە حکومەت هیچ شتێکی بۆ نەکردووین. ئێستا دۆخی ئابووری و دەروونیی کەمئەندامان زۆر خراپە."

سەباح فەتاح، ئەندامی ئەنجوومەنی پارێزگای سلێمانی بە رادیۆی رووداوی راگەیاند: "سنووری شارەوانیی سلێمانی فراوانە و پێشنیازەکە بۆ ئەوەیە ئەنجوومەنەکە باشتر کارەکانی رووماڵ بکات، چونکە ئێستا ژمارەی دانیشتووانی سلێمانی زۆر زیاد بووە. ئەو یاسایە کاتێک دەرکراوە کە ژمارەی دانیشتووانی سلێمانی وەکو ئێستا زۆر نەبووە."

عومەر گوڵپی، ئەندامی پەرلەمانی کوردستان بە رادیۆی رووداوی راگەیاند: "ئێستاکە نزیکەی 88 هەزار هاووڵاتی لەو مووچەیە سوودمەندن. پێشنیازمان کردووە  ئەو بڕە پارەیەی بە کەمئەندامان دەدرێت مووچە نییە، هاوکارییەکی کۆمەڵایەتییە. پێشنیازمان کردووە کە بە لیستی مووچەوە نەبەسترێتەوە کە ئەگەر مووچە هەبێت، ئەو بدرێت و، ئەگەر مووچە نەبێت ئەویش نەدرێت. پێویستە مانگانە بە رێکوپێکی لە رۆژێکی دیاریکراودا بدرێتە کەمئەندامان."

لیوا عەبدولخالق تەڵعەت، نوێنەری وەزارەتەکانی ناوخۆ و پێشمەرگە لە فەرماندەیی ئۆپەراسیۆنەکانی عێراق بە رادیۆی رووداوی راگەیاند: "چەکدارانی داعش زیاتر لە ناوچەکانی نێوان دیالە، کفری و کەرکووکدا جموجووڵیان زۆرە، ئەوەیش لەبەر بۆشایی ئەمنی لە نێوان عێراق و هەرێمی کوردستاندایە کە تاوەکو ئێستا ئەو لیژنە هاوبەشانەی لەنێوان پێشمەرگە و سوپای عێراقدا دروست کراون نەیانتوانیوە وەکو پێویست کارەکانیان بکەن. حکومەتی عێراق ئامادە نەبووە کە رێگە بدات هێزە هاوبەشەکان کارەکانیان بکەن کە ئەوەیش زیاتر مەبەستێکی سیاسیی لە پشتە."

عەلی عەباس جیهانگری، گوتەبێژی وەزارەتی کۆچ و کۆچبەرانی عێراق بە رادیۆی رووداوی راگەیاند: "وەزارەتی کۆچ و کۆچبەرانی عێراق بە دەست کەمیی بودجەوە دەناڵێنێت ئەوەیش بەهۆی کورتهێنانی بودجەی ساڵی 2021ـەوەیە کە بودجەکەمان کەم کراوەتەوە. ئەو بودجەیەی بۆمان تەرخان کراوە لە چوارمانگی یەکەمی ئەمساڵدا زیاتر لە نیوەیمان خەرج کردووە. بۆیە ئەو پارەیەی تەرخان کراوە بەشی سێ مانگی دیکەمان ناکات. دەکرێت داوا بکەین بودجەی فریاگوزاریمان بۆ تەرخان بکرێت کە لەژێر دەسەڵاتی ئەنجوومەنی وەزیران و سەرۆکوەزیراندایە. هەوڵ دەدەین داوا لە رێکخراوە نێودەوڵەتییەکان بکەین کە هاوئاهەنگمان بن."

بەشێک لە خوێندکارانی بەشە ناوخۆیی شەهید شەوکەت لە هەولێر بەهۆی گرفت لە سیستمی سارد و گەرمی بەشە ناوخۆییەکەیاندا ناڕەزایی دەردەبڕن و فەخرەدین عەبدوڵڵا رەسووڵ، بەڕێوەبەری بەشە ناوخۆییەکانی زانکۆی سەڵاحەدینیش دەڵێت سیستمی سارد و گەرمی بەشە ناوخۆییەکە زۆر کۆنە و هەوڵی چارەسەرکردنیمان داوە.