فازڵ حاجی، گوتەبێژی پۆلیسی هاتووچۆی هەولێر بە رادیۆی رووداوی راگەیاند: "لە کارێکی لێکۆڵینەوەی خۆماندا لەسەر شەقامی 120 مەتریی هەولێر بە درێژایی رێگەکە کە بە هەردوو سایدەکەوە کە 38 کیلۆمەترە تەنیا لە رێگەی ئاسنی راگری قەراخ رێگەکەوە کە تێکچووبوون 206 شوێنی رووداومان دیاری کرد کە بەس ئەو رووداوانەن کۆنترۆڵیان لە دەست داوە و بەر ئاسنەکە کەوتوون، جگە لەو رووداوانەی کە لە ناوەندی شەقامەکەدا روویانداوە و بەر ئۆتۆمبێلی دیکە کەوتوون."

خەسرەو گۆاران، بەرپرسی دەزگای هەڵبژاردنی پارتی دیموکراتی کوردستان بە رادیۆی رووداوی راگەیاند: "پارتی دیموکراتی کوردستان بۆ هەڵبژاردنی پێشوەختەی عێراق هیچ رێککەوتنێکی لەگەڵ هیچ لایەنێکدا نییە. پێشتر بۆ ناوچە کوردستانییەکانی دەرەوەی کارگێڕیی حکومەتی هەرێمی کوردستان هەوڵێک هەبوو کە هاوپەیمانێتییەک دروست بکەین، بەڵام لەبەر رێککنەکەوتن لەسەر دابەشکردن و چۆنیەتیی دیاریکردنی بەربژێری هەر لایەنێک، بە تایەبەتی لایەنە سەرەکییەکان، هەوڵەکە سەری نەگرت."

د. دلۆڤان محەممەد، بەڕێوەبەری گشتیی تەندروستیی هەولێر بە رادیۆی رووداوی راگەیاند: "هەفتەی داهاتوو قورچکی دووەمی ڤاکسینی فایزەر بۆ ئەو کەسانە دابین دەکرێت کە بەر لە سێ هەفتە بەو ڤاکسینە کوترابوون. هەروەها بڕیار وایە بڕێکی دیکەی ڤاکسینی ئاسترازێنیکا بگاتە هەرێمی کوردستان."

دیار تاهیر بابان، بەڕێوەبەری گشتیی بەرهەمهێنانی کارەبا لە وەزارەتی کارەبای حکومەتی هەرێمی کوردستان بە رادیۆی رووداوی راگەیاند: "ئەو کارەبایەی ئێستا لە هەرێمی کوردستاندا بە هاونیشتمانییان دەدرێت زۆربەی زۆری لەو وێستگانەوە بەرهەم دێت کە بە گازی سرووشتی کار دەکەن. ئەو بڕە کارەبا بەرهەمهاتووەی لە هەردوو بەنداوی دووکان و دەربەندیخانەوە بۆمان دێت لە باشترین دۆخدا لە 5٪ـی کۆی گشتیی کارەبای بەرهەمهاتوو تێناپەڕێت. ئێمە وێستگە و پرۆژەی دیکەمان هەیە کە تازەن و لە وەرزی هاویندا بۆ بەرهەمهێنانی کارەبا ئامادەن و بەوە دەتوانین ئەو کورتهێنانە قەرەبوو بکەینەوە کە تووشی دەبین."

عێراق بە رادیۆی رووداوی راگەیاند: "هەبوونی هێزەکانی تورکیا لە خاکی هەرێمی کوردستاندا جێگەی نیگەرانیی حکومەت و خەڵکی عێراق و خەڵکی هەرێمی کوردستانیشە. ئەوەی ئێستا روودەدات پێشێلکارییە بەرامبەر بە سەروەریی عێراق بەبێ ئەوەی تورکیا رەزامەندیی حکومەتی عێراقی وەربگرێت. لە لایەکی دیکەیشەوە بە هەمان شێوە خاکی هەرێمی کوردستان پێشێل دەکرێت، خەڵکەکەی رووبەڕووی کێشە دەکرێنەوە و رێگە لە گەڕانەوەی خەڵکی بۆ گوندەکانیان دەگیرێت و دەیشبنە قوربانیی ئەم کارانەی تورکیا."

خوێندکارانی بەشی کیمیای دەرمانسازی لە زانکۆی چەرمۆی چەمچەماڵ گردبوونەوەیەکی ناڕەزایەتییان سازکرد و داوایان کرد کە پلەی ئیدارییان بۆ پاش خوێندن دیاری بکرێت و باسیشیان لەوە کرد کە لە تاقیگەکانیاندا ئامێری پێویستیان نییە. سەرۆکی زانکۆکەیشیان پشتگیریی داواکەیانی کرد و ئەوەی خستەڕوو کە ئاراستەی وەزارەتی خوێندنی باڵای کردووە و گوتیشی: "ئامێری شکاوی تەندروستیی سلێمانی چاک دەکەینەوە و لە تاقیگەکانماندا بە کاری دەهێنین."

پۆڵا سیروان تاڵەبانی، ئەندامی سەرکردایەتی و بەرپرسی مەڵبەندی گەرمیانی یەکێتیی نیشتمانیی کوردستان بە رادیۆی رووداوی راگەیاند: "پێویستە لایەنە سەرەکییەکانی هەرێمی کوردستان پێکەوە بە جیددی گفتوگۆ لەسەر دەستوور بکەن بۆ ئەوەی لەسەری رێکبکەون و هیچ لایەنێک هەست بەوە نەکات کە پشتگوێ دەخرێت و لایەنێک دەیەوێت تاکڕەوانە هەڵسوکەوت بکات. لەبەر ئەوەی دەستوور بابەتێکە پەیوەستە بە هەموو خەڵکی هەرێمی کوردستانەوە، پێویستە سازانی لەسەر بکرێت."

شۆفێری بارهەڵگرێک کە نەیویست ناوی خۆی ئاشکرا بکات بە رادیۆی رووداوی گوت: "کاتێک بارێک بۆ هەولێر دەهێنین، هەموو خەممان بازگەی دێگەڵەیە. من رۆژی دووشەممە کاژێر 09:00ی بەیانی گەیشتمە بازگەی دێگەڵە و 03:00ی پاشنیوەڕۆ دەرچووم. سەرەی ئۆتۆمبێلەکان بۆ سۆنەر زۆر درێژە. من رۆیشتووم بۆ بەغدا 20 خولەک لە سۆنەردا نەوەستاوم لە کاتێکدا ئەو هەموو بارهەڵگرە دەچنە بەغدا."

تۆمارکردنی هاوپەیمانێتییەکان و ناوی بەربژێرەکان بۆ هەڵبژاردنی پێشوەختەی عێراق کۆتایی هات و لە هەرێمی کوردستان تەنیا یەک هاوپەیمانێتی هەیە کە "هاوپەیمانیی کوردستان"ـە و یەکێتی وگۆڕان پێکیان هێناوە. هاوکات باس لەوەیش دەکرێت کە حیزبەکانی دیکەی وەک کۆمەڵ و یەکگرتوویش رێککەوتنیان لەگەڵ ئەو هاوپەیمانێتییەدا هەیە کە وا لێکدەدرێتەوە دوای هەڵبژاردن بەرەیەک پێک بهێنن بۆ ئەوەی لە بەغدا نوێنەرایەتیی کورد لە پارتی وەربگرنەوە.

سەڵاحەدین بابەکر، کارگێڕی ئەنجوومەنی جێبەجێکردنی یەکگرتووی ئیسلامیی کوردستان بە رادیۆی رووداوی راگەیاند: "ئێمە وەکو یەکگرتوو لە سەرەتادا داوامان کرد کە هاوپەیمانێتییەک دروست بکرێت کە گوزارشت لە شەقامی ناڕازی بکات کە ئەو خەڵکەی تا رادەیەکی زۆر لە گۆڕانکاری نائومێد بووە، ئەو لیستە فراوانە ببێتە جێگەی ئومێدیان، بەڵام دوای گفتوگۆی چەند مانگە ئەو لیستە پێک نەهێنرا. لە رووی بنەماوە تا رادەیەک هەموو لایەک لەسەری رازی بوون، بەڵام لە رووی وردەکارییەوە جێبەجێ نەکرا. بۆیە ئێستا ئێمە وەک یەکگرتوو شەش بەربژێرمان بە شێوەی تاکەکەسی خۆیان پاڵاوتووە. هیچ جۆرە رێککەوتن و هاوپەیمانێتییەکمان لەگەڵ هیچ لایەنێکی هەرێمی کوردستاندا نییە."