هەڵمەت هەمزە، بەڕێوەبەری کوشتارگەی هاوچەرخی هەولێر بە رادیۆی رووداوی راگەیاند: "نرخی گۆشت دابەزیوە و یەکێک لە هۆکارەکانیشی وشکەساڵییە کە خەڵکێکی زۆر ئاژەڵەکانیان دەفرۆشن. دڵنیایشم رێژەی فرۆشتنی ئاژەڵ و دابەزینی نرخی گۆشت دوای رەمەزان زیاد دەبێت. وشکەساڵی وای کردووە کە ئاژەڵداران لە گۆڕەپانانی ئاژەڵاندا ئاژەڵەکانیان زوو بفرۆشن، لەبەر ئەوەی وەکو ساڵانی پێشوو ئاڵف و ئاویان نییە. ئەوەیش مەترسییەکی زۆر گەورەیە و پێموایە لە چەند مانگی داهاتوودا هەڵئاوسانێکی زۆر لە نرخی گۆشتدا روودەدات."

جەلال محەممەد ئەمین، بڕیاردەری لیژنەی کاروباری یاسایی لە پەرلەمانی کوردستان بە رادیۆی رووداوی راگەیاند: "جێبەجێنەکردنی یاسای سندووقی داهاتە نەوتییەکان چەند هۆکارێکی رێگری هەیە کە سەرەکیترینیان نەگونجانی لایەنە سیاسییەکانە لەسەر پشکەکانیان لەناو ئەم سندووقەدا، چونکە رێکنەکەوتن کە کێ سەرۆکی بێت و کێ ئەندامی بێت. ئیتر ئەو گرفتە درێژەی کێشا و نەتوانرا چارەسەر بکرێت."

جیهان ئیبراهیم، جێگری بەڕێوەبەری ئاوی کەرکووک بە رادیۆی رووداوی راگەیاند: "دانانی پێوەر هۆکارێکی زۆر سەرەکییە بۆ ئەوەی کێشەی کەمئاوی لە کەرکووکدا زۆر کەم ببێتەوە. ئێستا رۆژانە 250 هەزار مەتر سێجا ئاو بۆ شاری کەرکووک بەردەدەینەوە، کەچی لەگەڵ ئەوەیشدا کێشەی ئاومان هەیە. ئەگەر بێتو ئەم بڕە ئاوە لەگەڵ ژمارەی دانیشتوواندا بەراورد بکرێت، پێویستە کێشەی ئاومان نەبێت، بەڵام لە واقیعدا دەبینیت جار هەیە 50٪ی خەڵک ئاوی پێ ناگات، لەبەر ئەوەی زۆر بە فیڕۆ دەدرێت؛ ماڵ هەیە هەر شێرە(بەلووعە)ی دانەناوە و هەتا دەبڕێت ئاوەکەی لێی دەڕوات. کەرکووکمان کردووەتە دوو بەشەوە کە رۆژی نا رۆژێک ئاویان بۆ بەردەدەینەوە."

سەربەست سەبری، بەڕێوەبەری ناحیەی کانی ماسێ بە رادیۆی رووداوی راگەیاند: "لە دەستپێکی ئۆپەراسیۆنەکانەوە زیاتر لە هەزار دۆنم زەوی سووتێنراون، زیاتر لە 500 مێش هەنگوین لەناو براون، ژمارەیەکی زۆر مێش هەنگوین لە چیاکاندا ماون و خاوەنەکانیان ناتوانن بچن بە لایانەوە. ئاژەڵدارەکانیش ئاژەڵەکانیان بردوونەتە گوندەکانی دەوروبەر."

د. جەمال کۆچەر، ئەندامی لیژنەی دارایی لە پەرلەمانی عێراق بە رادیۆی رووداوی راگەیاند: "بەربەستەکانی نەناردنی بەشە بودجەی هەرێمی کوردستان دوو هۆکاری سەرەکیی هەیە: یەکەمیان ئەوەیە کە حکومەتی عێراق لە دادگەی فیدراڵی تانەی لێداوە کە هەندێک شت بە دڵی ئەوان نییە. یەک بڕگە بە دڵی ئەوانە، ئەویش پشکی هەرێمی کوردستانە و دەیانەوێت ئەو دەقەی نووسراوە و بۆ پەرلەمان نێردراوە، وەکو خۆی بمێنێتەوە. دووەمیشیان ئەوەیە کە چۆن حکومەتی هەرێمی کوردستان و عێراق پابەند بن بەو رێککەوتنەوەی لەنێوانیاندا نووسراوە کە ئاخۆ بە لێبڕین لە بەشە بودجەکە بێت یان هەرێمی کوردستان پارە رادەست بکات. بنچینەیش ئەوەیە کە بەشە بودجەکە نەنێردرێت تا تانەکە یەکلایی دەبێتەوە."

نەبەز  ئیسماعیل، گوتەبێژی وەزارەتی ئەوقاف و کاروباری ئایینی بە رادیۆی رووداوی راگەیاند: "تاوەکو ئێستا هیچ ئاماژەیەکی پشتڕاستکراوە نییە کە چوارشەممە یان پێنجشەممە جەژنی رەمەزان بێت. هیچ وڵاتێک بە فەرمی دیاریی نەکردووە، ئەوەی هەیە قسەی ئەو ئەستێرەناس و رێکخراوانەیە کە لەو بوارەدا کار دەکەن. زۆر جاریش پێشبینییەکانیان راست دەردەچێت. ئەوەی ئێمە جەختی لێ دەکەینەوە ئەوەیە کە وەزاەرەتی ئەوقاف و کاروباری ئایینی لیژنەی باڵای هەیە و ئەوە بڕیاری کۆتایی دەدات."

ژمارەیەک هاونیشتمانی لە گەڕەکی جوندیانی سۆران بە رووداویان راگەیاند کە ماوەی هەفتەیەکە ئاویان نییە و بەو هۆیەوە گرفتیان بۆ دروست بووە، بەڵام ئەندازیار تەحسین سەعدوڵڵا، بەڕێوەبەری بەڕێوەبەرایەتیی ئاوی سۆران بە رادیۆی رووداوی راگەیاند: "هیچ گەڕەکێک لە سۆراندا نییە کە هەفتەیەک بێت ئاویان بۆ نەچووبێت، بەڵکو ئەوەیە کە بە کەمی ئاویان بۆ چووە. هۆکارەکەیش نەبوونی پرۆژەی پێویستە بۆ سۆران. دوایین پرۆژەی ئاو کە حکومەتی هەرێمی کوردستان لە سۆران دروستی کردووە لە ساڵی 2009دا بووە."

ئیبراهیم ئەحمەد، سەرۆکی کۆمەڵەی تالاسیمیا لە هەولێر بە رادیۆی رووداوی راگەیاند: "دەتوانین بڵێین کە لە هەرێمی کوردستاندا ساڵانە ژمارەی تووشبووانی تالاسیمیا لە زیادبووندایە و هۆکارەکەیش ئەوەیە کە لە هەریەکە لە شارەکانی هەولێر، سلێمانی و دهۆک لە سەنتەرەکاندا هیچ توێژەرێکی کۆمەڵایەتی نییە کە ئەو خێزانانەی هەڵگری تالاسیمیان راوێژیان لەگەڵدا بکرێت کە دەبێت منداڵ نەخەنەوە. لە 2020 بۆ 2021 لە هەولێر 45 نەخۆشی تالاسیمیا زیاد بوون کە نیوەیان لەو خێزانانەن کە پێشتر منداڵی دیکەی تووشبووی تالاسیمیایان هەبووە."

ئەحمەد سەفار، بڕیاردەری لیژنەی دارایی پەرلەمانی عێراق بە رادیۆی رووداوی راگەیاند: "جێبەجێنەکردنەکەی [رێککەوتنی هەولێر و بەغدا] پەیوەندیی بە پەرلەمانەوە نییە، چونکە بابەتێکی هونەرییە و دەبوو لیژنەیەکی هاوئاهەنگی دروست بکەن. پرسەکە کەمیی نەوت و نەناردنی نییە، بەڵکو بابەتەکە ژمێرەییە. دەبێت هەرێمی کوردستان ئەو بڕیە پارەیە دیاری بکات کە دەبێت رادەستی بەغدای بکات. ئیدی دوای ئەوەیش بەغدا پابەند دەبێت کە بەشە بودجەکەی بنێرێت."