رێبوار بابکەیی، ئەندامی لیژنەی وزە و سامانە سرووشتییەکان لە پەرلەمانی کوردستان بە رادیۆی رووداوی راگەیاند: "لە کابینەی پێشتری حکومەتدا ئاسانکاریی زۆر بۆ وەبەرهێنەرە بیانییەکان کراوە و بایەخیان پێدراوە کە زەوییان بۆ دابین کراوە و باج و رسووماتیان لێ وەرنەگیراوە. ئێستا حکومەتی هەرێمی کوردستان دەیەوێت پێداچوونەوەیەک بەو لایەنەدا بکاتەوە، لە هیچ وڵاتێکدا وەبەرهێنەری بیانی لە باج نابەخشرێت."

عومەر گوڵپی، ئەندامی لیژنەی دارایی و ئابووری لە پەرلەمانی کوردستان بە رادیۆی رووداوی راگەیاند: "پێموایە قەبارەی بودجەی هەرێمی کوردستان نزیکەی 13 تریلیۆن دینار بێت کە 10 تریلیۆن و نیوی بۆ مووچەیە بە تەواوەتی بەبێ لێبڕین. ئێستا داهاتی هەرێمی کورستان لە ئاست ئەو 13 تریلیۆن دینارەدایە، بۆیە حکومەت زۆر بە ئاسانی دەتوانێت خەرجییەکانی خۆی رێکبخات کە مووچە وەک خۆی دابەش بکات؛ نرخی نەوت زۆر باشە و داهات لە گومرگەکانیش زیادی کردووە. گرنگیی یاسای بودجە ئەوەیە کە مووچەی مووچەخۆران بەبێ لێبڕین جێگیر کرابێت."

مامەند محەممەد، بەڕێوەبەری ڤێتێرنەریی هەولێر بە رادیۆی رووداوی راگەیاند: "فڕێدانی پەلەوەری مردارەوەبوو بۆ نێو ئاو مەترسییەکی زۆر دروست دەکات و دەکرێت لەو رێگەیەوە بۆ زۆر پەلەوەری دیکە بگوازرێتەوە. ئێمە رامانسپاردوون کە مریشکەکان لەناو چاڵی گەورەدا بەژێر خاکەوە بکەن. هەر پەلەوەرخانەیەک پەلەوەرە مردارەوەبووەکانی فڕێبداتە ناو ئاوەوە رووبەڕووی لێپێچینەوەی یاسایی دەبێت."

ئارام حاجی نەجیم، رۆژنامەنووس و دانیشتووی هەڵەبجە بە رادیۆی رووداوی راگەیاند: "من لە بانکی هەڵەبجەدا بینیم کە ژمارەیەکی زۆر ئافرەت لە کاتی وەرگرتنی مووچەدا لەوێ بوون و بە کارتی میللیی ئێران مووچەیان وەردەگرت. کارمەندانی بانک داوایان کرد هەرکەسێک کارتی میللیی ئێرانی پێیە با بچێت کۆپییەک لەو کارتە بهێنێت. ئەوە یەکەم جار نییە و ئێمە وەکو رۆژنامەنووسان لە زووەوە قسەمان لەسەری کردووە."

کرێکارێکی کۆمپانیای شکار کە ناوەکەی لای رووداو پارێزراوە و لە ترسی سزادان نەیویست ناوی ئاشکرا بکرێت، بە رادیۆی رووداوی راگەیاند: "پێشتر کرێکار مانگانە 350 هەزار بۆ 450 هەزار دیناری وەردەگرت، بەڵام ئێستاکە 300 هەزار دینارە. لە بنچینەیشدا لە گرێبەستەکەماندا 900 هەزار دینار نووسراوە. رۆژانە حەوت کاژێر کاردەکەین و رۆژی هەینی پشوومانە. رۆژانەمان 10 هەزار دینار، بەڵام ئەگەر رۆژێک دەوام نەکەین 30 هەزار دینارمان لێ دەستێنن."