عومەر گوڵپی، ئەندامی لیژنەی دارایی و ئابووری لە پەرلەمانی کوردستان بە رادیۆی رووداوی راگەیاند: "لە بواری گومرگدا بەهۆی قاچاخچێتیی کەسانی دەسەڵاتدارەوە پارەیەکی زۆر گەورە بۆ خەزێنەی گشتی ناگەڕێتەوە کە من خەمڵاندوومە ئەو پارەیەی بەهۆی قاچاخچێتی و خراپیی سیستم لە خاڵە گومرگی و سنوورییەکاندا بە هەدەر دەدرێت ساڵانە دوو ملیار دۆلارە کە ئەوە بۆ بودجەی هەرێمی کوردستان پاڵپشتییەکی زۆر گەورەیە. ئەگەر پرۆژەیاسای بودجە لە پشتیەوە ویستێکی بەهێزی سیاسی هەبێت، دەبێتە هۆی ئەوەی داهاتەکان بۆ خەزێنەی گشتی بگەڕێنەوە و بەوەیش بەشێکی زۆری کێشەکانی هەرێمی کوردستان چارەسەر دەبن."

سەعید عومەر، بەڕێوەبەری سایلۆی هەولێر بە رادیۆی رووداوی راگەیاند: "مانگێکە دەستمان بە دابەشکردنی ئەو چەکی پارەی جووتیاران بۆ ساڵەکانی 2014، 2015 و 2016 کردووە. هی 2014مان تەواو کردووە، هی 2015یش چەند چەکێک ماوە و ئەمڕۆیش دەستمان بە دابەشکردنی چەکی پارەی ئەو جووتیارانە کردووە کە لە 25ـی ئایاری 2016 تا 31ـی ئایاری هەمان ساڵ گەنمیان رادەستی سایلۆی هەولێر کردووە و، کۆی گشتیی ئەو پارەیەیش نزیکەی 65 ملیار دینارە."

لەشکر حەمید، سەرۆکی لیژنە هاوبەشەکانی قایمقامیەتی سلێمانی بە رادیۆی رووداوی راگەیاند: "لەم 20 رۆژەی رەمەزاندا زیاتر لە پێنج هەزار و 600 جار سەردانی شوێنە گشتییەکانمان کردووە. تەنیا 240 پسووڵەی سەرپێچیمان کردووە و هەشت کەس دراونەتە دادگە و دەستبەسەر کراون. دەست بەسەر زیاتر لە 48 تۆن خۆراک و کاڵای بەسەرچوودا گیراوە و زیاتر لە 62 شوێن داخراون. بە بەهای زیاتر لە 28 ملیۆن دینار سزای ئەو شوێنانە دراوە کە سەرپێچییان کردووە و پابەند نەبوون."

لیوا عەبدولخالق تەڵعەت، نوێنەری هەردوو وەزارەتی ناوخۆ و پێشمەرگە لە فەرماندەیی ئۆپەراسیۆنەکانی عێراق بە رادیۆی رووداوی راگەیاند: "کەس ناتوانێت ژمارەی چەکدارانی داعش لە عێراقدا بخەمڵێنێت، بەڵام رۆژبەڕۆژ لە تکریت، کەرکووک و دیالە چەکدارانیان لە زیادبووندان و هێزیان زیاتر دەبێت. دەبێت بە هەموو لایەکەوە رێگری بکەین بەۆ ئەوەی ئەوە دووبارە نەبێتەوە کە ساڵی 2014 روویدا."

د. ئارام رۆستەم، سەرپەرشتیاری لیژنەی کڕینی ڤاکسین بۆ هەرێمی کوردستان بە رادیۆی رووداوی راگەیاند: "سەرەڕای ئەوەی خەڵکی خۆمان بە گشتی هۆشیاریی تەندروستیی کەمە کە رێکاری خۆپارێزی لە ڤاکسینەکە ناگرنە بەر، هاوکات رەنگە هەندێک لە وڵاتانی دراوسێ کارمان لەسەر بکەن بۆ ئەوەی رێژەی نەخۆشی لەناو هەرێمی کوردستاندا زیاد ببێت."

دڵزار عەبدولوەهاب، بەڕێوەبەری بەوەکالەتی دابەشکردنی ئاوی هەولێر بە رادیۆی رووداوی راگەیاند: "بە هۆکارێکی تەکنیکی بۆریی ئاوی ئیفراز-3 شکاوە. ئەوەیش دەبێتە هۆی ئەوەی کە نزیکەی 35٪-40٪ـی گەڕەکەکانی هەولێر بێئاو ببن، وەک گەڕەکەکانی هاوکاری، راپەڕین و زیلان کە ناوچەکانی رێگەی کۆیە و رێگەی موسڵ و رێگەی شەقلاوە دەگرێتەوە."

د. بژار مووسا، گوتەبێژی بەڕێوبەرایەتیی تەندروستیی هەولێر بە رادیۆی رووداوی راگەیاند: "نزیکەی 50 هەزار هاونیشتمانی لە سیستمی داشبۆردی وەزارەتی تەندروستیدا ناوی خۆیان بۆ کوتان بە ڤاکسینی کۆرۆنا تۆمار کردووە، نزیکەی 22 هەزار کەس لە هەولێر ڤاکسینیان لێدراوە، ئەوەیش ژمارەیەکی باشە و پرۆسەکەیش بەردەوامە."

شێروان دووبەردانی، سەرۆکی لیژنەی هەرێم و پارێزگاکان لە پەرلەمانی عێراق بە رادیۆی رووداوی راگەیاند: "رۆژی 1ـی ئایار یەکەم کاروانی خێزانە داعشییەکان لە کەمپی هۆلەوە بۆ موسڵ بەڕێ دەکەون کە لە کەمپی جەدعە-1ـی باشووری موسڵ جێگیر دەکرێن. 500 چادریان بۆ هەڵدراوە و رێکخراوی ئای ئۆ ئێن کە تایبەتە بە ئاوارەکان لەگەڵ وەزارەتی کۆچ و کۆچبەران و رێکخراوی ئۆچادا ئەو کەمپەیان دروست کردووە. ئەم کاروانی یەکەمە لە 100 خێزان پێکهاتوون کە زیاتر لە 700 کەسن کە رۆژی 2ی ئایار 250 کەسیان دەگەنە کەمپەکە."