Jólagjafir geta verið margvíslegar; stórar, litlar, praktískar og skemmtilegar og svo er óumdeildur munurinn á hörðum pökkum og mjúkum. UNICEF, Barnahjálp Sameinuðu þjóðanna hefur, ásamt auðvitað ýmsum öðrum hjálparstofnunum lagt sitt að mörkum undanfarin ár til að auðvelda fólki að finna sannar gjafir - kannski ekki síst handa þeim flokki fólks sem „á allt“. Við skoðuðum í dag hvað það er sem UNICEF er að bjóða, hvað stendur á bak við þessar gjafir og forvitnuðumst í leiðinni hvernig fjáröflun hefur gengið á þessu sérkennilega ári. Steinunn Jakobsdóttir kynningarstjóri og fjölmiðlafulltrúi sagði nánar frá í þættinum í dag.

Á því herrans ári 1780 rak fólk á bæjum við Eyjafjörð upp stór augu er það sá tvo menn koma af Vaðlaheiði og fara undan brekkunni sem fugl flygi, þótt fannkyngi væri og mesta ófærð. Reyndurst þetta vera tveir ungir menn úr Þingeyjarsýslu á skíðum. Við fengum sendar Óbyggðafréttir frá Óbyggðasetri Íslands á Egilsstöðum þar sem meðal annars þessi saga af skíðamönnunum tveimur á 18.öld er rifjuð upp. Óbyggðasetrið er staðsett á innsta bænum í Fljótsdal, á brún stærstu óbyggða Norður Evrópu. Þar er allt hannað til að leyfa gestum að upplifa anda fortíðarinnar á Íslandi. Við hringdum austur og heyrðum í Steingrími Karlssyni, framkvæmdastjóra setursins í þættinum.

Á dögunum bárust á Strandir bókakassar - það væri líklega ekki frásögur færandi nema vegna þess að í þessum kössum voru bækur útgefnar á Ströndum, Strandir 1918 - ferðalag til fortíðar. Kristín Einarsdóttir, okkar kona á Ströndum, hitti ritstjórann og einn greinarhöfund, þjóðfræðifeðginin Jón Jónsson og Dagrúnu Ósk Jónsdóttur.

UMSJÓN GUNNAR HANSSON OG MARGRÉT BLÖNDAL