Cun tuns dals onns 50 enfin ils onns 80 preschenta «Noss chors» in matg da chanzuns or da l'archiv. Chors maschadads, chors da dunnas, chors virils e chors d'uffants emplainan quest'ura cun registraziuns dal passà.

Cun registraziuns da furmaziuns ch'èn existentas gia dapi ina massa onns, ma era cun tuns e suns da chors ch'i na dat oz betg pli, datti in'ura cun chant or da las regiuns pli profundas da noss archiv. Cun chanzuns sco «Igl fridel» chantà dal Chor da dunnas Rezia Cuira u «Alla patria» dal Chor viril da Laax giain nus enavos enfin en ils onns 1950.