Il primo bacio, il Valser da Mattinadas, la mazurca da la panaglia, il Bal da Büman a Ramosch ed autras perlas.

La musica populara era pli baud la musica per far festa e per ballar. Ed il temp da la fin da l’onn vegl e dal principi dal onn nov era quel dals bals tradiziunals. Quels da «Babania», da Büman, da Mattinadas e blers auters. En la populara dad oz udis questas melodias enconuschentas che vegnivan sunadas savens durant quels dis: «La mazurca da la panaglia», «Eviva las mattinadas», «Il tschigrun», «Il galop dals Ernis», e «La resgia nova». I sunan las chapellas Erni, Engiadina, dals Fränzlis da Tschlin, da la chapella Barba Peder e da la chapella Tasna.