हो - "जीवन के शब्द" .3gp //କୋରନ୍ତି ମଣ୍ଡଳିରେନ୍କତାଃତେ ପାଉଲ୍ ଅଲ୍ କୁଲ୍ଲେଡ୍ ପର୍ତମ୍ ଚିଟି 131. ଆଞ୍ ମାନାମିକୱାଃ ତାଙ୍ଗାନ୍ ତାଙ୍ଗାନ୍ କାଜିକ ଅଣ୍ଡଃ ସିର୍ମେ ଦୁଉତୁକୱାଃ ଜାଗାର୍କଞ୍ ଜାଗାର୍ ଏତଏରେୟ, ଆଞାଃ ମନ୍-ଅନ୍ତର୍ରେ ଦୁଲାଳ୍ ବାନଃରେଦ, ଆଞ୍ଦ ସାମାଗେ ଏସୁ କେଳେଃତେ ରୁ' ସାଳିତେୟାଃ ଗାଣ୍ଟା ଲିକାଗେ, ବାନ୍ରେଦ ଚାୟମ୍ ଚାୟମ୍ ସାଳିତେୟାଃ କର୍ତାଲ୍ ଲିକାଗେ। 2. ଇସର୍ତାଃୟେତେ ନାମେ କାଜିକ ଆୟାର୍-ଉଦୁବେତେୟାଃ ଦା'ନ୍ ଆଞ୍ତାଃରେ ମିନାଃରେୟ, ସବେନ୍ ଉକୁ ଦାନାଙ୍ଗାକାନ୍ କାଜିକଞ୍ ଆଦା ଦାଇତେୟାଃ ଦା'ନ୍ ଆଞ୍ତାଃରେ ମିନାଃରେୟ, ଚି ସବେନାଃରେୟାଃ ସୀୟାଁ ଆଞ୍ତାଃରେ ମିନାଃରେୟ, ଅଣ୍ଡଃ ବୁରୁକ ଆତମ୍ ଇଚି ଦାଇ ଲିକାନ୍ କେଳେଃ ବିସାସ୍ ଆଞ୍ତାଃରେ ମିନାଃରେୟ, ଆଞାଃ ଅନ୍ତର୍ରେ ଦୁଲାଳ୍ ବାନଃରେଦ ଆଞ୍ଦ ସାମାଃନିଃଗେ। 3. ଆଞ୍ତାଃରେ ମିନାଃତେୟାଃ ସବେନ୍ ବିତି-ସାତିକ ରେଙ୍ଗେ-ରାବାଙ୍ଗ୍କଞ୍ ଏମ୍ ଚାବାକରେୟ, ଆଞାଃ ହମ ଜୁଲ୍ତେନ୍ ସେଙ୍ଗେଲ୍ରେଞ୍ ଉରୁବ୍ ଇଚି'ରେୟଗେ ଆଞାଃ ଅନ୍ତର୍ରେ ଦୁଲାଳ୍ ବାନଃରେଦ ଆଞାଃ ଲାଗିଡ୍ ଜା'ନ୍ ଲା'ବ ବାନଃଆ। 4. ଆବୁଏଃ ଅନ୍ତର୍ରେ ଦୁଲାଳ୍ ମିନାଃରେଦ ସବେନ୍ ଲିକାନାଃବୁ ସା'ତିଙ୍ଗିୟା, ସବେନ୍କବୁ ଦାୟା-ଉଳୁଃକୱା, ହିପିସିଙ୍ଗେ କାବୁୱେ, କାବୁ ତୁଲ୍ ରାକାବେନା, କାବୁ ମାମାରାଙ୍ଗେନା, 5. ପେତଙ୍ଗ୍-କେଚଳ କାବୁୱେ। ଆବୁଏଃ ଅନ୍ତର୍ରେ ଦୁଲାଳ୍ ମିନାଃରେଦ ଆପାନାଃଗେ ସୁମେଡ୍ କାବୁ ଉଳୁଃୱେ। ହୁପ୍ଟେଗେ କାବୁ କୁର୍କୁରଃୱା, ଇଟାଃକ ଆବୁ ବିରଦରେକ ପାଇଟିତେତେୟାଃକ କାବୁ ଉଳୁଃ ରିକେୟା। 6. ଏଡ୍କାନ୍ ପାଇଟିକରେ କାବୁ ରାଁସାନା, ମେନ୍ଦ ସାରିତେୟାଃରେବୁ ରାଁସାନା। 7. ଆବୁଏଃ ଅନ୍ତର୍ରେ ଦୁଲାଳ୍ ମିନାଃରେଦ, ସବେନାଃବୁ ଗଃ-ସା'ତିଙ୍ଗିୟା, ସବେନାଃରେବୁ ବିସାସୟା, ସବେନାଃରେବୁ ଆସାରାନା, କା ମୁକୁଞଃତେ ସବେନାଃବୁ ସା'ତିଙ୍ଗିୟା। 8. ହୋକ ଆୟାର୍-ଉଦୁବେତାନ୍ କାଜିକଦ ମୁଚେଡଃୱା, କା ଆଦାନ୍ ତାଙ୍ଗାନ୍ ତାଙ୍ଗାନ୍ କାଜିକ ଜାଗାର୍ତେୟାଃକ ମୁଚେଡଃୱା, ଅଣ୍ଡଃ ହୋକତାଃରେ ମିନାଃତେୟାଃ ସୀୟାଁ-ଆଟ୍କାର୍କ ମୁଚେଡଃୱା। ମେନ୍ଦ ଦୁଲାଳ୍ଦ ଚୁଇଲେଅ କା ମୁଚେଡଃୱା। 9. ନାଃ ସବେନାଃରେୟାଃ ପୁରେଃ ଲିକାତେ କାବୁ ଆଦାନା, ମେନ୍ଦ ତାରାଗେବୁ ଆଦାନା, ତାରାଗେବୁ କାଜି ଆୟାର୍-ଉଦୁବ୍ ଦାଇତେନେ। 10. ମେନ୍ଦ ଚାନାବ୍ତେ ପୁରେ ଉତେର୍ତେୟାଃଦ ହୁଜୁଃରେ, କା ପୁରେଲେନ୍ତେୟାଃକଦ ମୁଚେଡଃୱା। 11. ଆଞ୍ ବାଲେ ସିଟିୟେଞ୍ ତାଇକେନ୍ରେ, ବାଲେ ସିଟିୟେକ ଲିକାଗେଞ୍ ଜାଗାର୍କିନା, ବାଲେ ସିଟିୟେକ ଉଳୁଃତେନ୍ ଲିକାଗେଞ୍ ଉଳୁଃକିନା, ବାଲେ ସିଟିୟେକ ଲିକାଗେଞ୍ ଉଳୁଃ ବିଚେର୍କିନା। ମେନ୍ଦ ମାରାଙ୍ଗିୟାନ୍ରେଦଞ୍ ସିଟିୟେକ ଲିକାନ୍ ଉଳୁଃ ବିଚେର୍କ ଅଣ୍ଡଃ ସେସେନ୍କଞ୍ ବାଗେକିଡା। 12. ନାଃ ଆବୁ ନେଲେତାନ୍ ସବେନାଃଦ ତାରା-କିଚା ଆର୍ସିରେ ଗାନ୍ଦାରାଏଗେବୁ ନେଲେନ୍ତାନ୍ ଲିକାଗେବୁ ନେଲେତାନା। ମେନ୍ଦ ଚାନାବ୍ତେ ମେଡ୍-ସାମାନାଙ୍ଗ୍ରେ ସବେନାଃବୁ ନେଲିୟା। ନାଃଦ ଇସର୍ ତାରାଗେଞ୍ ଆଟ୍କାର୍-ଉରୁମି'ତେନେ। ମେନ୍ଦ ଇମିତେଦ ଆଞ୍ ପୁରେ ଲିକାତେ, ଇସର୍ ଆଞ୍ ପୁରେତେଃ ଆଟ୍କାରିଞ୍ତେନ୍ ଲିକାଗେ ଇନିଃଞ୍ ଆଟ୍କାର୍-ଉରୁମି'ୟେ। 13. ଇନାମେନ୍ତେ ବିସାସ୍, ଆସାରା, ଅଣ୍ଡଃ ଦୁଲାଳ୍, ନେନ୍ ଆପିୟେଗେ ତାଇୟେକେନଃୱା। ଅଣ୍ଡଃ ନେନ୍ ଆପିୟେ'ତେ ଦୁଲାଳ୍ଗେ ମାରାଙ୍ଗା।
