«Voukslied» «Volksliad» «Volksliäd» – tudestg svizzer n'è betg simplamain tudestg svizzer. Cun chanzuns in differents dialects vulain nus preschentar oz ina paletta da chanzuns da la Svizra tudestga.

La quadrilinguitad en Svizra è ina da las grondas spezialitads da nossa cultura. Mintga singula regiun linguistica ha dentant anc atgnas particularitads. En la part tudestga discurr'ins da differents dialects. Uschè ha era mintga chantun sias atgnas chanzuns tradiziunalas en l'agen dialect.

Sper la chanzun populara tradiziunala naschan adina dapli arranschaments novs che dattan ina nova tempra a quel gener da chanzuns. Oz datti ina maschaida d'innovaziun e tradiziun or dal repertori da chanzuns da las regiuns tudestgas da noss pajais.