في هاي الحلقة من Shiftأهل، بنستضيف غزالة زيدان وتامر عواد، زوج وأهل لشادي اللي عمره ٧ شهور وأصحاب شركة بوستن جروب. غزالة، معلمة لغة إنجليزية، وتامر، كاتب وصانع محتوى، بشاركونا بقصتهم من التعارف في مقابلة عمل لحد ما صاروا عائلة صغيرة عندها حضور بضحك على السوشال ميديا.

رحلتهم بتبدأ بمقابلة عمل تحولت لقصة حب سريعة خلال الكورونا، وزواج اتخذ قراره بسرعة لأنه الإثنين جايين من علاقات سابقة "مطبشين" وفهموا إنه هاي هي العلاقة الصح.

 بس الحكاية الحقيقية بتبدأ بشهر عسل كان المفروض يكون حلم رومانسي، بس تحول لمغامرة كوميدية لما اكتشفت غزالة إنها محضرة حالها لمناشف على شكل بطه… وطلع تامر حاجز تختين في سكن طلابي (هاهاهاها!)

ومن هناك منتقل لرحلة الأبوة والأمومة الحقيقية، وكيف اكتشفوا انه الكتب والنصائح اشي والواقع اشي ثاني كلياً. وبالنهاية منشوف كيف قرروا يشاركوا هاي الرحلة مع العالم، مش عشان يفرجوا حياة مثالية، بس عشان يقولوا للناس إنه الحياة حلوة كيف ما هي. 

حلقة بتخليكو تضحكوا وتفكروا- غزالة وهي بتحكي بصراحة إنها احتاجت 6 شهور عشان تحس إنها أم فعلاً، تامر وهو بيكشف التحديات اللي بواجهوها الرجال بعد الولادة، وقصص كوميدية عن أخطاء الأهل الجدد اللي بتخليكو تحسوا إنكو مش لحالكو.

حلقة مهمة للأزواج الجداد، الأهل، وكل حدا بحب القصص الحقيقية اللي بتكسر الصور المثالية وبتفرجي الحياة زي ما هي - بكل بساطتها وصعوباتها وجمالها.

شاركونا آراءكم وتجاربكم! تابعونا على Instagram و TikTok للمزيد من المحتوى والمقاطع المميزة- @shiftahel

Shiftأهل - بودكاست عن التجارب الحقيقية للأهل في عالمنا العربي تقديم بيسان أبو عبيد, متوفر على منصات البودكاست

خليل حميدي، نائب المدير العام في جمعية علم - جمعية للعناية بالشباب والشبيبة بضائقة.

مع خليل راح نحكي عن التحديات اللي بتواجه الشباب بعمر 16-24، هاي الفئة العمرية اللي مش أولاد بس كمان مش رجال - مرحلة انتقالية حساسة بتتطلب فهم عميق من الأهل والمجتمع.

من خلال خبرته المهنية الواسعة، خليل بيوضحلنا كيف هاي المرحلة هي مرحلة فيها بلورة الهوية- الشاب بده يبحث ويستكشف ويفحص حدود نفسه عشان يعرف مين هو وإيش بده من الحياة. بيشرحلنا ليش الشباب بهاي العمر بيحتاجوا مساحة للتجارب والاستكشاف، وكيف التوقعات المجتمعية منهم إنهم يكونوا "رجال" بتخلق صدام مع احتياجاتهم الطبيعية.

الحديث بيتطرق كمان للتشويشات الخطيرة اللي بتواجه شبابنا - من الفقر والضغوط الاقتصادية لتحديات الهوية كفلسطينيين عايشين بواقع مركب، ومن عدم وجود أطر مناسبة بعد المدرسة, حتى للانجذاب المؤسف لعالم الإجرام كحل سريع وخطير لاحتياجاتهم المادية والنفسية.

خليل بحكي بصراحة عن كيف المجتمع والبيئة المحيطة بتساهم أحياناً في دفع الشباب نحو خيارات خاطئة، وكيف غياب الدعم النفسي والمرافقة المهنية بتخلي الشباب يواجهوا هاي التحديات لحالهم.

الحلقة كمان بتقدم حلول عملية وأمل حقيقي- خليل بأكدلنا على أهمية المرافقة المهنية، بناء أطر انتقالية مناسبة لهاي الفئة، ودور الأهل الحقيقي في فهم ودعم أولادهم بهاي المرحلة الحساسة. بيشارك قصص نجاح ملهمة لشباب قدروا يغيروا مسارهم ويبنوا حياة أفضل بالدعم والمرافقة المناسبة.

هاي الحلقة مش بس للأهل، هي ضرورية لكل واحد منا مهتم بفهم الشباب وبناء مجتمع داعم.

بهاي الحلقة من Shiftأهل، معي أثير هدره  وابنه حبيب من قلنسوة  وبشاركونا تجربتهم المميزة في عالم الغوص

أثير بغوص من زمان، وقرر ينقل شغفه لابنه- "الغوص مش بس هواية، هي طريقة لبناء الثقة بالنفس" - هيك بلخص أثير طريقته في التربية. 

بنتعرف على حبيب، طالب صف رابع، وأصغر غواص مرخّص بعمره. بحكيلنا بلغته البريئة عن أول غطسة، عن الخوف، عن الحماس، عن المرجان والأسماك، وعن المدرب زيزو اللي ساعده  ورافقه بهاي التجربة.

ومنسمع كمان من أثير عن تردد الأم، عن قلق الأهل الطبيعي، وعن قراره يعطي حبيب هاي الفرصة عشان يتعلّم يستقل ويواجه التحديات في المستقبل. 

الحلقة عن علاقة مميزة بين أب وابنه، فيها محبة, دعم وثقة كبيرة. ومنشوف كيف أثرت تجربة الغوص على شخصية حبيب، حتى بالمدرسة وبين أصحابه، وكيف صار يلهم أطفال بعمره.

وبتفتح قدامنا سؤال مهم: كيف منوازن بين خوفنا على اولادنا، ورغبتنا نوسّع آفاقهم ونشجّعهم يخوضوا تجارب بتغيّرهم؟

هاي الحلقة مش بس عن الغوص، كمان عن كيف ممكن الأهل يفتحوا مجال لأولادهم يعيشوا تجارب جديدة ,  تبني شخصيتهم وتعطيهم مهارات للحياة.

سماهر شنبور زعطوط، مفتشة الاستشارة التربوية في المدارس وأم لثلاثة أبناء، بتشارك معنا خبرتها الي بتتجاوز 25 سن في سلك التربية والتعليم ومنحكي معها عن موضوع بشغل بال كل أهل: تأثير مشهد العنف والجريمة على أطفالنا.

"أطفالنا مش بس بعرفوا عن مشهد العنف، هن سامعين شايفين وعايشين" - بهاي الكلمات بتلخص سماهر واقع أطفالنا اليوم، وبتحكي عن كيف بيتفاعلوا مع مشاهد العنف بمختلف الأعمار.

منتعرف في الحلقة على التأثيرات النفسية والسلوكية للعنف على الأطفال، من عمر الروضة للمراهق. وبتشاركنا سماهر من تجربتها المهنية في المدارس كيف بنقدر نرصد علامات تأثر الأطفال بالعنف، وإيش لازم نعمل كأهل ومربيين.

بتشاركنا سماهر بخطط العمل الي بتتبعها المؤسسات التربوية وبتحكيلنا عن مفهوم "الساعة الذهبية" للتدخل لما بتعرض الطفال لمشاهد عنيفة، وكيف نتعامل مع "دوائر الإصابة" المختلفة حسب قرب الطفل من الحدث.

سماهر بتشدد على انه احنا "مرآة لأولادنا"، وبتحذر من خطورة تبلد المشاعر عند الأطفال.  بس كمان بتقدملنا أدوات عملية لبناء حصانة نفسية عند أطفالنا، وبتأكد على أهمية فتح مساحات آمنة للحوار معهم. وبتختم الحوار بمفهوم "الهامش الأصفر" اللي ممكن يرشدنا بأوقات الأزمات.

هاي الحلقة بتأكد انه مسؤوليتنا المشتركة - كأهل ومدرسة وكمجتمع - نبني شبكة دعم متكاملة لحماية أطفالنا. 

الحلقة مش بس للأهل، هي لكل مهتم ببناء مجتمع آمن لأطفالنا وأجيالنا القادمة.

في هاي الحلقة المميزة, بستضيف سهى سلمان وعوني موسى، زوج وأهل لنعيم وراني, جمعهم الحب والارتباط رغم اختلاف خلفياتهم الدينية.  

بتبلش القصة في الجامعة العبرية بالقدس سنة 1994، كانت سهى بسنتها الأولى وعوني بسنته الثانية، وكان نشيط بلجنة الطلاب العرب واستقطب سهى للانضمام للحراك الطلابي. سهى المسيحية وعوني المسلم لاقوا ببعض اشي مميز أكبر من الاختلاف الديني - احترام وعدم حكم وتفاهم.

الحلقة بتحكي عن التحديات الكبيرة اللي واجهوها، خاصة من ناحية الأهل والمجتمع، وكيف استمروا بالرغم من الصعوبات والانقطاع مع الأهل لفترة… و لحد ما صار في تحسن بالعلاقة ورجعت ولا كأنه كان في انقطاع. سهى بتحكي من قلبها عن شعورها بالوحدة لما كانت مش قريبة من أهلها، وكيف كان عوني واقف معها بهاي الفترة الصعبة.

بحدثونا الزوج عن تكوين عائلتهم المشتركة وتربية اولادهم (نعيم، 24 عام، وراني، 14 عام) على قيم بتتجاوز الحدود الدينية، وبتركز على الاحترام، وتقبل الآخر.

في الحلقة كمان منحكي عن تنقل العائلة بين مدن مختلفة - القدس، حيفا، نيويورك، والناصرة - وكيف أثرت هاي التجارب المتنوعة على نظرتهم للعالم وتكوين هويتهم. ومنوصل لوضعهم الحالي اليوم الي  في عوني بشتغل في بوستن مع شركة موديرنا كخبير في مجال الذكاء الاصطناعي ونظم المعلوماتية، وسهى مركز مساواة وبتعيش مع راني ابنهم الاصغر في الناصرة.

بين ثنايا الحديث، منكتشف استراتيجيات التواصل الي ساعدت الزوج على تخطي الخلافات واستيعاب غضب العائلة والمجتمع، ورسالتهم الأساسية كانت رسالة تدعو لمجتمع أكثر انفتاح وتقبل للاختلاف.

حوار عميق وصادق بفتح نافذة على تجربة إنسانية غنية، وبدعونا للتفكير كيف ممكن نبني علاقات متينة بتتجاوز الحواجز المجتمعية والدينية، وبتأسس لمفهوم جديد للعائلة , بقوم على الحب والاحترام المتبادل.

في هاي الحلقة من أهلShift ، بنستضيف فاطمة أبو عصبة ٠ أم لمرسيل وزوجة قصي – لتحكيلنا قصتها الشخصية وتجربتها مع علاجات الخصوبة  (IVF)  بكل شجاعة وصدق. فاطمة بتفتح قلبها وبتشاركنا تفاصيل رحلتها الطويلة والعاطفية مع علاجات ال IVF، من سبع محاولات علاجية حتى لحظة حملها بمرسيل.

منحكي مع فاطمة عن تجربة الدخول لحمل من منظور مختلف: كيف أثرت العلاجات على حياتها اليومية، على شغلها، على نفسيتها، على علاقاتها الاجتماعية وعلى أبسط تفاصيل روتينها.

بتحكيلنا عن التحضير النفسي والجسدي لكل محاولة، وعن خطة الأدوية المكثفة، المواعيد الصارمة، وكثافة العلاج كلها. فاطمة شاركتنا بكيف كان الاطلاع المسبق على التفاصيل والمراحل جزء من آلية التكيف اللي طورتها -  كل ما عرفت أكثر، كل ما حسّت إنها مسيطرة أكثر. 

شجاعة فاطمة بمشاركة هاي التجربة مش بس شهادة شخصية، إنما رسالة أوسع لكل أم، ولكل زوج بفكروا بالإنجاب، وحتى للمجتمع ككل. من خلال حوارنا، منكتشف كيف تجربة الإخصاب خارج الرحم مش مجرد تجربة طبية - هي تجربة إنسانية فيها تحدي، عزيمة، وحساسية عالية للذات وللآخرين.

فاطمة بتكسر صمت حوالين مواضيع الحمل والصحة الإنجابية في مجتمعنا، وبتفتح باب مهم لحوار صادق حوالين إشي غالباً منخفف من الحساسية بالتوجه لاله والحكي عنه ، ومنطرح أسئله على غيرنا بدون إدراك لتأثيرها عليهم وعلى مشاعرهم. من خلال حديثها، منعيد التفكير بمفهوم الأمومة، الشراكة، والصبر. 

حلقة عميقة، صادقة، ومليانة مشاعر، بتدعونا نسمع، نتفهم، ونتعامل مع قضايا الصحة الإنجابية بحساسية أعمق وإنسانية أكبر.

في هاي الحلقة من Shift أهل، راح نسمع صوت بنت عمرها 11 سنة - أنجلينا خوري.بتحكي بثقة، بفضول، وبتلقائية عن عالمها: التيك توك، الصاحبات، الشهرة، المدرسة، واللعب.وأنا أسمع الحلقة بعد ما تسجلت، حسّيت في جانب ناقص إذا بنسمعها لحالها. قررت أرجع لبعض المقاطع، وأدعو أمها اللي بتمشي معها بهاي المراحل وبتواجه نفس الأسئلة، تسمعهم معي ونحكي عليهم سوا. الأم هي نادرة هندو خوري - أم أنجلينا وشربل، زوجة غسان خوري، ومهندسة معمارية.طلبت منها نسمع سوا بعض المقاطع من مقابلة أنجلينا، ونوقف عند كل مقطع شوي.مش من باب المحاسبة أو التصحيح بس من باب المشاركة، ومن باب الأم اللي بتحاول تفهم وتواكب، زيّنا كلنا.هاي الحلقة مميزة لأنها مش حوار مباشر بين أم وبنت، كأنها مرايتين، كل وحدة بتحكي من عالمها وبصوتها. منسمع البنت أول، وبعدها الأم، وكل واحدة بتفتح نافذة صغيرة على واقعها، بدون ما يسمعوا بعض فعليًا، بس إحنا كمستمعين... منسمع الطرفين، ومنشوف الصورة كاملة شوي شوي. إحنا كأهل عم نربّي أولادنا بعصر إحنا نفسنا ما عشناه، ومش متمكنين منه تمامًا. كيف نتعامل مع الشاشات؟ مع الأحلام بالشهرة؟ مع الاستقلالية والمراهقة اللي بتيجي بدري؟مش راح نعطي أجوبة، بس راح نفتح باب للحوار والتفكير. أنجلينا رح تحكي، نادرة رح تحكي، وأنا وإنتو... رح نسمع ونفكر سوا.

في الحلقة الثانية من سلسلة حواراتنا مع د. شهاب إدريس، محاضر وباحث في العلوم الاجتماعية، منكمل نتعمق في بحثه بعنوان: "الوالدية في المجتمع الفلسطيني في العصر النيوليبرالي: نظرة إثنوغرافية على الأسر الفلسطينية". 

في الحلقة السابقة حكينا عن مفهوم الوالدية بشكل عام،وبهاي الحلقة منركز بشكل خاص على أزمة الأبوة ومفاهيم الرجولة المتغيرة في السياق الفلسطيني المعاصر.

د. شهاب بحكي عن "الأزمة المضاعفة" اللي بعيشها الآباء الفلسطينيين – بين ضغط السياسات والاقتصاد من جهة، والتغييرات الكبيرة بأدوار الأهل داخل العيلة من جهة ثانية.

منحكي كيف تحولت أدوار الأب عبر الأجيال، من المفهوم التقليدي للرجل كمعيل أساسي، للتوقعات الجديدة الي بتشمل المشاركة العاطفية والتربوية. وبينما النساء بتتحمل "دور مضاعف" - العمل خارج المنزل والرعاية داخله - الرجال في حالة من التعليق والتردد.

بقدم د. شهاب مفهوم "توسيع الرجولة" كإطار للتغيير وبطرح تساؤلات محورية: ماذا لو "دخل الأب البيت"؟ كيف ممكن نحول مفاهيم "الشهامة" و"الجدعنة" لتشمل التواصل العاطفي مع الأبناء؟

حوار عميق بركز على كيف انه هاي التغييرات مش بس مجرد قضايا فردية، هي صورة كاملة لتحولات اجتماعية واقتصادية وسياسية أعمق بتشكل وبتأثر على النسيج العائلي الفلسطيني اليوم.

اسمعوا الحلقة لفهم التحديات الحقيقية من ورا أزمة الأبوة اليوم، والخطوات الممكنة لتحقيق دور أبوي متوازن بجمع بين قيمنا التقليدية واحتياجات عصرنا الحالي.

في هاي الحلقة منستضيف مي نداف قعدان, أم لإلياس، ميرنا وجوليا، ومؤسسة ومديرة مركز "خطوات مي للإيقاع الحركي". مي بتحكي عن تجربة حملها بجوليا بعد تشخيص طبي نادر وصعب. "بدك معجزة" — هيك حكى الطبيب، ومن هون بلشت رحلة مليانة قرارات، خوف، وإيمان. منحكي عن لحظات الصدمة، عن التردد، عن المسؤوليات اليومية كأم عاملة لطفلين، وعن كيف تعاملت مع كل هاي التحديات.

هاي مش بس قصة طبية -  هاي قصة صبر، عن الأمومة تحت الضغط، وعن القدرة نكمّل رغم كل إشي.

اسمعوا الحلقة لتتعرفوا على تجربة إنسانية حقيقية، وعلى كيف الصبر والإيمان ممكن يخلقوا المعجزات، وكيف الصعوبات بتكشف عن قوة جوانا ما كنا نعرف إنها موجودة أصلاً.

في الحلقة الرابعة والأخيرة من سلسلة رمضان، استضفنا الشيخ خالد صباح، المشرف الإداري في منطقة الجليل بمؤسسة الفرقان لتعليم وتحفيظ القرآن الكريم.

تحدث معنا الشيخ خالد عن تجربته الفريدة كإمام من عمر العشر سنوات، وكيف شعر من وقتها انه كانت هاي دعوة من الله. بحكيلنا كمان عن تجربته خلال شهر رمضان كطفل في عكا القديمة وكيف كان يقوم بدور المسحراتي يفيق الناس للسحور، وكمان شاركنا رؤيته للفرق بين رمضان في الماضي ورمضان اليوم.

من أجمل ما بميز اللقاء مع الشيخ هو طرحه لقيم ومعاني رمضان الحقيقية، وكيف ممكن توصل لألي  فقدوا الصبر والاحترام لهذا الشهر الفضيل. بأسلوب بسيط ومؤثر، بخاطب الشيخ خالد العقول والقلوب، بذكرنا بأنه رمضان مش مجرد امتناع عن الطعام والشراب، انما هو فرصة للتغيير الروحي والنفسي العميق وإعادة التواصل مع كتاب الله.

عبّر الشيخ خالد عن رحلته مع القرآن بقوله: "بدايتي مع القرآن وأملي أن تكون نهايتي مع القرآن"، هاي مسيرته الإيمانية - بدأت من الطفولة وراح تستمر مدى الحياة، ودعى المستمعين ليعودوا لروح رمضان الحقيقية الي بتجمع بين العبادة والتأمل والعطاء.

رمضان كريم، وكل عام وأنتم بخير.