Johan Myburg het nuus oor TOMB OF SAND, die wenner van die Booker International; THE ART OF LOSING, wat met die Dublin-letterkundeprys bekroon is; en ‘n nuwe roman deur die Turkse skrywer en Nobelpryswenner Orhan Pamuk. Ilse Salzwedel gesels ook met Johan, wat in 2018 met die Hertzogprys vir poësie bekroon is, oor sy nuwe digbundel NARRESKIP. Ina Strydom praat oor kopiereg, en die RSG-bonuspotgooi van Jeanne Goosen se SNEEU IN DIE KAROO. Elsje van Jaarsveld praat met Stephen le Roux oor sy boek TOY VAN CARNARVON.  In ons reeks radiodrama-slypklasse, bespreek Ina Strydom die ontwikkeling van ‘n storie.

NUWE GESKIEDENIS VAN SUID-AFRIKA is ‘n splinternuwe, opgedateerde boek wat ‘n baie gebalanseerde oorsig gee oor die Suid-Afrikaanse geskiedenis. In net meer as 700 bladsye word die hele land se geskiedenis opgesom, beginnende by die eerste nasies wat hier gewoon het, tot die Suid-Afrika van 2022. Ilse Salzwedel se gaste, professore Herman Giliomee (een van die redakteurs van die boek) en Albert Grundlingh, is albei gerekende geskiedskrywers, en gesels nie net oor hulle bydraes tot hierdie pragboek nie, maar ook oor hul eie publikasies, wat onder andere DIE AFRIKANERS: ‘n BIOGRAFIE (Giliomee) en VAN ZYL SLABBERT: MAN ON A MISSION (Grundlingh) insluit.

Ilse Salzwedel gesels met Rudie van Rensburg oor sy spanningsroman en oor die verfilming van sy boek HANS STEEK DIE RUBICON OOR. Sy gesels ook met Philip de Vos oor MÔRE EN GISTRAAND EN DIE EINDE VAN DIE MAAND, sy nuwe bundel verse. In die radiodramaslypklas gesels Ina Strydom oor al die moets en moenies van die storielyn. In sy internasionale bydrae vertel Johan Myburg meer oor die polemiek oor die Kanadese digter Rupi Kaur se werk, die skrywer Patricia Lockwood, wie se roman pas met die  Dylan Thomas-prys bekroon is, die wenner van die Edgar Allan Poe-prys vir misdaadfiksie en die kortlys vir die Booker International, wat op 26 Mei aangekondig word.

Die bundel, VRYDAGAAND, bevat 27 kortverhale deur bekende skrywers soos Elsa Winckler, Dibi Breytenbach, Kristel Loots, Nanette van Rooyen en Jaco Jacobs. Hulle gesels met Ilse Salzwedel oor die gewildheid van hierdie genre. Elsje van Jaarsveld gesels met Tinus van Staden oor RATELTAAI, ‘n biografie oor die oudrugbyspeler Etienne Reynecke. Dr. Mia Oosthuizen gesels oor die SA Kinderliteratuurfees wat van 20 tot 22 Mei in Somerset-Wes gehou word. Johan Myburg het o.a. nuus oor die wenners van die Pulitzerpryse vir letterkunde, ‘n boek oor die val van die internet, wat oorsee die tonge laat klap, en Christopher Lloyd se kinderboek oor klimaatsverandering, IT’S UP TO US.

Uit die argief: Bun Booyens, oudredakteur van Die Burger, gesels oor sy boek oor die legendariese spotprentkunstenaar Fred Mouton, wat verlede week oorlede is.

Ilse Salzwedel gesels met SJ Naude, wat onlangs vir die tweede keer met die Hertzogprys bekroon is vir sy bundel kortverhale, DOL HEUNING. Barend Vos, skepper van die humoristiese GROOTSEUNSTORIES en vier romans, gesels oor die uitdagings van skryf in verskillende genres. In die weeklikse radiodramaslypklas gee Ina Strydom raad oor karakters en karakterisering. Johan Myburg gesels oor Elspeth Barker, skrywer van O CALEDONIA, wat onlangs oorlede is, nog ‘n letterkundeprys vir Arundhati Roy, en SEA OF TRANQUILITY, ‘n nuwe wetenskapsfiksieroman uit die pen van Emily St. John Mandel.

Ilse Salzwedel gesels met Charne Kemp oor haar nuwe ware misdaadverhaal MOORD OP POFADDER. Elsje van Jaarsveld gesels met Lizz Meiring, samesteller van SOETE SONDE, ‘n bundel essays oor sjokolade. Ina Strydom bespreek die skryf van dialoog in haar radiodramaslypklas. Johan Myburg het nuus oor onverwagte groei in ‘n Amerikaanse boekwinkelgroep, die kortlys van die Britse Women’s Prize vir fiksie, en die wenner van die Australiese Stella-prys vir letterkunde, die digter Evelyn Araluen. Daar is ook meer inligting oor die ATKV-Skryfskool aan die NWU se Winterskryfskool in Junie.

Ilse Salzwedel gesels met Jeanette Stals oor haar jongste spanningsroman, BLOEDBANDE.Die wenners van die Akademie vir Wetenskap en Kuns se letterkundige pryse, asook die UJ-pryse, is onlangs aangekondig. Leon van Nierop en Ina Strydom vertel meer van die nuwe RSG-middagvervolgverhaal, HET VAN VERLANGEKRAAL, wat op ‘n roman uit 1960 gebasseer is. Wil jy ‘n radiodrama skryf? In vanaand se slypklas kan jy meer leer van die radiodrama as genre, en hoe jy klank daarin kan gebruik. Johan Myburg vertel van ‘n nuwe letterkundeprys vir skrywers van Afrika, die nuwe Gabriel Garcia Marquez-biblioteek in Barcelona, en vanjaar se wêreldboekehoofstad, Guadalajara in Meksiko, se inspirerende boekeprogram. Nedine Petrick praat oor haar #BoekeWatBetower.

Kirby van der Merwe gesels met Suzette Kotze-Myburgh oor sy tweede roman, EUGENE. In die #BoekeWatBetower-bydrae vertel skrywer en joernalis Annemarie van der Walt van die vyf boeke wat sy vir haar dogters gekoop het toe hulle die huis verlaat het, en van die besonderse manier waarop die roman BOENDOE van Chris Barnard haar lewe verander het. Voornemende skrywers van radiodramas kan uitsien na goeie skryfraad in Ina Strydom en Kobus Burger se radiodramaslypklasse. In Johan Myburg se bydrae kan jy meer uitvind oor twee topverkoperskrywers, Jack Higgins en David McKee, wat albei onlangs oorlede is, en TOMB OF SAND deur Geetanjali Shree (in Engels vertaal deur Daisy Rockwell). Dis een van die boeke op die kortlys van vanjaar se Booker International-prys vir vertaalde werk.

Sally Andrew se Tannie Maria misdaadromans is reeds in 14 tale vertaal en ook in ‘n internasionale TV-reeks verwerk. Ilse Salzwedel gesels met Andrew oor The Milktart Murders. Daar is reeds vier boeke in die reeks, wat in die styl van die Agatha Christie-misdaadverhale geskryf is, maar met ‘n lekker koskinkel in die kabel, want Tannie Maria is boonop ‘n troostante wat heerlike kos en resepte gebruik om mense met hulle probleme te help. Die jongste Tannie Maria-boek, The Milktart Murders, is op Nasionale Melktertdag uitgereik, en ja, daar is melkterte in die storie! Johan Myburg het nuus oor ‘n Britse leesveldtog, ‘n kortverhaal van die Japannese skrywer Haruki Murakami wat gelei het tot ‘n rolprent wat met ‘n Oscar bekroon is, die Hay-letterkundefees in Wallis en die kortlys vir die Booker International-prys vir vertaalde werk. Dis weer tyd vir RSG en Sanlam se jaarlikse radiodramaskryfkompetisie. KKobus Burger vertel meer. Twee bekendes in die boekewêreld, Frederik de Jager en Frieda Le Roux, vertel watter boeke hulle betower het.