Ons vind meer uit van Marinda van Zyl se nuutste roman VELDHOSPITAAL 12. Vandag is Wêreldvoorleesdag, en Erika Lourens, die Laerskool Eikestad se pas afgetrede en baie inspirerende biblioteekjuffrou, gee raad om kinders aan die lees te kry en te hou. Jy kan ook uitvind waar om gratis kinderstories af te laai ter viering van Wêreldvoorleesdag.  Johan Myburg het nuus oor die Bookerpryswenner Keri Hulme, wat onlangs oorlede is, en Colm Tóibín se aanwysing as Ierland se amptelike skrywer. Hy vertel ook van ‘n splinternuwe, opwindende en boonop gratis manier om James Joyce se ULYSSES te geniet.

Malvory Adams vertel vir Ilse Salzwedel van sy biografiese boek ALS IS NIE NET SWART EN WIT NIE. Johan Myburg het nuus oor nuwe romans deur Christos Tsiolkas en Ian McEwan, asook ‘n eerbewys aan Ingrid Glorie, onder andere organiseerder van die week van die Afrikaanse roman in Nederland. Jy kan ook luister na ‘n kort argiefonderhoud met wyle Esme Mittner, skrywer en vir baie jare SARIE se verhaleredakteur, wat verlede week oorlede is.

Die Afrikaanse digter en skrywer, Eugene Marais, die Franse dramaturg Moliere en die fantasieskrywer JRR Tolkien kom aan die beurt. Jy kan o.a. luister na ‘n heruitsending van Ina Strydom se dokumentêr EUGENE MARAIS: EWIGE ENIGMA. Johan Myburg vertel van die jongste roman van die Franse skrywer Michel Houellebecq, en stel jou bekend aan Joelle Taylor, die Britse slam-digter wat pas aangewys is as die wenner van vanjaar se TS Eliot-poësieprys.

Ilse Salzwedel gesels met Jaco Wolmarans oor sy drie aksieromans BOS, SKAG en IVOOR, wat almal afspeel teen die agtergrond van die Angolese bosoorlog en ander geheime militêre operasies. Irna van Zyl antwoord vyf vrae oor haar roman OP ‘N MOOI DAG. Johan Myburg het nuus oor die vyf kategoriewenners van die Costa-pryse.

Ilse Salzwedel en Suzette Kotze-Myburgh gesels oor ‘n paar van hulle 2021-leeshoogtepunte. Johan Myburg bring hulde aan Joan Didion en Anne Rice, wat albei onlangs oorlede is. Hy gee ook meer inligting oor Arnon Grunberg, die wenner van die Nederlandse P.C. Hooft-prys, en gesels oor ‘n paar nuwe boeke deur bekroonde internasionale skrywers.

SARIE se boekeredakteur, Phyllis Green, gesels oor mooi koffietafelboeke, inspirerende selfhelpboeke en kookboeke. Bibi Slippers deel haar lekkerleesboeke vir 2021, en Johan Myburg gesels oor sy top drie Afrikaanse boeke vir die afgelope jaar. In sy gebruiklike internasionale insetsel gesels Johan oor Britse biblioteke se gewildste oudio- en e-boeke vir 2021, en ‘n besondere koffietafelboek uit die pen van Bruce Springsteen en Barack Obama. Hy sluit sy insetsels vir die jaar af met ‘n Kersfeesgedig uit die pen van die Engelse digter John Betjeman.

Drie boekmense – Deborah Steinmair, Bettina Wyngaard en Phyllis Green – deel hulle 2021-leeshoogtepunte. Johan Myburg gesels in sy internasionale bydrae oor die Russiese skrywer, Yurie Felsen, wie se debuutroman byna ‘n 100 jaar na publikasie vir die eerste keer in Engels gaan verskyn. Hy het ook nuus oor twee hervertellings van die Griekse mitologie, en jy kan meer uitvind oor Adam Aitken, ʼn Australiese digter wat pas met die Australiese Patrick White-prys bekroon is.

Suzette Kotze Myburg en Azille Coetzee gesels oor Azille se jongste boek en haar eerste roman, DIE TEENOORGESTELDE IS NET SO WAAR. SARIE se boekeredakteur Phyllis Green gesels oor ‘n paar moet-lees-memoires. Johan Myburg kyk in sy internasionale insetsel na ‘n klompie boeke uit Afrika wat die afgelope jaar met pryse weggestap het, verwikkelinge by die Britse Royal Society of Literature en die Britse dagblad, The Guardian, se vyf boeke van die jaar in die kategorie vir misdaadromans en rillers.

Ilse Salzwedel gesels met die jeugskrywer Annerlé Barnard, wie se derde jeugroman, SPEL, pas bekroon is met ‘n goue Sanlamprys vir jeugfiksie. Irma Venter gesels oor haar jongste spanningsroman, MINDER AS NIKS. Johan Myburg het nuus oor die kortlyste vir die Costa-pryse en die Amerikaanse National Book Foundation se toekenning vir die beste fiksie. Hy bring ook hulde aan die Amerikaanse digter, Robert Bly, en jy kan luister na ‘n opname waarin Bly een van sy eie gedigte voorlees.

SP Benjamin praat oor sy roman DIE DINGE VAN ‘N HOND. Luister na ‘n onderhoud uit die argiewe met die topverkoperskrywer Wilbur Smith, wat onlangs oorlede is. In sy internasionale boekinsetsel gesels Johan Myburg onder andere oor nuwe internasionale wetenskapsfiksie, fantasie en rillers, asook die Turkse regering se ondersoek na die skrywer Orhan Pamuk. Jy kan ook luister na ‘n kort voorlesing deur Pamuk.