Suzette Kotze-Myburgh gesels met Michelle Meyer oor MOER, haar aangrypende en soms ontstellende debuutroman oor moederskap. Joan Hambidge bring hulde aan die digter Johan van Wyk, en jy kan ook luister na ‘n uittreksel uit ‘n onderhoud met die digter en skrywer Ronel Nel. Albei is verlede week oorlede. Johan Myburg het nuus oor die wenner van die Rathbones-Folioprys, Colm Toibin, en die agt wenners van die Windham-Campbelpryse. Daar is ook ‘n aangrypende gedig, voorgelees deur die Russies-Amerikaanse digter Ilya Kaminski self, oor oorlog.

In die eerste bonuspotgooi van Skrywers en Boeke kan jy luister na ‘n onderhoud met wyle De Waal Venter, wat Nic Swanepoel in 1989 met hom gevoer het, asook ‘n onderhoud wat Ilse Salzwedel in 2018 met wyle Derick van der Walt gevoer het oor sy eerste volwasse roman, Tussen Vriende. En het jy geweet Barbara Kingsolver is ‘n opgeleide bioloog? Ilse Salzwedel het in 2015 met Kingsolver gesels oor haar loopbaan, haar bekende roman, The Poisonwood Bible, en hoe sy fiksie gebruik om oor onderwerpe soos klimaatsverandering te skryf.

Twee skrywers, De Waal Venter en Derrick van der Walt, is verlede week oorlede, en jy kan luister na argiefonderhoude met hulle. Daar is nuus oor ‘n skryfskool vir kinder- en jeugliteratuur. Ina Strydom vertel meer oor die ekstra boekvoorlesings waarna RSG-luisteraars van 4 April af kan uitsien. In Johan Myburg se internasionale bydrae gesels hy oor twee nuwe boeke uit die pen van bekroonde skrywers, en die ses boeke op die kortlys van die Dublin-letterkundeprys.

Ilse Salzwedel gesels met Jan van Tonder oor sy nuwe roman GROOTGELUK, wat afspeel in die Oudtshoorn-omgewing. Hy lees voor uit ‘n Hooghollandse koerantberig wat hy in die C.P. Nel-museum op die dorp opgespoor het, en wat gedien het as die vonk vir die roman. Elna van der Merwe, organiseerder van die KKNK se boekprogram, vertel waarna feesgangers vanjaar kan uitsien. In Johan Myburg se internasionale bydrae gesels hy oor nuwe boeke deur Francis Fukuyama en Karen Joy Fowler, en die 100ste herdenking van die geboortedag van die Amerikaanse skrywer Jack Kerouac, skrywer van onder meer ON THE ROAD. Jy kan ook luister na ‘n snit uit ‘n argiefopname waarin Kerouac self voorlees uit hierdie klassieke boek.

Ilse Salzwedel gesels met Lien Botha oor VIN, haar tweede roman, en met Marié Heese, skrywer van DIE UURWERK KANTEL, wat saans op RSG voorgelees word. Ilse vertel meer oor die wenners van die LAPA Jeugromanwedstryd. Johan Myburg het nuus oor die langlys vir die Women’s Prize for Fiction, die Booker Internationalprys vir vertaalde werk en twee nuwe boeke deur Cormac McCarthy.

Suzette Kotze-Myburgh gesels met Audrey Jantjies oor haar debuutroman, AS DIE KATJIEPIERING BLOM. Deborah Steinmair vertel vir Ilse Salzwedel van IEWERS, ÊRENS, ‘n pragtige kuns- en storieboek oor die werk van die Rosendalse skilder WILLEM PRETORIUS. In Johan Myburg se internasionale insetsel bring hy hulde aan Shirley Hughes, die Britse kinderboekskrywer en illustreerder wat verlede week oorlede is. Jy kan ook meer uitvind oor die wenners van die PEN Amerika-letterkundepryse. Dan is daar nuus oor ‘n nuwe roman uit die pen van die Ierse topverkoperskrywer Marian Keyes, en die Suid-Afrikaanse roman CHASING MARIAN, wat handel oor vier Marian Keyes-aanhangers, wat ook pas verskyn het.

Ter viering van ‘n heruitgawe van ‘n bundel met 30 van P.G. du Plessis se gewildste Koöperasiestories gesels Ilse Salzwedel met prof. Hans du Plessis oor die gewildheid van hierdie kontreikunsverhale. P.G. self vertel in ‘n kort argiefopname wat hy dink die rede was vir die gewildheid, en jy kan luister na grepe uit een van die gewildste episodes van die destydse TV-reeks, Koöperasiestories. Johan Myburg vertel meer oor internasionale skrywers se uitsprake oor die Russiese inval in Oekraïne, nuwe internasionale romans en die kinderboek-illustreerder Jan Pieńkowski. Jy kan ook uitvind wie op die kortlys van LAPA se jeugromanwedstryd is, en ‘n goeie aanlynskryfskool.

Ilse Salzwedel gesels met Ronelda Kamfer oor haar debuutroman KOMPOUN. Johan Myburg het nuus oor die Suid-Afrikaanse skrywer Damon Galgut se nuutste benoeming vir ‘n groot internasionale prys vir sy boek THE PROMISE, en jy kan uitvind watter drie skrywers word deur PEN Amerika vereer vir hulle bydrae tot die letterkunde. Johan vertel ook meer oor die skrywer PJ O’Rourke, wat onlangs oorlede is.

Luister na ‘n bekendstelling van Dan Sleigh (bekend vir sy bekroonde geskiedkundige romans soos 1795, Eilande, Afstande en Wals vir Matilda) se jongste nie-fiksie boek RETOERVLOOT. Dis gebasseer op ‘n voorheen onontdekte skeepsjoernaal van ‘n VOC-vlootadmiraal. Sleigh vertel van sy werk as geskiedkundige, en hoe dit gebeur het dat hy ook fiksieskrywer geword het.

Luister na ‘n argiefonderhoud met die digter en skrywer Thomas Deacon, wat onlangs oorlede is. Die nuwe direkteur van die ATKV-skryfskool aan die Noordwes-Universiteit, prof. Thys Human, vertel van sy planne om kreatiewe Afrikaanse skryfwerk te bevorder. Johan Myburg vertel meer oor Hannah Lowe, 'n Britse digter, wat pas aangewys is as die wenner van die Costa-boek van die jaar prys, die verbanning van die strokiesroman MAUS, en wat 100 jaar gelede in 1922 in die internasionale letterkunde gebeur het. Jy kan selfs die stem van die Britse digter TS Elliot hoor.