Luister na 'n argiefonderhoud met Christine Barkhuizen Le Roux, wat verlede week oorlede is. Ina Strydom gee haar mening oor Deon Meyer se DONKERDRIF, en Johan Myburg vertel meer oor die Bookerpryswenner, Douglas Stuart, wat ook voorlees uit sy wenboek SHUGGIE BAIN. Vind meer uit van die Tuin van Digters wat hierdie naweek op Wellington plaavind, asook oor die Arabies-Afrikaans-projek van die Afrikaanse Taalmonument.

Kan ‘n mens Karel Schoeman se naam insluit by dié van die Sestigers? hoor wat prof. Willie Burger hieroor sê. Jy kan ook luister na Karel Schoeman se aanvaardingstoespraak tydens die oorhandiging van die Hertzogprys in 1970. René van Rooyen vertel hoekom sy besluit het om ‘n rolprent te maak oor Dalene Matthee se roman TOORBOS. Johan Myburg deel in sy insetsel nuus oor nuwe woorde wat ná 2020 in die Collins Dictionary gaan verskyn.

Ilse Salzwedel gesels met Juanita Aggenbag oor haar roman STILLE WATERS. Jy kan ook meer uitvind oor LAPA se jeugromankompetisie, die wenners van vanjaar se SALA-toekennings en nuwe spanningsromans vir jou Kerslysie. Johan Myburg gesels in sy bydrae oor Roddy Doyle se nuwe roman, en bring hulde aan die Britse joernalis en skrywer Robert Fisk en die Amerikaanse digter en dramaturg, Diane de Prima, wat beide onlangs oorlede is.

Hennie Aucamp se naam word tradisioneel nie saam met die van ander Sestigers genoem nie, maar luister hoekom prof. Willie Burger hierdie akademikus, digter, skrywer en letterkundige beslis as Sestiger beskou. Jy kan ook luister na ‘n  hoorbeeld wat in 2008 gemaak is waarin van Aucamp se kollegas en vriende oor sy werk praat. Johan Myburg gesels in sy bydrae oor die boek wat bekroon is met The Guardian se “Not the Booker Prize”, en jy kan hoor wat Anna Burns, die wenner van die Dublin Internasionale Letterkundeprys, in haar aanvaardingstoespraak gesê het oor die rol wat biblioteke in haar lewe gespeel het.

Die skrywer, letterkundige en taalaktivis, prof. Ampie Coetzee, is onlangs oorlede. Drie van sy kollegas en vriende, prof. Hein Willemse, prof. Steward van Wyk en Theo Kemp, vertel vir Ilse Salzwedel hoe hulle Coetzee onthou. Johan Myburg bring hulde aan wyle prof. Stephan Gray, Suid-Afrikaanse digter en skrywer wat ook internasionaal bekend was. Jy kan ook meer uitvind oor Britse biblioteekgebruikers se leespatrone tydens inperking, en Bill Bryson se toekomsplanne. Die name van skrywers wat met ATKV-Woordveertjies bekroon is, word ook aangekondig.

In nog ‘n kykie na die Sestigers val die fokus op Abraham de Vries. Jy kan luister na uittreksels uit twee onderhoude met hom, en prof. Willie Burger gesels oor De Vries se bydrae tot die Afrikaanse letterkunde. Antoinette Louw gesels oor haar kinderboek DIE STORIE VAN RACHELTJIE DE BEER, en Johan Myburg gesels oor die Frankfurtse boekefees, ‘n toekenning aan ‘n skrywer wat 21 jaar gelede laas lewend gesien is, en die lot van onafhanklike boekwinkels oorsee.

Ilse Salzwedel gesels met Jan van Wyk oor sy bundel kontreisketse, VERTEL DA' VI' MY 'N STORIE VAN NAMAKWALAND. Louise Viljoen vertel meer oor haar kinderboek, BIBI BABBELBEK PRAAT TOT SY BLOU WORD. Wendy Maartens is op soek na familiestaaltjies vir 'n boek oor die Anglo Boereoorlog. Johan Myburg stel ons voor aan die wenner van die Nobelprys vir Letterkunde, wat verlede week aangekondig is.

Die fokus val op Jan Rabie se werk en letterkundige invloed as Sestiger. Jy kan luister na 'n hoorbeeld waarin Rabie self gesels, en prof. Willie Burger gesels oor Rabie se bydrae tot Afrikaans. Johan Myburg het onder andere nuus oor 'n Belgiese digbundel wat binnekort in Afrikaans verskyn.

Francois Smuts gesels met Ilse Salzwedel oor sy debuutroman SLAGOFFER. Ria Winters se boek oor haar korrespondensie met Karel Schoeman, DIE REISE VAN SCHOEMAN, Fanie Viljoen se DONKER WEB, en kontreistories uit Wini Esterhuizen se boek DIE DAG TOE ONS KRISMIS GAAN SOEK HET word bespreek.

Wie was Bartho Smit, digter, dramaturg en uitgewer van baie van die Sestiger-beweging se werk? Jy kan luister na stemopnames van Smit self, en prof. Willie Burger gee ook 'n oorsig oor Smit se nalatenskap. Johan Myburg het onder andere nuus oor nuwe boeke uit die pen van John Irvin en Kazuo Ishiguro, en gesels ook oor die lewe en werk van die digter, skrywer en Sylvia Plath-biograaf, Anne Stevenson, wat onlangs oorlede is.