Elmari Rautenbach, die organiseerder van die US Woordfees se skrywersprogram, gesels met Ilse Salzwedel oor haar onlangse leeslekkertes, en jy kan luister na ‘n argiefbydrae oor die werk van JM Coetzee, wat op 9 Februarie  sy 80e verjaarsdag gevier het. Johan Myburg gesels in sy bydrae oor die kortlys van die Dublin-letterkundeprys, ‘n boek oor klimaatfiksie op die Booker-kortlys en die skrywer agter een van die groot feministiese boeke van die vorige eeu.

Ilse Salzwedel gesels met Christien Neser, jeugboekskrywer en spraakterapeut, oor die belangrikheid van boeke, stories en hardop-voorlees, ter viering van INTERNASIONALE HARDOPVOORLEESDAG op 3 Februarie. Christelle Van Rooyen-Wessels gesels oor haar spanningsroman BRANDMERK, en Eugenie Gregan gesels oor haar lysie lekkerleesboeke. Theo Kemp gesels oor die Jakes Gerwel Stigting se residensieprogram vir Afrikaanse skrywers. Johan Myburg gesels in sy internasionale bydrae oor die wenner van die Costa Boek van die Jaar-prys, en ‘n nuwe digbundel uit die pen van Bhanu Kapil. Jy kan ook luister na ‘n kort voorlesing uit Susanna Clarke se PIRANESI.

Ilse Salzwedel gesels met Louis Jansen van Vuuren oor sy biografiese vertellinge, AMPER FRANS. Prof. Ryan Blumenthal, ‘n forensiese patoloog, praat oor sy nie-fiksie werk, AUTOPSY. Esté Gross lees ‘n rubriek voor uit Annelie Botes se bundel VOETSTOOTS, en Johan Myburg fokus op die digters Amanda Gorman en Seamus Heaney.

Die skrywer en oud-uitgewer Kerneels Breytenbach gesels oor sy lysie leesplesiere vir 2020. Ilse Salzwedel gesels met Henda Olivier oor haar debuutroman DIE GOEIE SUSTER.  Milan Murray gesels oor haar jongste kinderboek DIE HUSSE EN DIE KLEIN JAKKALSIES. Johan Myburg vertel meer van die Carol Shields prys vir vroueskrywers, die PEN vryheid van uitdrukking-prys en ‘n nuwe roman uit die pen van die Ierse skrywer Sally Rooney.

Ina Strydom deel haar indrukke van Francois Smith se roman, DIE KLEINSTE RAMP DENKBAAR. Suzette Kotze-Myburgh gesels oor die US Woordfeesbundel 2020, en haar werk as mentor in die Jakes Gerwel-stigting se mentorskapprogram. Sy gesels spesifiek oor Engela Ovies se DRAAIRIVIER en Bronwyn Davids se LANDSDOWNE DEAREST.  Ilse Salzwedel vertel hoekom kinders DIE VINNIGSTE SKOENE IN DIE HELE WÊRELD deur Cecilia Steyn sal geniet. Johan Myburg bring hulde aan die Amerikaanse digter, Jean Valentine, en gesels oor die wenners van die Costa-pryse. Luister na ‘n kort voorlesing uit THE MERMAID OF BLACK CONCH, wat met die Costa-romanprys bekroon is.

Ilse Salzwedel gesels met Dibi Symington oor haar nuwe roman STOM GODE, en oor THE CHOICE, die inspirerende ware lewensverhaal van dr. Edith Eger, ‘n oorlewende van die Duitse konsentrasiekampe. Johan Myburg bring hulde aan die digter en uitgewer, Gus Ferguson, en gesels oor nuwe boeke deur bekende internasionale skrywers. Hy vertel ook meer oor die werk van George Orwell, wat binnekort heruitgegee word, en jy kan luister na ‘n voorlesing uit Animal Farm.

Twee boekliefhebbers, RSG se Ina Strydom en die joernalis AJ Opperman, gesels oor hulle leeshoogtepunte van 2020. Johan Myburg vertel meer oor die Nederlandse PC Hooft-prys wat aan Alfred Schaffer, digter en dosent aan die Universiteit van Stellenbosch, toegeken is. Hy bring ook hulde aan John le Carre, skrywer van topverkoper-spioenasieromans, wat onlangs oorlede is, en jy kan luister na ‘n argiefopname waarin Le Carre van sy eie werk voorlees.

Ilse Salzwedel gesels oor ‘n klomp kinder- en jeugboeke wat die perfekte Kersgeskenk sal wees vir jong lesers. Daar is iets vir almal se leessmaak – van storieversamelings om voor slaaptyd te lees tot verhale oor diere en ‘n omvangryke boek oor Suid-Afrikaanse uitvinders en wetenskaplikes. SARIE se boekeredakteur, Phyllis Green, gesels oor drie boeke wat sy kan aanbeveel vir volwassenes. In sy internasionale bydrae gesels Johan Myburg oor Louis Gluck, vanjaar se Nobelpryswenner vir letterkunde, se aanvaardingstoespraak, die Leipzigprys en Elizabeth Barret Browning se twee jaar in afsondering weens siekte.

Ilse Salzwedel praat met Anoeschka von Meck oor haar nuwe roman DIE HEELAL OP MY TONG. Hou jou kinders van nie-fiksie? Ilse gesels oor drie oulike nuwe kinderboeke propvol interessante feite. Johan Myburg gesels in sy internasionale bydrae oor die Britse boekbedryf, en jy kan luister na ‘n klankgreep uit ‘n onderhoud met die Britse skrywer Jan Morris, wat verlede week oorlede is.

Luister na die laaste bydrae in die reeks oor die Sestigers. Die kollig val op Adam Small. Daar is ‘n argiefonderhoud uit 1994 waarin Small praat oor sy lewe en werk. Prof. Willie Burger gesels oor Small se letterkundige nalatenskap. In Johan Myburg se internasionale bydrae gesels hy oor die Costa-pryse, ‘n nuwe biografie oor die Beatles, en THE SHADOW KING, een van die boeke op die Bookerprys se kortlys.