Ilse Salzwedel gesels met Andries Buys, skrywer van die veelbekroonde boek DIE DAO VAN DAAN VAN DER WALT. Dit is verlede week aangewys as dioe wenner van die gesogte ATKV-Prosaprys. Hulle gesels oor die boek se ontstaan, en hoekom hy besluit het om dit onder 'n skuilnaam te publiseer. Die boek is reeds voorheen met drie literêre pryse bekroon.

Ilse Salzwedel gesels met Nadia de Kock oor haar roman DIE WOLKVERSAMELAARS. Francois Lötter vertel van die Tuin van Digters wat op 13 en 14 September by die Breytenbachsentrum in Wellington plaasvind, en Johan Myburg gesels onder meer oor die pas afgelope Edinburgh-boekefees.

Ilse Salzwedel gesels met Phyllis Green, Sarie se boekeredakteur, oor haar gunsteling fiksieboeke uit onlangse nuwe publikasies. Johan Myburg gesels oor die internasionale letterkunde.

Ilse Salzwedel gesels met Phyllis Green oor goeie nie-fiksie boeke wat in die laaste paar maande verskyn het. In Johan Myburg se internasionale insetsel is daar ook nuus oor 'n internasionale nie-fiksie werk wat onlangs bekroon is.

Ilse Salzwedel gesels met Lize Albertyn-Du Toit oor haar debuutroman DIE KINDERS VAN SPOOKWERWE. Jy kan ook luister na 'n kort argiefonderhoud uit 1964 waarin Verna Vels met die digter Ingrid Jonker gesels oor haar werk. Johan Myburg fokus in sy internasionale bydrae op die skrywer Toni Morrison, wat onlangs oorlede is. Daar is ook 'n kort onderhoud met Morrison.

Ilse Salzwedel gesels met Kirby van der Merwe oor sy vertalings van Carol Campbell se DIE SKILPAD SE LAASTE TRAAN en Meg Vannermerwe se VROU VAN DIE KLIPPESEE. Carla van der Spuy vertel meer oor haar jongste boek LIEFDE AGTER TRALIES en haar belangstelling in ware misdaad. Chareldine van der Merwe vertel meer van die Vriende Van Afrikaans se Koop-'n-Afrikaanse-boek-dag op 14 Augustus.

Die bekroonde skrywer en dramaturg, Harry Kalmer, is onlangs oorlede. Luister na 'n onderhoud wat Corina van der Spoel in 2014 met hom gevoer het oor sy bekroonde boek 'N 1000 STORIES OOR JOHANNESBURG. Ilse Salzwedel gesels oor nuwe nie-fiksie vir volwassenes en oulike nuwe kinder- en jeugboeke. En Johan Myburg gesels onder meer oor twee internasionale boekpryse.

Jeanne Goosen het onlangs haar 81e verjaarsdag gevier. Luister na 'n onderhoud uit die argiewe waarin Jeanne met wyle Nic Swanepoel gesels oor haar skryfwerk. Kortverhaalskrywers kan meer uitvind van die skryfkompetisie waaruit die US Woordfeesbundelbydraes gekies word. In Johan Myburg se bydrae oor die internasionale letterkunde is daar onder andere 'n voorlesing deur Alice Walker, skrywer van The Color Purple.

Ilse Salzwedel gesels met Zelda Bezuidenhout oor DIE DEKONSTUKSIE VAN RETTA BLOM, haar eerste roman vir volwassenes, en oor haar bekroonde jeugroman AS MENS GELUK KON PROE. Bernette Bergenthuin gesels met Ilse oor haar nuwe roman DIE LEWE VIR BEGINNERS. In sy internasionale insetsel gesels Johan Myburg onder meer oor 'n nuwe prys vir vroueskrywers van komiese Britse fiksie.

John W. Frederick, die skrywer van NOEM MY SKOLLIE (wat ook in 'n rolprent verwerk is) is onlangs oorlede. Luister na 'n argiefonderhoud waarin hy vertel hoe stories en boeke hom teen tronkbendes beskerm het. Hoor wat is alles op die program by die Montagu Boekefees en die Elgin/Grabouw Krimifees. Johan Myburg gesels in sy internasionale bydrae onder meer oor die rolprent Pan's Labyrinth wat nou in boekvorm verskyn.