Sögur af landi

Í þættinum er slegist í för með tveimur starfsmönnum úr vitadeild Vegagerðarinnar sem voru á ferð um Melrakkasléttu að sinna árlegu viðhaldi á fjórum vitum á svæðinu. Við kynntum okkur starf þeirra og fræddumst í leiðinni um sögu Sléttunnar. Efni í þáttinn vann Gígja Hólmgeirsdóttir.

Umsjónarmaður: Gígja Hólmgeirsdóttir

Vitasaga Íslands verður til umfjöllunar í þessum þætti. Við ferðumst til Hafnarfjarðar, til Keflavíkur á Vestfjörðum og austur á Dalatanga og fræðumst um mannlíf og sögu þriggja vita við strendur landsins.

Efni í þáttinn unnu Dagur Gunnarsson, Halla Ólafsdóttir og Rúnar Snær Reynisson. Innslögin voru áður á dagskrá Sagna af landi þann 24. mars 2019.

Umsjón: Gígja Hólmgeirsdóttir.

Í þessum þætti ferðumst við aftur til fimmta áratugarins á Seyðisfirði og rifjum upp sögur úr stríðinu, meðal annars þegar Þjóðverjar vörpuðu sprengjum á breska tankskipið El Grillo. Efni í þáttinn vann Rúnar Snær Reynisson.

Umsjónarmaður: Gígja Hólmgeirsdóttir

Í þessum þætti var rætt við myndlistarmanninn Jónínu Björgu Helgadóttur sem segir frá hvaða áhrif móðurhlutverkið hafði á listsköpun hennar. Ferðumst líka til Frakklands og fylgjumst með nokkrum fjallahlaupurum keppa í UTMB-fjallahlaupinu í frönsku ölpunum. Að lokum heyrum við sögu hengibjarkarinnar Margrétar sem var valið tré vikunnar hjá skógræktarfélagi Eyfirðinga.

Innslög í þáttinn unnu Gígja Hólmgeirsdóttir og Þórgunnur Oddsdóttir.

Umsjónarmaður: Gígja Hólmgeirsdóttir

Innslög í þáttinn unnu Gígja Hólmgeirsdóttir og Úlla Árdal. Umsjónarmaður: Gígja Hólmgeirsdóttir

Flugurnar í þessum þætti eru engar venjulegar húsflugur, við leikum okkur með þemað og leyfum okkur að fara ögn á flug með það. Við ræðum við mann sem stundar sport sem þarfnast flugna við, ræðum um annarskonar flugur á Vestfjörðum og lyftum okkur upp af flugbrautinni á Akureyri með litlum súrrandi manngerðum flugum. Innslögin unnu Ágúst Ólafsson, Dagur Gunnarsson og Halla Ólafsdóttir.

Umsjón: Dagur Gunnarsson

Þetta er bragðmikill þáttur þar sem við leikum okkur með bragðskyn hlustenda og kannski er líka eitt töfrabragð eða tvö sem leynast í þættinum. Þemað er bragð og þáttagerðarmenn fóru ólíkar leiðir að því, við ræðum við fræðimenn sem rannsaka þroska og þróun bragðskyns hjá börnum og velta fyrir sér matvendni. Við förum í viskýsmökkun og látum reyna ögn á bragðlaukana og ræðum við matreiðslumann sem kann nokkur töfrabrögð. Innslög unnu Dagur Gunnarsson Jón Þór Kristjánsson og Þórgunnur Oddsdóttir.

Umsjón: Dagur Gunnarsson.

Frelsi er ekki eins auðvelt að skilgreina og maður skyldi ætla. Sögur af landi skoða hugtakið frá nokkrum sjónarhornum, frelsi utan fangelsis, frelsi frá fíkn, kvenfrelsi og frelsi til að velja sér maka. Þetta eru nokkrar hliðar á frelsi sem velt er upp í þættinum. Innslög unnu Dagur Gunnarsson, Rúnar Snær Reynisson og Sunna Valgerðardóttir.

Umsjón: Dagur Gunnarsson

Leti er löstur. Eða hvað? Hvernig leti er verst? Hvað er leti? Við könnum letina í þessum þætti og sláum ekki slöku við. Það eru margskonar útgáfur af letinni og kannski hefur viðhorf okkar til hennar breyst í tímans rás. Innslög unnu: Ágúst Ólafsson, Dagur Gunnarsson og Halla Ólafsdóttir.

Umsjón: Dagur Gunnarsson

Samstarf er grunnurinn að svo mörgu og það er þemað í þessum þætti. Fjölskyldan er hin venjulega birtingarmynd samstarfsins og í þessum þætti verður rætt við ólíkar fjölskyldur sem starfa að ólíkum verkefnum saman. Ein fjölskylda mannar sjúkrabílinn saman, önnur birtir myndlist undir sama listamannsnafninu. Einnig verður rætt við fólk sem á náið samstarf við dýrin enda er það elsta samstarf sem mannskepnan hefur átt í frá örófi alda. Innslög unnu Dagur Gunnarsson, Jón Þór Kristjánsson og Rúnar Snær Reynisson.

Umsjón: Dagur Gunnarsson