«Il cumenzament èsi stà grev da s'endisar ch'insatgi gida», quai di Philipp Camathias da Laax. «Er da sa disar, che adina autras persunas vegnan a chasa – en la sfera privata, e savens er en la sfera intima – n'è betg simpel». Ma uss è Philipp Camathias fitg cuntent cun la lavur che la Spitex fa.

Era Bernard Stoffel da Trin è engraziaivel: «Senza la Spitex na fiss jau betg pli qua». Suenter in'operaziun è el vegnì tramess memia baud a chasa. La tgirunza da la Spitex ha percurschì ch'insatge n'era betg bun ed è ida cun Bernhard Stoffel tar il medi. Quai ha salvà sia vita.