En l'emissiun dad oz pudais vus tadlar ina perla musicala dal 2018. Il fanadur da l'onn passà ha RTR pudì visitar la «Brassweek» a Samedan per registrar in concert dal enconuschent quintet «Stockholm Chamber Brass». En il rom da la Brassweek sa rimnan students da musica da tut il mund a Samedan per sa laschar inspirar e sa sviluppar vinavant da professurs e docents da musica. Sin l'agenda stattan era differents concerts da fitg aut nivel. In tal ha il quintet svedais «Stockholm Chamber Brass» preschentà. Oz pudain nus emetter per vus l'entir concert sin las undas rumantschas. In concert fitg variant cun in mix tranter litteratura originala per quintet, transcripziuns classicas enfin tar in toc cun la prelecziun d'ina istorgia.