Question 33. Bakit Siya tinawag na bugtong na Anak ng Diyos yamang tayo rin naman ay mga anak ng Diyos? Sapagkat si Cristo lamang ang walang pasimula at walang hanggang, likas na Anak ng Diyos. Ngunit tayo nama’y mga anak ng Diyos sa pagka-ampon sa pamamagitan ng biyaya at para kay Cristo.

Question 34. Bakit mo Siya tinatawag na ating Panginoon? Sapagkat tayo ay Kanyang tinubos, katawan at kaluluwa, mula sa ating mga kasalanan, hindi sa pamamagitan ng pilak o ginto kundi sa pamamagitan ng Kanyang napakahalagang dugo, at pinalaya Niya tayo mula sa lahat ng kapangyarihan ng diyablo upang gawing Kanyang sariling pag-aari.

Question 31: Bakit Siya tinatawag na Cristo? Sapagkat Siya ay itinalaga ng Diyos Ama, at hinirang sa pamamagitan ng Banal na Espiritu na maging ating Punong Propeta at Guro na Siyang lubos na nagpahayag sa atin ng lihim na payo at kalooban ng Diyos tungkol sa ating katubusan; na maging ating tanging Punong Pari na Siyang nagtubos sa atin sa pamamagitan ng minsanang pag-alay ng Kanyang buhay bilang handog at Siyang nagpapatuloy na namamagitan para sa atin sa harapan ng Ama; at maging ating walang hanggang Hari na Siyang namamahala sa atin sa pamamagitan ng Kanyang Salita at Espiritu, at Siyang nagtatanggol at nag-iingat sa atin sa katubusang tinamo Niya para sa atin.

Question 32: Bakit ka tinatawag na Cristiano? Sapagkat ako ay kasapi kay Cristo sa pamamagitan ng pananampalataya at dahil dito ako ay nakikibahagi sa Kanyang pagkahirang ng sa gayon, bilang propeta ay maaari kong ipahayag ang Kanyang pangalan, bilang pari ay ialay ko ang aking sarili bilang haing buhay ng pasasalamat sa Kanya, at bilang hari ay magpursigi nang may malaya at mabuting budhi laban sa kasalanan at sa diyablo sa buhay na ito at sa susunod na buhay magharing kasama Niya magpakailanman sa lahat ng mga nilikha.

Question 29: Bakit tinawag na Jesus ang Anak ng Diyos na ang ibig sabihin ay Tagapagligtas? Sapagkat inililigtas Niya tayo sa lahat ng ating mga kasalanan, at sapagkat ang kaligtasan ay hindi matatagpuan o masusumpungan kaninuman.

Question 30: Naniniwala nga ba sa tanging Tagapagligtas na si Jesus ang mga naghahanap ng kanilang kaligtasan at katiwasayan sa mga santo, sa kanilang sarili o sa kung saan pa man? Hindi. Bagamat ipinagmamalaki nila Siya sa kanilang pananalita, sa katunayan ay ipinagkakaila nila ang tanging Tagapagligtas na si Jesus. Sapagkat isa sa dalawang bagay lamang ang maaaring maging totoo: na si Jesus ay hindi ganap na Tagapagligtas, o yung mga tumanggap sa pamamagitan ng tunay na pananampalataya sa Tagapagligtas na ito ay dapat sa Kanya lamang hanapin ang lahat ng kailangan para sa kanilang ikaliligtas.

Question 27: Ano ang nauunawaan mo tungkol sa pagkalinga (providence) ng Diyos? Ang pagkalinga ng Diyos ay ang Kanyang makapangyarihan at namamalaging lakas, kung papaanong, parang sa pamamagitan ng Kanyang kamay mismo, ay patuloy Niyang pinangangalagaan ang langit at ang lupa at ang lahat ng nilalang, at Kanyang pinamamahalaan ang mga ito ng sa gayon ang dahon at damo, tag-ulan at tag-tuyot, mabunga at tigang na panahon, pagkain at inumin, kalusugan at karamdaman, kasaganahan at kawalan, sa katunayan, ang lahat ng bagay, ay hindi dumarating ng ayon sa sapalaran kundi sa pamamagitan ng Kanyang mapagpalang kamay bilang Ama.

Question 28: Ano ang kapakinabangan para sa atin na malaman na nilikha ng Diyos ang lahat ng bagay at patuloy Niyang inaalagaan ang mga ito sa pamamagitan ng Kanyang pagkalinga? Tayo ay magiging mapagtiis sa pagsubok, mapagpasalamat sa kasaganaan, at sa pagharap sa kinabukasan ay magkaroon tayo ng matatag na katiyakan sa ating matapat na Diyos at Ama na walang anumang nilikha ang makapaghihiwalay sa atin sa Kanyang pag-ibig; sapagkat ang lahat ng nilikha ay lubusang nasa ilalim ng Kanyang kapangyarihan at maliban sa Kanyang kalooban ay ni hindi sila makakikilos.

Question 26. Ano ang pinaniniwalaan mo kapag sinasabi mong: “Sumasampalataya ako sa Diyos Amang makapangyarihan sa lahat na lumalang ng langit at lupa?” Na ang walang pasimula’t walang hanggang Ama ng ating Panginoong Jesu-Cristo, na siya ring lumikha mula sa wala ng langit at ng lupa at ang lahat ng naroroon, at patuloy na nag-aalalay at namamahala ng mga ito sa pamamagitan ng kanyang walang hanggang panukala at pagkalinga, ay aking Diyos at Ama alang-alang kay Cristo na kanyang Anak. Sa kanya ako ay nagtitiwalang lubos kung kaya’t wala akong pag-aalinlangan na ipagkakaloob niya sa akin ang lahat ng bagay na kailangan ng aking katawan at kaluluwa, at gagamitin rin niya para sa aking ikabubuti ang anumang pagsubok na ipapadala niya sa akin sa mapighating buhay na ito. Kaya niyang gawin ito dahil siya ay ang makapangyarihang Diyos, at ibig niya ring gawin ito dahil siya’y isang matapat na Ama.

Question 23: Anu-ano ang mga artikulong ito [na kailangang paniwalaan ng isang Cristiano]?
I. (1) Sumasampalataya ako sa Diyos Amang makapangyarihan sa lahat na lumalang ng langit at lupa.
II. (2) Ako’y sumasampalataya kay Jesu-Cristo, Kanyang Bugtong na Anak at ating Panginoon; (3) na ipinaglihi sa kapangyarihan ng Banal na Espiritu at isinilang ng birheng si Maria, (4) nagdusa sa sa ilalim ng paglilitis ni Poncio Pilato, ipinako sa krus, namatay at inilibing; nanaog Siya sa impiyerno; (5) sa ikatlong araw ay nabuhay na muli mula sa mga patay; (6) umakyat Siya sa langit at naluklok sa kanang kamay ng Diyos Amang makapangyarihan sa lahat; (7) mula roon ay babalik Siyang muli upang hatulan ang mga buhay at ang mga patay.
III. (8) Ako’y sumasampalataya sa Banal na Espiritu, (9) sa Banal na Iglesyang Laganap, sa kapulungan ng mga banal, (10) sa kapatawaran ng mga kasalanan, (11) sa muling pagkabuhay ng katawan, (12) at sa buhay na walang hanggan. Question 24: Paano nahahati ang mga artikulong ito? Sa tatlong bahagi: ang una ay patungkol sa Diyos Ama at ang ating pagkalikha; ang pangalawa ay patungkol sa Diyos Anak at ang ating kaligtasan; ang pangatlo ay patungkol sa Diyos Espiritu Santo at ang ating pagiging banal.

Question 25: Kung iisa lang nga ang Diyos, bakit may binabanggit kang tatlong persona, Ama, Anak, at Banal na Espiritu? Sapagkat sa ganitong pamaraan ipinakilala ng Diyos ang Kanyang sarili sa Kanyang Salita: ang tatlong magkakaibang mga persona na ito ay Siyang nag-iisa, tunay at walang pasimula’t walang hanggang Diyos.

Question 20: Nangangahulugan ba na ang lahat ng mga tao na napahamak kay Adan ay ligtas naman kay Cristo? Hindi, sila lamang na nakaugnay sa Kanya, at tumanggap ng lahat ng Kanyang biyaya sa pamamagitan ng tunay na pananampalataya.

Question 21: Ano nga ba ang tunay na pananampalataya? Ang tunay na pananampalataya ay tiyak na kaalaman na kung saan ay tinatanggap kong totoo ang lahat ng inihayag ng Diyos sa atin sa Kanyang Salita. At saka ito rin ay matatag na paninindigan na hindi lamang sa iba kundi pati ako ay pinagkalooban ng Diyos ng kapatawaran ng mga kasalanan, walang hanggang katuwiran at kaligtasan buhat lamang sa biyaya at alang-alang lamang sa kabutihang dulot ni Cristo. Ang pananampalatayang ito ay isinasakatuparan ng Banal na Espiritu sa aking puso sa pamamagitan ng ebanghelyo.

Question 22: Kung gayon, ano nga ba ang dapat na panampalatayanan ng isang Kristiyano? Lahat ng ipinangako sa atin sa ebanghelyo, na siyang itinuturo sa atin ng mga artikulo ng ating laganap at walang-alinlangang pananampalatayang Kristiyano sa binuod na pamaraan.

Question 23: Anu-ano ang mga artikulong ito? Sumasampalataya ako sa Diyos Amang makapangyarihan sa lahat na lumalang ng langit at lupa. Ako’y sumasampalataya kay Jesu-Cristo, Kanyang Bugtong na Anak at ating Panginoon; na ipinaglihi sa kapangyarihan ng Banal na Espiritu at isinilang ng birheng si Maria, nagdusa sa sa ilalim ng paglilitis ni Poncio Pilato, ipinako sa krus, namatay at inilibing; nanaog Siya sa impiyerno; sa ikatlong araw ay nabuhay na muli mula sa mga patay; umakyat Siya sa langit at naluklok sa kanang kamay ng Diyos Amang makapangyarihan sa lahat; mula roon ay babalik Siyang muli upang hatulan ang mga buhay at ang mga patay. Ako’y sumasampalataya sa Banal na Espiritu, sa Banal na Iglesyang Laganap, sa kapulungan ng mga banal, sa kapatawaran ng mga kasalanan, sa muling pagkabuhay ng katawan, at sa buhay na walang hanggan.

Q16. Bakit kinakailangan na siya ay maging tunay na tao at tunay na matuwid? Siya ay kinakailangang maging tunay na tao sapagkat ito ang hinihingi ng katarungan ng Diyos na ang parehong kalikasang tao na nagkasala ang siyang dapat magbayad para sa kasalanan. Kinakailangan rin na siya ay maging matuwid sapagkat hindi kayang bayaran ng makasalanan ang kasalanan ng iba.

Q17. Bakit kinakailangang siya’y maging tunay na Diyos rin? Siya ay dapat maging tunay na Diyos upang sa pamamagitan ng kapangyarihang taglay ng kanyang kalikasan bilang Diyos ay makaya niyang dalhin sa kanyang kalikasang tao ang tindi ng poot ng Diyos, nang sa gayon ay makamtan at maibalik niya sa atin ang katuwiran at buhay.

Q18. Ngunit sino ang tagapamagitang ito na tunay na Diyos at tunay na taong matuwid? Ang ating panginoong Jesu-Cristo, na siyang ginawa ng Diyos na maging ating karunungan, katuwiran, kabanalan at katubusan.

Q19. Saan mo nakuha ang kaalamang ito? Mula sa banal na ebanghelyo, kung saan ang Diyos mismo ang nagpahayag nito doon sa Paraiso. Nang maglaon, inihayag niya rin ito sa pamamagitan ng mga patriarka at mga propeta, at ipinahiwatig sa pamamagitan ng mga haing handog at iba pang mga seremonya ng kautusan. Sa wakas, ito’y kanyang ipinatupad sa pamamagitan ng kanyang bugtong na Anak.

QUESTION 12
Yamang ayon sa matuwid na kahatulan ng Diyos ay nararapat lamang tayong parusahan sa buhay na ito at maging sa susunod, paano natin matatakasan ang kaparusahang ito at muling magiging katanggap-tanggap sa Kaniya?
Titiyakin ng Diyos na ang Kanyang katarungan ay matutugunan. Kaya nga dapat itong bayaran nang buo sa pamamagitan natin o ng iba.

QUESTION 13
Kaya ba nating bayaran ang pagkaka-utang na ito?
Hinding-hindi. Sa katunayan, araw-araw pa nga nating nadaragdagan ang ating pagkaka-utang.

QUESTION 14
Kaya ba tayong tubusin ng ibang nilalang rin lamang?
Hindi. Una sa lahat, hindi paparusahan ng Diyos ang iba pang nilalang para sa kasalanang tao ang may gawa. Bukod rito, walang sinumang nilalang lamang ang makakakaya ng tindi ng walang hanggang pagkapoot ng Diyos laban sa kasalanan at iligtas ang iba mula rito.

QUESTION 15
Anong uri ng Tagapamagitan at Tagpagligtas ang dapat nating hanapin?
Dapat siya ay tunay na tao at tunay na matuwid at higit na mas makapangyarihan kaysa lahat ng mga nilalang, samakatuwid, Siya ay dapat ring maging tunay na Diyos.

Question 9
Masasabi bang hindi makatarungan ang Diyos sa tao kung nag-uutos Siya ng hindi naman kayang sundin ng tao dahil sa kanyang makasalanang kalagayan? Hindi; sapagkat nilikha ng Diyos ang tao na may kakayahan sa pagsunod; ngunit dahil sa panunukso ng diyablo at ng kanyang sariling pagsuway, inalisan niya ang kanyang sarili at lahat ng kanyang magiging angkan ng kakayahang kaloob ng Diyos.

Question 10
Hahayaan ba ng Diyos na ang gayong pagsuway at pagrerebelde ay hindi mapaparusahan? Hinding-hindi. Siya ay lubhang galit sa ating orihinal pati na ang mga nagawang kasalanan. Lalapatan Niya ng kaukulang parusa sa kasalukuyang buhay at sa kabilang buhay ang lahat ng mga ito ayon sa Kanyang makatarungang hatol. Ipinahayag Niya sa Kasulatan, “Sumpain ang hindi tumutupad sa lahat ng nasusulat sa aklat ng Kautusan.”

Question 11
Hindi ba mahabagin din ang Diyos? Totoong mahabagin ang Diyos, ngunit makatarungan din Siya. Hinihingi ng Kanyang katarungan, na ang kasalanan na nagawa laban sa kataas-taasang Diyos, ay nararapat na mahatulan ng pinakamatinding parusa, kaparusahang walang hanggan para sa katawan at kaluluwa.