Sch'ella guarda quests dis las novitads, vegn Amina Ovcina Cajacob confruntada cun sia atgna istorgia. Ella ha passentà quatter onns en il coc da la guerra da la Bosnia, a Sarajevo. Oz, 30 onns suenter che la guerra è rutta or, avain nus accumpagnà ella en sia citad paterna, ed en sia istorgia.

Ils 5 d'avrigl 1992 cumenza la guerra en la Bosnia, ina guerra che cuzza quatter onns e che custa la vita a passa 100'000 persunas. Amina Ovcina Cajacob che abitescha oz a Cuira ha passentà di per di da questa guerra a Sarajevo. Ella aveva lura 12 onns, e davent dad in di sin tschel era tuttenina tut auter: Viver en la guerra muntava in mintgadi cun viver en tschalers e bunkers, nagina scola pli, las butias èn vitas ed ils daners na valan nagut pli.