Luister na ‘n geredigeerde weergawe van “Die syfer- en sypelplekke van Afrikaans – ‘n samevatting.” Dit is presies 31 jaar gelede uitgesaai op 30 Mei 1990, en handel oor die variëteite van Afrikaans.  Die stemme van wyle proff. Tony Links en Christo van Rensburg kan gehoor word.

Die Woordeboek van die Afrikaanse Taal het onlangs sy 95ste bestaansjaar gevier.  Die hoofredakteur, dr. Willem Botha, praat oor hoe die WAT ná soveel jaar relevant bly, en die verskyning van Deel XVI van die WAT. Die ambassadeur van die WAT se borg-‘n-woordprojek, die ekonoom Dawie Roodt, vertel waarom hy by die projek betrokke geraak het.

In Taalnavrae word gepraat oor die betekenis van om iets te laat links lê, om iets om dowe neute te doen, en oor die gebruik van nogals in plaas van nogal.

Die hoof van die Sentrum vir Akademiese en Professionele Taalpraktyk by die NWU, prof. Tobie van Dyk, en die projekbestuurder by ICELDA, DJ Cloete, vertel meer oor die werk wat dié sentrum doen op die gebied van die ontwikkeling van taalvaardigheid, akademiese taalvaardigheid en meertaligheid.

In Taalnavrae word gepraat oor omskep of omgeskep, kontaminasie, en om verskoning of onverskoning.

SADiLaR is ‘n sentrum wat digitale taalhulpbronne skep en bewaar en navorsing doen in en vir al die landstale. Ina Strydom praat met die projekbestuurder, Juan Steyn, en die Afrikaans-navorser Benito Trollip oor hulle werk en projekte.

In Taaldinge word daar gepraat oor newwies, kwaggakaiings en die herkoms van die woord imbesiel.

Jana Luther praat oor die rol van die teksredakteur, en hoe hy die leser én die skrywer help.

In Taalnavrae word onder meer gepraat oor die verskil tussen oppervlak en oppervlakte, alma mater en alumni en stiekem.

Die taalkundiges, Nerina Bosman en Sulene Pilon van die Departement Afrikaans aan die Universiteit van Pretoria,  vertel vir Ina Strydom meer oor die Afrikaanse Skryfhulp wat saam met die Leuven Universiteit ontwikkel is.