«Bellezza è en l'egl da la persuna che contemplescha» questa tesa aveva gia l'istoriograf grec Thukydides bun 400 onns avant Cristus. Ma è quai propi uschia? È bellezza propi per mintgin insatge auter e tge è bellezza insumma?

Bellezza è quai che plascha a nus, quai che nus valitain sco insatge positiv. Plirs studis davart l'uschenumnà fenomen da «Pretty Privilege», pia il privilegi da bellezza, mussan che persunas bellas han en tscherts secturs da la vita pli simpel. Tgi ch'è attractiv ha dapli success, chatta pli simpel ina lavur, ina pli auta posiziun ed ina pli auta paja. Persunas che na correspundan betg a las normas da bellezza ord vista da la societad han perencunter pli grev.

La Marella sa metta a la tschertga da la bellezza. Quai cun Arno Arquint che dat in sguard en nossa psica, differentas vistas da persunas sin il tema bellezza e cun duas istorgias persunalas. 

Rudolf Liun Ganzoni raquinta da ses temp sco bodybuilder e daco ch'el n'è betg da l'avis ch'in um stoppia esser musculus per esser bel. E Fia Tuor raquinta sco ch'ella ha ditg empruvà da cuntanscher la perfecziun, ma è sa decidida da betg pli sa zuppar ed è sin via da far la pasch cun sa sezza e sia malsogna.