Todos os podcast | A penaltis

A exposición 'Conexións surrealistas. Colmeiro, Granell e o surrealismo no exilio' pode verse na Casa das Artes de Vigo ata o 14 de xaneiro. Este proxecto pretende unha lectura do impacto do movemento surrealista na obra do pintor Manuel Colmeiro nas décadas dos anos trinta e corenta. A exposición mostra os puntos de conexión coa obra de Eugenio Granell, pintor da mesma xeración e figura de referencia do surrealismo desde os anos corenta. Ambos teñen traxectorias vitais marcadas polo exilio e pola súa presenza en América Latina. No Diario Cultural entrevistamos a Carlos López Bernárdez, comisario da exposición.

Dolores Vilavedra recomenda a obra ‘Delicioso suicidio en grupo’, do escritor finés Arto Paasilinna. A editorial Rinoceronte publica a edición en galego. A obra orixinal publicouse por primeira vez en 1990. A novela relata o drama do suicidio cunha ollada de humor. A obra é unha reflexión sobre Finlandia, un dos países coas taxas de suicidio máis altas do mundo.

‘Os Andares’ é unha serie de viaxes sonoras para acompañar camiñadas pola comarca dos Ancares. Unha proposta de docuficción baseada na investigación sobre o patrimonio da comarca, na evocación sonora e na escrita de María Lado, Clara Gayo ou Avelina Pérez, entre outros autores. ‘Os Andares’ percorre en cada episodio un itinerario por un dos seis concellos da comarca: Navia de Suarna, Becerreá, As Nogais, Pedrafita do Cebreiro, Cervantes e Baralla. Conversamos con José Díaz e Marcos PTT, codirectores canda Iria Azevedo deste proxecto, que xa pode consultarse na web osandares.com

Inauguramos o ano arqueolóxico con Mario César Vila cunha viaxe ata o castelo de Doiras, en Cervantes, que será de titularidade pública; e descubrimos as últimas escavacións do Museo Arqueolóxico de Ourense.

O músico e actor Josito Porto presenta no Diario cultural o seu novo traballo 'Respirando sempre'. Son nove cancións, músicas atemporais que van máis alá das modas. Josito Porto cóntanos que os músicos escriben sobre a rutina e a vida que teñen ao redor. Escribir sobre a vida real fai que sexa doado identificarse coas cancións. Josito Porto explora novos camiños musicais nunha conxunción perfecta entre a interpretación e a música. A Banda da Factoría de Subsistencia está formada por Josito Porto, Sabela Dacal, Rafa Otero e Adrián Ríos. O disco xa está dispoñible nas plataformas dixitais e nas tendas físicas. A presentación oficial do disco é na Casa das Crechas de Compostela o 13 de xaneiro.

A Quenlla cumpre 40 anos de traxectoria musical coa presentación de ‘Na lírica emoción’, baseado na obra poética de Avelino Díaz. Na sección de voces expertas, Emilio Españadero destaca tamén a xira de despedida de Leilía, que se titula ‘Anque me vou non me vou’; e tamén escoitamos ‘Hoxe, mañá e sempre’, a nova canción das Tanxugueiras.

A fotógrafa Sara Priego expón ‘El barranco’ na Fundación Évame Oroza de Vigo ata o 15 de xaneiro. É unha mostra de imaxes en pequeno formato coa que a artista propón unha exploración das emocións dende a intimidade da súa mirada. A exposición é un ensaio fotográfico sobre o dó, a tristeza, a soidade e as ausencias, pero tamén cunha ollada de esperanza e superación. Sara Priego retrata un proceso persoal que todas as persoas vense obrigadas a sufrir nalgún momento da súa vida. “O que eu relato nas frotografías é algo que todos vivimos, podemos sentirnos identificados co traballo e emocionarnos”, explica a fotógrafa na entrevista no Diario Cultural.

O colectivo Vacaburra, formado por Andrea Quintana e Gena Baamonde, presenta o espectáculo ‘O raro é que bailar sexa raro’. Unha peza que pon en cuestión os estereotipos de xénero, como aprendemos a ser mulleres ou homes e como integramos a danza na nosa vida en función do xénero. As creadoras rachan cos límites da danza e rompen co imaxinario colectivo condicionado pola mirada heteropatriarcal. A peza é unha “sacudida” aos compartimentos estancos e aos límites mentais que forman parte da nosa realidade. Afonso Becerra analiza esta obra na sección de voces expertas do Diario Cultural.

Belén Gopegui, Antón Lopo, María Sánchez e Uxue Alberdi son algúns dos escritores que participan en ‘Lecturas de coidado’, un encontro ao redor da lectura en común que se desenvolve en Santiago. Tamén participan profesionais da saúde mental, da medicina comunitaria, da arteterapia, da pedagoxía ou da intervención social. É unha proposta para ler en común, para empregar a lectura como ferramenta de transformación social nunha época de predominio da imaxe, da instantaneidade, da velocidade vertixinosa e de construción de sociedades cada vez máis individualistas. A lectura en común como ferramenta de cambio social.

Tito Lesende avanza os lanzamentos musicais que teremos en 2024. Fillas de Cassandra presenta un novo concepto nos seus concertos, unha nova serie de espectáculos que leva por título ‘Últimas Dionisíacas’. Con esta nova proposta, ofrecen maior instrumentación no escenario da man de Tania Caamaño e Marina Vidal. Neste 2024 terá protagonismo o dúo Caamaño & Ameixeiras, que ten concertos previstos en Lugo, Ourense, Barcelona, Girona, Austria, Bélxica e Alemaña; e tamén éxito dos festivais como o Resurrection Fest. O prognóstico para 2024 resúmese en dúas tendencias: en primeiro lugar, a música pop con influencia das tradición e, en segundo lugar, o paulatino regreso da música das guitarras eléctricas.