Kumaphondo aliqela namhlanje kuza kubanjwa ugqatso bambi bethe chu umgama ongange 5km, kuphawulwa iphulo lokufundisa nge-Autism. Abafundi ababini, uNkazi noJoel, nabaphila neAutism, baphambili ekuququzeleni olu gqatso. Ezinye zeenjongo zokubamba olu suku, kukufundisa uluntu ngeAutism, ukunika inkxaso kwabanye abafundi abaphila neAutism, kwakunye nokwazi ngokuphangaleleyo ngeAutism. Emnxebeni uAyabonga Kekana ubambe olitshantliziyo kwimiba yeAutism, nokwa ngumzali kaNkazi, uLuleka Radebe...  

Umbutho iEFF uthi uza kuthatha amanyathelo omthetho ukucel' umngeni kumba wokufunyanwa kwenkokheli yalo mbutho, uJulius Malema, enetyala. Oku kusemva kokuba inkundla yenqila yaKuGompo City, kwiMpuma Koloni inike uMalema imvume yokuba abhene kwisigwebo sakhe seminyaka emihlanu eseluvalelweni, kwityala lakhe lokudubula umpu esidlangalaleni. Noko kunjalo, le nkundla isikhabile isicelo samagqwetha sokubhena ukubekwa kwakhe ityala. UMalema ugwetywe iminyaka emihlanu entolongweni ngokuba nompu ngokungekho mthethweni, neminyaka emibini entolongweni ngokuba neembumbulu ngokungekho mthethweni. La matyala aza kuqhuba ngexesha elinye. Sithe makhe sincokole nengcali kwimiba yezomthetho malunga nesi sigwebo, kwakunye nesibheno sika Malema. UAmanda Xhala uncokole nengcali yezomthetho uAdvocate Jazz Vilakazi...  

ISebe lemfundo esisiseko liphakamise uhlengahlengiso kwi-curriculum yesifundo sembali (History), nalapho kucetywa ukuba kugxininiswe kwimbali yelizwekazi iAfrika, uMzantsi Afrika kwakunye nezakhono zokucinga ngokuphangaleleyo. Uluntu lulindeleke ukuba luvakalise izimvo zalo ngale curriculum kucetywa ukuba ifundiswe kwaGrade 4 ukuya kwaGrade 12. Le nkqubo yokuphononongwa nokuphuculwa kwale curriculum yaqala ngonyaka ka2019, nalapho konyulwa iqela elizakujongana nezi zifundo. Kunyaka ophelileyo kwinyanga yeNkanga, lomqulu wapasiswa ngamasebe namaqumrhu karhulumente abandakanyekayo ukuba usiwe eluntwini. Emnxebeni uAmanda Xhala ubambe othethela iSebe lemfundo esisiseko, uTerrence Khala...

Kuqikelelwa ukuba ngumyinge ka-85 ukuya ku95% wabophuli-mthetho abaye baphinde bophule umthetho kwakhona emva kokuba bekhululiwe entolongweni, nto leyo exhalabisa kakhulu. Ngoku umbuzo ngowokuba, ingaba amaziko eenkonzo zoluleko awoluleka ngokupheleleyo kusini na amabanjwa? Ezinye izimvo zezokuba ingxaki ikwiinkqubo zoluleko ezingonelanga. Ukushukuxa banzi lomba kwinkqubo yethu sithetha noyingcali kwimiba yolwaphulo-mthetho, ugqirha Thompo Tshivhase

Ikomishoni yeenkonzo zobulungisa, iJSC, indulule kwelokuba iphakamise usekela mongameli weejaji, ujaji Aubrey Ledwaba kwisikhundla sejaji eyongameleyo kwinkundla ephakamileyo ezinze eGauteng. ULedwaba nenguye yedwa umgqatswa kwesisikhundla, ubekudliwano-ndlebe kunye neJSC eSandton eRhawutini namhlanje. Esisiphakamiso sizakuthunyelwa kumongameli uCyril Ramaphosa nozakwenza isigqibo sokugqibela. Ukuhlalutya banzi oku emnxebeni sibambe umhlalutyi wezopolitiko ugqirha Makhosandile Khwaza 

Umbutho iDA  nongowesibini ukuba mkhulu kwelilizwe, wonyule iinkokheli ezintsha ezizakukhokhela kwibhunga lalombutho . Usodolophu waseKapa, uGeordin Hill-Lewis, uyinkokheli entsha yalo mbutho engena ezihlangwini zobeyinkokheli yalo mbutho, uJohn Steenhuisen. UHill-Lewis uzibophelele ekukhuliseni lo mbutho ube ngowona mkhulu kwelilizwe. u Hlumelo Xaba nongumhlalutyi wezopolitiko usenzele uhlalutyo ngoku

Uphando lwakutshanje lubonisa ukuba bangaphezulu kwe-60% abantwana besikolo  abasebenzisa inkqubo yekhompyutha ebizwa iArtificial Intelligence, i-AI ngamafuphi, uninzi lwabo besebenzisa le AI kwimisebenzi yabo yesikolo, ukusuka kuphando ukuya ekusombululeni iingxaki zezibalo.  Ingaba oku kuthetha ntoni ngesakhono sokucinga nzulu nakuphuhliso lwengqondo yabantwana? Ingaba i-AI iyanceda ekufundeni okanye  iyawadodobalisa amandla okucinga ngokuzimeleyo? Ukusabela banzi, emnxebeni uAyabonga Kekana ubambe ingcali kwimiba engqamene nezobuchwepheshe uChuma Memela, kunye noyigcali kwimiba yezemfundo uNomandla Singeni… 

I- Eastern Cape Film Festival ivula iqonga lokuphulisa iitalente nezakhono kwicandelo lobugcisa, ingakumbi kumagcisa aphuma kwimimandla efana neelokishi kunye neelali, nokuba kunikezwe ithuba lokuba amagcisa ngokucula, abadlali beqonga, namaqhula, abalise amabali eendawo abasuka kuzo; bekwenza oko kwiindawo ezo baphuma kuzo. Eli liqonga livulelwa uluntu namagcisa aseKariega, eMpuma Koloni, namhlanje, kwaye alijolisanga kulonwabo nje, kodwa likwaxhobisa abaqulunqi bemidlalo yeqonga, namagcisa ngomsebenzi okweli candelo. Emnxebeni uAyabonga Kekana uncokola nomlawuli we-Eastern Cape Film Festival, uNceba Mqolomba…

Ubomi bomfundi kwiziko lemfundo ephakamileyo lunemingeni eliqela, ngaphandle kwezifundo zakhe. Uxinzelelo lwengqondo ngenxa yokufuna ukungena kubomi obuphilwa ngabalingane babo, iziyobisi, ukulwa nokungazazi ukuba ungubani, ulonwabo oluphazamisana nezifundo zomntu, zezinye zezinto ezibalulwa yincwadi esihloko sithi: The Dark Side of Campus Life, nebhalwe nguSipho Tshaka. Kule ncwadi, uTshaka udakanca le mingeni, neenyani zempilo ephilwa ngabafundi kula maziko. Le ncwadi ikwanazo neziphakamiso zokuba ubani angazikhwebula njani kwizinto ezinokumphazamisa kwimpumelelo yakhe. Emnxebeni uAyabonga Kekana ubambe umbhali wale ncwadi, uSipho Tshaka…

Umphathiswa  wezobulungisa nophuhliso lomgaqo-siseko, uMmamoloko Kubayi, uwukhuphe ngokusesikweni umthetho-oyilwayo ojongene nokukhuselwa koodiza-mahlebo owaziwa njenge Protected Disclosure Bill. Lo mthetho ujoliswe ekuqiniseni ingalo yomthetho ukukhusela abo baye badize iinkcukacha ngolwaphulomthetho, nangokuziphatha okungafanelekanga okwenzeka kwicandelo labucala nakurhulumente. Lo mthetho uza emva kokuba ikomishoni yophando kaZondo iphawule iintanda kumthetho ojongene nokukhuselwa koodiza-mahlebo. Ukanti, ukuxoxa banzi ngokhuseleko loodiz' amahlebo ababhenca urhwaphilizo kwiindawo zempangelo, on the line now Amanda Xhala is joined by OUTA's Chief Executive Officer, Wayne Duvenage…