Lamkele eyona nqanawa yakha yankulu kunazo zonke ezakhe zagaleleka kweli zibuko, izibuko laseNgqurha, eGqeberha, kwiMpuma Koloni.  Le nqanawa ibude buziimitha ezingamakhulu amane, iMSC Nicolo Mistro, incediswe zizikhitshane ezine ukuyitsalela kweli zibuko, ntshukumo ezo ezithathe iiyure ezingaphaya kwezintathu. Le nkqubo ibonwa nje ngelona nyathelo likhulu, nelibeka iphondo iMpuma Koloni njengogxa ophambili kurhwebo lwamazwe ehlabathi.  USisipho Ngcumbe uza nengxelo....

Kukho iinkxalabo ngomdla oboniswe ngabo bafake izicelo zomsebenzi, nabangaphezulu kwe185 000, kwizithuba ezikhoyo kwinkonzo yesipolisa eziyi-5 500 kuphela. Oku kubonisa ukuphelelwa lithemba koninzi lolutsha lweli olungaphangeleyo. Le ibinkqubo yokuqala yeNkonzo yesipolisa (SAPS) yokufaka izicelo zomsebenzi kusetyenziswa i-internet, iElectronic recruitment system ngolwasemzini, nefumene ngaphezulu kwe 67 000 yezicelo kwiiyure nje ezingamashumi amabini anesine ivulile le nkqubo. UAyabonga Kekana ubambe udliwano ndlebe nothethela imanyano yamapolisa, iPOPCRU, kuzwelonke uRichard Mamabolo...

Iziganeko zolwaphulo-mthetho ezohlukileyo ezibone abaninzi babophulimthetho bedlwengula, babulale, ze batshise amaxhoba, zivuselele ingxoxo ngokuphononongwa kwendlela abacinga ngayo oonqevu, neyenza ukuba bafikelele kwesi sigqibo sobundlobongela. Ingaba sisigulo okanye liqhinga lokulahla umkhondo kwimikhuba yabo? Oku kulandela isiganeko sakutsha nje, sokufunyanwa komzimba otshisiweyo wentombi eneminyaka elishumi elinesibini ubudala yaseMotherwell, eGqeberha, uLithaliyanda Ntoni. Ukanti kwiiveki ezimbini ezidlulileyo, kwilokishi yakwaNobuhle, eKariega, kwafunyanwa imizimba yamantombazana amabini kwihlathana, ebulelwe futhi etshisiwe. Esinye isiganeko esothusayo, sesika-Uyinene Mrwetyana ngo-2019, nowadlwengulwa, wabulalwa, ze watshiswa umzimba wakhe eKapa. Ukanti ngo-2019, uKarabo Mokoena naye wabulalwa liqabane lakhe, ze lawuntumeka ngomlilo umzimba wakhe. UAyabonga Kekana uncokole nengcali kwimiba yolwaphulo-mthetho, uGqirha Thompho Tshivhase…

Ikomishoni yamalungelo oluntu kweli, iSAHRC ngamafuphi, ilumkise ngelithi ukuba kuyaqhutywa kusalelwa abantu abaphuma kumazwe angaphandle kweli ukufikelela kwiinkonzo zezempilo, izigulo ezifana nesifo sephepha nentsholongwane kagawulayo ziseza kuqhuba zibangela ixhala kweli lizwe. Oku kulandela iingxelo zokuba amanye amaziko ezempilo kweli ayala ukunyanga abantu bokufika nabanye babo abakweli ngokungekho mthethweni.  Ukuxoxa banzi ngalo mba, emnxebeni sinomkhomishinala ophula kwikomishoni yamalungelo oluntu, uAseza Gungubele...

Ilungu lesigqeba esiphezulu kwisebe lorhulumento ngobambiswano, iCogta, uZolile Williams uqinisekise amaxhoba ezikhukhula zaseMthatha ukuba urhulumente uzakufudusa iintsapho ezingasenamakhaya kumhlaba omtsha ochongiweyo, ze kuvuselelwe namakhaya onakaliseke kancinci. Longeziwe nexesha lokuhlala kwabo bangenamakhaya kwindawo yokuhla eyi B&B ngeentsuku ezilishumi elinesihlanu. UWilliams utyelele eMthatha ukuyakuqwasela inkqubela kwiinzame zabo zongenelelo emva kwezikhukhula eziye zashiya umonakalo nezisube imiphefumlo yabantu abalikhulu elinambini kweliphondo. UNkululeko Nyembezi usenzele le ngxelo...

Ngokwengxelo yakutshanje ekhutshwe liziko iWaterCan, ngumyinge wamashumi amane anesithathu ekhulwini (43%) weesampuli zamanzi avavanywe kwizikolo zeloMzantsi Afrika afumaniseke engakhuselekanga ukuba asetyenziswe okanye aselwe ngabantu, nto leyo ebeka impilo yabafundi nootitshala esichengeni. UAyabonga Kekana uncokole  nongumququzeli wezoqoqesho kwi-WaterCan, uNomsa Daele.

I-Democratic Alliance kule mpela veki ibhengeze ukuba ayizokuthatha nxaxheba kwingxoxo yesizwe ebhengezwe ngumongameli uCyril Ramaphosa. I-DA ityhole uRamaphosa ngokukhusela abaphathiswa be-ANC abankone lurhwaphilizo, kwikhabhinethi yakhe, ndaweni yokubagxotha, suka wagxotha ilungu le-DA kwikhabhinethi yakhe, ngokundwendwela iMelika lingafumenanga sigunyaziso sikamongameli. Masifumane uhlalutyo kwingcali yemiba yezorhulumento nezopolitiko, uSandile Swana…

Lunikwe de kube ngomso uluntu ukuba luphefumle ngokuphononongwa koxwebhu olungumgaqo ogxile kwigalelo loorhulumente basekhaya kwi-democracy yeli lizwe wango-1998, obizwa iWhite Paper on Local Government ngolwasemzini. Olu xwebhu lujoliswe ekuhlangabezeni imingeni abajamelene nayo oomasipala beli lizwe, phakathi kwezinye izinto.  Ukuxoxa banzi ngalo mba, emnxebeni uAyabonga Kekana uxoxa nomongameli wombutho woomasipala kweli, iSALGA ngamafuphi, uBheki Stofile...

Iphondo iMpuma Koloni libone iziganeko eziliqela zokubulawa kwabantu kwezi nyanga zidlulileyo. Ukubulawa ngokumasikizi kweentwazana eziselula ezimbini kwilokishi yaKwaNobuhle eKariega kothuse isizwe siphela.  Imizimba yala mantombazanana etshileyo ifunyenwe kwihlathana elingephi, nalapho omnye bekunzima nokufaneseka ngendlela otshe ngayo. Urhulumente wephondo uvakalise inkxalabo ngezi ziganeko, ememelela ukuba ii-arhente zokunyanzeliswa komthetho zisebenze imini nobusuku, zilwe ulwaphulomthetho. UFundiswa Mhlekude usenzele le ngxelo...

Urhulumente wephondo iMpuma Koloni uqikelela imali ebalelwa ngapha kwe-five billion yeerandi ezakudingeka ukulungiswa umonakalo odwalwe zizikhukula kwimimandla eyohlukeneyo ephondweni kwiiveki ezimbini eziphelileyo. Ummandla ochaphazeleke kakhulu kwezi zikhukula, ngumasipala i-OR Tambo, nequka idolophu uMthatha. Masive ukuba le mali izakuya phi ilungise ntoni. Emnxebeni sinaso isitehethi sikarhulumente wephondo, uKhuselwa Rantjie…