trufm Current Affairs

Njengelinge lokuphakamisa ukukwazi ukufunda nokubalisa amabali ngeelwimi zeenkobe, iSebe lemfundo esisiseko, ngokubambisana neNational Education Collaboration Trust kwakunye ne Nal'ibali Trust, babeke le nyanga bucala ukukhuthaza ukufunda, ufundela ngaphandle, iRead Aloud Month ngolwasemzini.  Oku ziinzame zokwenza ukuba abantu bakwazi ukufikelela kumabali abaliswa kusetyenziswa iilwimi zenkobe. Ukuva banzi ngalo mba, emnxebeni uAmanda Xhala ubambe umanejala wezonxibelelwano kwiNal'ibali Trust, uSuri Tsholetsane

Ukusukela izolo, kubhiyozelwa iveki ejongene nezifo ezosulela ngokwabelana ngesondo, iSTI/Condom Week, nezakuqhuba de kube ngomhla wamashumi amabini ananye kule nyanga. Umbutho wezempilo kuzwelonke, iWHO, uthi lixesha lokuba kuphinde kuthetha-thethwane kufundiswe ngokubaluleka kwe condom. Ku 30 MinutesLive namhlanje u Amanda Xhala wenze udliwano ndlebe nophuma kwisebe lempilo kuzwelonke u Regina Maithusi...

Ihlabathi namhlanje libhiyozela usuku lokunika ingqwalasela kusasazo lukanomathotholo, iWorld Radio Day.  Olu suku kulo nyaka lubhiyozelwa phantsi komxholo othi: Radio and Climate Change, ngeenzame zokuqwalasela indima kanomathotholo ekufundiseni ngengxaki yokuguquguquka kobume bezulu. Abantu abaziimfama nabo baxhomekeke kakhulu ukufumana ulwazi ngokwenzeka kwiindawo zabo, nakwihlabathi jikelele.  Emnxebeni uVuyolwethu Mabeqa uthetha noyingqonyela yeNational Council for the Blind, uLouis Nzimande...

Indibanisela yemibutho yezempilo neyaziwa njenge Universal Healthcare Access Coalition, ithe thaca isiphakamiso sayo ethi sesona sichanekileyo esizakufezekisa iinjongo zokuba wonke ubani akwazi ukufumana iinkonzo zonyango ezisemgangathweni, ngokulinganayo nangokufikelelekayo eMzantsi Afrika, endaweni yeInshorensi yezempilo kuzwelonke i-NHI. Le ndibanisela ibandakanya imibutho yezonyango, izigulana, imibutho engenanto yakwenza norhulumente phakathi kweminye, ithi iziphakamiso eza nazo zisekelwe kubungqina obubambekayo, zizakubanakho ukusebenza ngoko nangoko kwaye zizakusebenza ngemali eyabelwe yona kungekho mfuneko yokunyusa irhafu kubemi beli. Ukusabela banzi ngesi siphakamiso, emnxebeni ngoku sinalo ilungu lekomiti eququzelela lendibanisela yemibutho ekwangusihlalo wombutho wezonyango woMzantsi Afrika, i SAMA uGqirha Mvuyisi Mzukwa...

Abarhanelwa abathathu ababanjwe malunga nokuxhwilwa komntwana oneminyaka elithoba, eMonti , uEmaan Fatima Ghumman, bavele kwinkundla kamantyi yase Monti eMpuma Koloni. Lo mfundi webanga lesihlanu kutyholwa ukuba waxhwilwa ngamadoda amabini angaziwayo, nebeqhuba isithuthi esi grey ngombala kwiveki ephelileyo ngaphandle kwesikolo sakhe. U Fatima uphinde wabuyiswa kusapho lwakhe eBuffalo flats. Ibutho leeHawks kweliphondo lithi lo mntwana kutyholwa ukuba ushiywe kufutshane nesikhululo samapolisa eNyibiba, eMdantsane ngabantu abangaziwayo. ULubabalo Dada usenzele le ngxelo...

Isebe lezemfundo kuzwelonke liphawula iveki echasene nokuzibulala kwabantwana, ukususela ngomhla we 9 uyakutsho kwi 16 yalenyanga, phantsi komxholo othi " Your feelings matter, let's talk". Oku kwenzelwa ukuxhobisa uluntu ngamanyathelo olunokuwathabatha ukuthintela ukuzibulala kwabantwana. Kwinkqubo yethu u 30 MinutesLive namhlanje u Amanda Xhala wenze udliwano ndlebe nothethela isebe lezemfundo kuzwelonke u Elijah Mhlanga.....

Iveki yokuqala yenkqubo yokufunda ka 2025 kumaziko efundo ephakamileyo eMpuma Koloni, iUniversity of Fort Hare kunye neWalter Sisulu University, ibijongene neengxaki zenkxaso mali yabafundi. Nangona kukho ezingxaki zemali, iFort hare sele iqalile nokufundisa ngelixa eWSU kusekho imingeni enxulumene nokubhaliswa kwabafundi. ULubabalo Dada usenzele ingxelo

Imanyano yabasebenzi iCommunications Workers Union ikhuphe isilumkiso sokuba aphezulu amathuba okuba ivalwe iposi yoMzantsi Afrika ingaphelanga le nyanga. Iposi yeli esezingxakini, yafakwa phantsi kwenkqubo yohlangulo lwamashishini ngo 2023. Ukuba sive banzi ngoku u Amanda Xhala ubambe udliwano ndlebe nothethela i CWU  u Nathan Bowers...

: Ikomishoni yamalungelo oluntu ithi izindlu zangasese ezingagungxulwayo neziphuculiweyo eMpuma Koloni, zisakhala ngaphantsi kwezidingo zokhuseleko, nto leyo ibeka ubomi nesidima sabantwana besikolo emngciphekweni. Le komishoni ikhuphe ingxelo engancumisiyo ngeziseko zogutyulo kwizikolo zase Mpuma Koloni. Le ngxelo idiza ukuba inkqubo yogutyulo ebizwa i Sanitation Appropriate for Education -iSAFE- ngamafutshane, ayihambiselani nomgangatho wokhuseleko kwaye inyhasha amalungelo esidima sabafundi abaselula nemeko yokufunda esempilweni. Ziqabele kumakhulu amane iziko zeli phondo ezisasebenzisa izindlu zangasese ezingagungxulwayo. Masive ingxelo ku Sidima Mfeku...

 Urhulumente woMzantsi Afrika uthi iyaxhalabisa into yokuba isizathu sika mongameli waseMelika, uDonald Trump sokuphelisa inkxaso kwelilizwe, asinasihlahla okanye sisekelezelwe kwiinkcukacha ezingenabunyani, kwaye singathatheli ngqalelo nembali yelilizwe yobukoloniali nengcinezelo. u Amanda Xhala ubambe udliwano ndlebe nosoqoqosho u gqirha Mkhuseli Vimba!