trufm Current Affairs

Inkulu-baphathiswa yephondo iMpuma Koloni, u-Oscar Mabuyane, ibibambe intetho yayo engobume bephondo ngoLwesihlanu, neyiyintetho yakhe yokuqala phantsi korhulumente wolawulo lwesichenxe.  Phakathi kwezinto azibaluleyo uMabuyane, kukulungiswa kweendlela zomhlaba zeli phondo zifakelwe i-tar, ngelokunceda uluntu lweli phondo. Emnxebeni, u-Ayabonga Kekana ubambe iNkulu-baphathiswa, u-Oscar Mabuyane, khon' ukuze isicacisele banzi ngobume beli phondo...

Izolo ihlabathi belibhiyozela usuku lwamazwe ngamazwe olugxile kulwimi lwebele, i-International Mother Tongue Day ngolwasemzini. Uphando lubonisa ukuba abafundi abafunda ngeelwimi ezimbini, eziquka nolwimi lwabo lweenkobe, baqhuba kakuhle kwizifundo zabo.  Ukanti ukubhiyozela olu suku, isikolo samabanga aphantsi iNonkcampa eQonce, besibambe umsitho ogxile wesiNtu, obonisa inkqubeko yesiXhosa nobuncwane bokusetyenziswa kolwimi lweenkobe kwimidlalo.  Ukuva banzi ngalo mba, emnxebeni uAmanda Xhala ubambe inqununu yesikolo iNonkcampa Primary School, u-Anele Zita...

USASSA ukwiphulo lokuncedisa iPostbank ekutshintshweni kwamakhadi egolide abe ngamakhadi amnyama. Liye landiswa ixesha lokuwatshintsha, ukuya kumhla wamashumi amabini kwinyanga ezayo. Kukholelwa ukuba lamakhadi matsha akuzokuba lula ukuba kwenzeke ubuqhetseba kuwo. UAmanda Xhala kaTruNews@6 ubambe udliwano ndlebe  nomanejala ophezulu kwaSASSA, uBandile Maqethuka.

Isebe lezabasebenzi liyalele ukuvalwa kweziko loqhaqho-zidumbu ( forensic pathology services facility) eNew Brighton eGqeberha, ngenxa yokungacokeki kwalo. Nangona kunjalo kukho iingxelo zokuba abasebenzi kweli ziko bayaqhubeka nokunikezela ngeenkonzo kwiindawo zokugcina izidumbu eGelvandale, naseMount Road. Emnxebeni sinaye ophuma kumbutho iHospersa Provincial Labour Relations Organiser and Tekno Felllow, uThembisa Mtshingila-Witbooi...

Umbutho ophikisayo nongowesithathu ngobukhulu kwipalamente yeloMzantsi Afrika, uMkhonto Wesizwe Party, uphefumle ngokumiswa kwentetho yohlalo lwabiwo-mali ebekufanele ukuba yenziwe namhlanje. U-Amanda Xhala ubambe emnxebeni umbhexeshi oyintloko yalo mbutho, uMzwanele Manyi...

Inqunyanyiselwe umhla weshumi elinesibini kwinyanga ezayo intetho yohlahlo-lwabiwomali yomphathiswa wemicimbi yezemali, u-Enoch Godongwana.  Oku kulandela ukumiswa kwale ntetho namhlanje, kulandela ukungavisisani kwimibutho engoogxa kurhulumente wobumbano, iGNU, ngomba wokwenyuswa kwerhafu yentengo iVAT, ngomyinge wesibini ekhulwini.  Ukusicacisela banzi ngokuba iVAT lena yintoni na, u-Amanda Xhala ubambe emnxebeni umhlalutyi wezoqoqosho, uNjingalwazi Bonke Dumisa...

Nanjengoko kulindeleke ukuba uMphathiswa uGodongwana emva kwemini athi thaca uhlahlo lwabiwo-mali lonyaka mali ka-2025/26, kulindeleke aze namaqhinga okucutha ityala likaRhulumente,  nawenkcitho karhulumente engazokutyabula abarhafi beli, nezicwangciso zikaRhulumente zokukhulisa uqoqosho kudalwe nemisebenzi phakathi kwezinye izinto.  U Ayabonga Kekana ubambe udliwano ndlebe noyingcali kwimiba yezoqoqosho norhulumento, nosuka kwiDyunivesithi iWits, uGqirha Asanda Fotoyi

URhulumente wephondo iMpuma Koloni ngokusebenzisana necandelo labucala, baphehlelele iphulo lokuncedisa ukuhlawulela abafundi ityala abanalo kumaziko emfundo ephakamileyo. Imali ebekelwe bucala ukucima la matyala ibalelwa kwi-70 million rands, kwaye abo bazakuxhamla kuyo ngabo bagqibe izifundo zabo nto nje abakwazi ukufumana iziqinisekiso zabo zemfundo kuba betyala amaziko ebebefunda kuwo. Masincokole ngokubanzi ngoku nothethela uRhulumente wephondo, uKhuselwa Rantjie…

Abaqeshi jikelele kweli lizwe bayabongozwa ukuba baziqhelanise nemiqathango emayela nowona mvuzo mncinci wamkelekileyo, ukuze baqinisekisa ukuba bayayithobela. Oku kusemva kokuba urhulumente ebhengeze ukuba owona mvuzo mncinci wamkelekileyo kweli lizwe, i-minimum wage, uzakonyuswa ngo-4-point-4 percent ngomhla wokuqala kwinyanga ezayo. Oko kuthetha ukuba owona mvuzo uphantsi ngoku izakuba yi-28 rands 79-cents ngeyure ukusuka kwi 27-rands 58-cents. Masifumane ilizwi elisuka kumfela-ndawonye wemibutho yabasebenzi, iCOSATU, emnxebeni sinaso isithethi salo mbutho uZanele Sabela…

Ilizwe loMzantsi Afrika linelona nani liphezulu kwihlabathi labantu abaphila nentsholongwane kagawulayo, nalapho kuqikelelwa ukuba bakwisibhozo sezigidi (8 million) abantu kweli lizwe abaphila nale ntsholongwane. Kutshanje, umongameli waseMelika, uDonald Trump, ubhengeze ezokuba uyasinqumamisa isicwangciso sesibonelelo sexesha elingxamisekileyo somongameli wela lizwe esenzelwe ukujongana nesifo ugawulayo, iPEPFAR ngamafuphi.  Le nkqubo izixhamlisa kakhulu iinkqubo zikagawulayo zeloMzantsi Afrika, kuquka amachiza ee-ARVs.  Sithethanje, baqikelelwa kwishumi elinesihlanu lamawaka (15 000) abasebenzi kwimibutho engekho phantsi korhulumente, nesebenza ngabantu abaphila nentsholongwane kagawulayo, abachaphazelekileyo sesi sigqibo sikaTrump. Ukuxoxa banzi ngalo mba, uYolanda Kambile emnxebeni ubambe umlawuli kwicandelo elijongene nonyango nokhathalelo lwabo baphila nentsholongwane kagawulayo kwiSebe lezempilo kuzwelonke, uGqirha Musa Manganye, kwakunye nothethela umbutho iTreatment Action Campaing, iTAC ngamafuphi, uSibongile Tshabalala...