trufm Current Affairs

Kuphazamisekile ukuhanjiswa kweempahla kumda iLebombo ophakathi ko Mzantsi Afrika ne Mozambique. Oku kusemva kokubanjwa koqhankqalazo ngenxa yokungoneliseki ziziphumo zonyulo ebelubanjwe kwinyanga ephelileyo, kwilizwe laseMozambique. Umbutho olawulayo iFrelimo, nguwo owaphumelelayo. Amaqela aphikisayo kwela lizwe aye abhengeza ukuba ayazikhaba iziphumo zonyulo bebanga ukuba bezithiwe mbende bubuqhophololo. U-Ayabonga Kekana uncokole no Tumelo Machogo ngalo mba...

Umbutho iDemocratic Alliance uthe thaca epalamente umthetho ozaku jongena norhwaphilizo, i-Anti Corruption Bill. Ngelixa kusiyiwa kunyulo, lombutho wathi ufuna ukwazisa ikomishoni ezakujongana nokuphanda nokutshutshisa urhwaphilizo lwamatyala anobuzaza. Ayabonga Kekana ubambe udliwano ndlebe nengcali yopolitiko ugqirha Nkosikhulule Nyembezi.. 

UMphathiswa weSebe lezemali u-Enoch Godongwana, uvakalise ukuba kulindeleke lenyuke liyekuma kwi six-point-three trillion yeeRandi ityala likaRhulumente kunyaka mali ka2025/26. UGodongwana ukuvakalise oku ngethuba esithi thaca uhlahlo lwabiwo-mali lo mbindi wonyaka ePalamente, kwiveki edlulileyo. Eli tyala kulindeleke lenyuke nangona uRhulumente enze iinzame zokulicutha, neziquka ukucuthwa kwenkcitho ngurhulumente. UAyabonga Kekana ube nodliwano ndlebe  nengcali yezoqoqosho uNjingalwazi Bonke Dumisa…

Utyalo-mali olumandla kuphuhliso lweziseko ezingundoqo, nokuphuculwa korhulumento koomasipala, kubonwa njengezinye zezisombululo kuhlumlo loqoqosho loMzantsi Afrika. Oku kuphakanyiswe ngumphathiswa wesebe lemali, uEnoch Godongwana ngethuba esithi thaca uhlahlo lwabiwo-mali lombindi wonyaka ngoLwesithathu wale veki siyiqukumbelayo. UGodongwana uvakalise isidingo senkxaso koomasipala, nanjengorhulumente osondeleyo kuluNtu namashishini ekuseni iinkonzo ezingundoqo nokuqinisekisa ukuba intle imo yokudalwa kwemisebenzi. Bangamakhulu mabini anamashumi amahlanu nesixhenxe (257) oomasipala abakhoyo eMzantsi Afrika, kuquka abambaxa abasibhozo, abangamashumi amane anesine (44) besithili, kunye nabangamakhulu amabini anesihlanu abangqongwe ngamaphandle. Aba masipala bajamelene nemingeni eli qela, ekuquka ulawulo oluheshe-heshe, ubungonkeli bezopolitiko obungazinzanga, ukufeda ukuqokelela ingeniso yerhafu yeenkonzo, kunye norhwaphilizo. Ingaba ooMasipala banako ukuba sisiseko sohlumo loqoqosho kweli ngokupheleleyo? Kufuneka kwenziwe ntoni ukuqinisekisa oku ukuba kuyimpumelelo? Le yeminye yemibuzo esifuna impendulo kuyo. Ukusincedisa koku, emnxebeni sinayo umhlalutyi kwimiba yopolitiko noqoqosho, uSandile Swana…

Alikachazwa ngokwangoku usuku lwenkonzo yomngcwabo yeNkosi ethe yabulawa kwikomkhulu laseMqhekezweni, ngaphandle kwaseMthatha eMpuma Koloni. Amalungu osapho lwamaDlomo azakuhlangana komkhulu ngeCawa ukushukuxa lo mba. UNKosi Nogcinile Mtirara ubulewe ngobusuku bangoLwesibini ngamadoda angaziwayo amabini, nabezogqume ubuso ngee bhalaklava. UFundiswa Mhlekude za nengxelo

Icandelo lophando elikhethekileyo iSIU, lifike lingabhungisanga kumasipala waseMakana eMpuma Koloni, ukwenza ugqogqo. Oku kuza emva kokuba umongameli uCyril Ramaphosa egunyazise ukuba makwenziwe uphando kwizityholo zolawulo olugwenxa kulamasipala. I-SIU ithi oku kulandela ikhwelo elihlatywe ngabahlali abaliqela, lokuba kuphandwe ukusukela ngo2019. Olu phando luzakuqwalasela uphuculo lwenkqubo yelindle yesigaba sokuqala kulomasipala, inkqubo yokufakwa kombane kwakunye nokwenyulwa kwenkampani iMBB ukujonga nokulondolozwa kwamanzi namanye amaphulo. USinethemba Witi uza nengxelo...

Namhlanje isebe lezobulungisa lityikitya isivumelwano ne-Consumer Profile Bureau esizakubona kudluliswa iinkcukhaca zabo bangondli abantwana kwibhodi elawula ukuthengwa kwezinto ngetyala, iCredit Bureau. Eli linge lelokwenza nzima kwabo bangondli abantwana babo, ukuba bathenge izinto ngetyala. Ayabonga Kekana ubambe udliwano ndlebe noTsekiso Machike

Kulindeleke ukuba amagosa ecandelo elikhethekileyo lezophando i SIU, enze ugqogqo kumasipala i Makana, eMakhanda namhlanje. Ayabonga Kekana ubambe udliwano ndlebe nesithethi seSIU Kaizer Kganyakgo.

Usihlalo we-ANC kummandla iNelson Mandela Bay, uBabalwa Lobishe, wonyulwe njengosodolophu omtsha womasipala ombaxa weNelson Mandela, eMpuma Koloni. ULobishe, ungena endaweni kaGary van Niekerk wombutho iNational Alliance, nolahlileyo esikhundleni sakhe namhlanje. Ukulahla kwakhe kulandela isigqibo sesigqeba esiphezulu seANC sokuba lombutho mawukhokhele bonke oomasipala abangenamibutho iphumelele ngesininzi. ENelson Mandela Bay, iANC ibambisene nombutho kaVan Niekerk iNational Alliance, EFF, PA, PAC kwakunye neAIC. USinethemba Witi usenzela lengxelo

I-Arhente yezendlela isungule inkqubo yophuhliso lwabakhi nezakuthi incedisane nabo ukuphucula umsebenzi wabo, ushishino nokuvelisa umsebenzi okumgangatho ophezulu. Le nkqubo izakuphinda incedise abakhi ekubeni bakwazi ukuqoshelisa umsebenzi ngexesha elisikiweyo. UAyabonga Kekana uncokole nongumlawuli oyintloko uLehlohonolo Memela...